3
Su nga Gubispu ri sek Simbaan
1 Metuuri gesuyen keni: bu' sung menugaling ne mbaal ne gubispu ri sek simbaan, minugaling giin seng melengas nek terbahu.
2 Su gubispu ri sek simbaan kina'enlan ndi' mpemura, sala raik sawaan, metau mekpegeng ri se gegulingenen, menabut, tinamed, kina'enlan meli'alimba'en ri se ngak tuwa', bu' metau mektendu',
3 ndi' megbinabeleng awas ndi' mensait, ma'ad mekemaya' bu' melipetailen ri se kelinaw; kina'enlan ndi' melipetailen ri sek selapi',
4 kina'enlan melengasik pedlegesegen ri se gegulingenen nek penimalay bu' mekepemaag se nga gembata'en arun meksunud bu' mektamed ri seniin.
5 Ay bu' su getaw ndi' metau medlegeseg ri se gegulingenen nek penimalay, pekendun ma niin pedlegeseg sek simbaan ned Diwata?
6 Kina'enlan metandeng na riin sek pektu'u arun ndi' mekpesigarbu bu' mesilutan, maa' seng mihitabu' riin ni Satanas.
7 Kina'enlan tinamed rema ne nga getaw ne genda' mesakup sek simbaan arun ndi' mpiiran bu' ndi' metaban ri se kilet neng Menulay.
Ngang Minibeli ri sek Simbaan
8 Maa' run rema su ngang minibeli ri sek simbaan, kina'enlan melengas su ngak pemetasan nilan bu' metinuuren; kina'enlan ndi' ilan mekpelebiyan minum neg binu bu' ndi' merelaw sek selapi'.
9 Kina'enlan mekpeddayun ilan sek pekpebilin sek pirayag ne kemetuuran sek pektu'u duma seng melengas ne kunsinsiya.
10 Bu' kina'enlan indanan ilan reli'; rayun bu' me'ita' ne mbaya' ilan, mekepenibeli ilan na.
11 Giin ra rema su ngak sawa nilan kina'enlan melengas rema suk pemetasan nilan, ndi' menlibak, metau mekpegeng ri se gegulingen nilan, bu' gena' dlimbungan ri se dlaun ne ngag betang.
12 Sung minibeli ri sek simbaan kina'enlan sala raik sawaan bu' metau medlekata ri se nga gembata'en bu' sek pamilyaan rema.
13 Su ngang minibeli neng melengas suk pekpenibeli nilan mekerawat nek pesiddengeg bu' mekegbaal sek pegasuy se genda'i gendek metendeng sek pektu'u nilan riin ni Christ Jesus.
Su Gembagel neng Mi'edlud
14 Saanay miksulatu runik sulat keni riin seniyu, midderamau neng mekeriinu seniyu se gendi' santa'.
15 Ma'ad bu' melanganu, sulat keni giining mektendu' ri seniyu bu' pegendun ta pedleketubu' gisip ngang mektetu'u ri seg balay ned Diwata. Balay kiin, giin suk simbaan neng miktetubu' ned Diwata, suk pasek bu' penligen se kemetuuran.
16 Nda'iruning mekelimed se gembagel neng mi'edlud ri sek tinu'uwan ta:
Mikpe'ita' giin maa' ne getaw,
pimetuuran neng metareng giin pebiyan se Gispiritu,
bu' mi'ita' giin ne ngag anghel.
Winali giin tu se ngang nasud,
bu' tinu'uwan rini sek tibuuk neg benwa,
bu' piritaas tu se dlangit.