5
Guiꞌ na jaꞌp ji buusan na gux kɨɨꞌ kasnir na ba sɨlhñaꞌ gu uꞌuan bhiibgixim
1 Baꞌ gux ioꞌm Gɇꞌkam na bhaiꞌ daa atooxkor taꞌm, jaꞌpni kɨɨꞌn dɨr daaꞌ maaꞌn gu uꞌuan bhiibgixim na bɨxxik dɨr mi tu uaꞌñix, xijum gok kap baꞌ bhiibhiꞌsap kɨꞌn guiꞌ nax kabkam tu bhibhiꞌsap, na sap baꞌ cham jaroiꞌ sɨlhñai tɨgiaꞌ na jax jum kaiꞌch.
2 Baꞌ maadɨt gu nobiiꞌñ gu Dios bha jaꞌp kɨɨkat jup kaiꞌch gɇꞌ kɨꞌn na jɨꞌx tu jiiñak:
―¿Jaroo chix bhaiꞌ na bhiꞌspioꞌkai sɨlhñai tɨgiaꞌ na jax jum kaiꞌch dhi uꞌuan bhiibgixim?
3 Pu cham jaroiꞌ jaiꞌch guꞌ nax bhaiꞌ na bhiꞌspioꞌkai sɨlhñai tɨgiaꞌ gu uꞌuan na jax mi tu uaꞌñix guiꞌ nam jɨꞌk bhammɨ jaꞌp jup tuꞌiiꞌ jix dhaam nam jir noonbiꞌñ gu Dios, gio guiꞌ na mu jaꞌp jix chu jaiꞌch na jɨꞌx oiꞌñgaꞌn, piam sia chi moor pa jaꞌk kam kaꞌ gɨt.
4 Baꞌ aañ jix buam jiñ aagɨt ma susua nat moo puiꞌ pɨk cham jup jaiꞌchdhɨr gu jaroiꞌ nax bhaiꞌ na bhiꞌspioꞌkai sɨlhñai tɨgiaꞌ guiꞌ gu uꞌuan.
5 Guꞌ ji na guꞌ maadɨt gu maaꞌn ooꞌm daman maakob nam miꞌ daraa bɨɨx xikoolh dhɨr na paiꞌ daa gux ioꞌm Gɇꞌkam, jup jiñ chɨtda:
―Aap moo cham jax jum aaꞌndaꞌñ jaduuñ, ba jɨkgɨ ap. Matgam yaꞌ paiꞌ jaiꞌch ji maadɨt nax bhaiꞌ na bhiꞌspioꞌkai sɨlhñai tɨgiaꞌ na jax jum kaiꞌch dhi uꞌuan bhiibgixim, nat guꞌ guiꞌ ba maꞌiich gux buam jum duukam. Guiꞌñ dho aagɨt jup kaiꞌch nar boxiiꞌñ gu Judaa, na xib jix ioꞌm gɇꞌkam kɨꞌn ba daa, sia bɨɨx jaiꞌ bhaankamuꞌn gu Dabii, na guꞌ puiꞌp jir boxiiꞌñ.
6 Baꞌ guiꞌ nat jaꞌp ji buus na gux kɨɨꞌ kasnir miꞌp kɨɨk jaꞌpni bɨɨpɨꞌ dɨr na paiꞌ daa gux ioꞌm Gɇꞌkam, miꞌ ɨrban nam paiꞌ bɨɨx xikoolh dhɨr daraa gu jaꞌtkam nam jir jagɨꞌgɨr paꞌ gio gu maakob sasoiꞌ nam bɨɨx aixim tuꞌm, xijum maakob tu aꞌaaꞌ, gio gu buupuiꞌñ jaꞌkbuiꞌ ɨp. Dhiꞌ pɨx kat jup jum kaiꞌch gux xijum gook jix dhuuduꞌ kam jix uꞌuañ iꞌiiꞌmdagaꞌn gu Dios nat muiꞌ kap ja joot bɨɨx kap na jɨꞌx oiꞌñgaꞌn. Guiꞌ jɨꞌ na puiꞌ ji buusan na gux kɨɨꞌ kasnir, bɨɨx kap jix bapaiñmiꞌ gu tukgaꞌn nam paiꞌ jax gɨbiimɨk janoꞌ nat jum makgɨrta,
7 baꞌ mu jimɨɨk bhaiꞌ ji dhaa gu uꞌuan bhiibgixim na jaꞌpni kɨɨꞌn dɨr daaꞌ gux ioꞌm Gɇꞌkam na bhaiꞌ daa atooxkor taꞌm.
8 Guꞌ baꞌ gu maakob sasoiꞌ nam bɨɨx xikoolh dhɨr guguuk, gio gu maaꞌn ooꞌm daman maakob gu jaꞌtkam nam bɨɨx xikoolh dhɨr jup daraa, miꞌ ja oꞌlhia kɨꞌn ji guguu mɨt jaꞌpni bɨɨpɨꞌ dɨr na paiꞌ kɨɨk guiꞌ jɨꞌ na jaꞌp ji buusan na gux kɨɨꞌ kasnir, bɨɨx jɨꞌmaꞌn ja daadaꞌ am gu sasaasbikar gio gu aꞌlhich jajaꞌ jix uꞌuam totbikdam, susdagɨm mi jim guiꞌ na joidham uub na jax chuꞌm jum kubhioñxiꞌñ gu Dios. Dhiꞌ pɨx puiꞌ jaꞌk jum maaxiꞌñ guiꞌ nam jɨꞌk ba tu daan buiñor gu Dios nam ba tɨ jɨɨgiꞌñ buiñor guch Xoiꞌkam, na guꞌ puiꞌ ji buusandaꞌ nam tu kubhioñxiꞌñdhaꞌ nam paiꞌ dhuuk tu daandaꞌ buiñor.
9 Baꞌ bɨɨx dhɨt bhaiꞌ ji laalagɨ mɨt maaꞌn gu xibkam alabaaꞌn na jaꞌpnim kaiꞌch:
Dai aap jix bhaiꞌ nap bhiꞌspioꞌkai sɨlhñai tɨgiaꞌ na jax jum kaiꞌch dhi uꞌuan bhiibgixim nap miꞌ daaꞌ,
na pich guꞌ pu kaiꞌñkam jum tulhiiñaimɨk jum makgɨrta janoꞌ nat gɇꞌ jaax gum ɨꞌɨɨr bhaan gu kuruus ja aꞌmkam bɨɨx dappaam gu jaꞌtkam na jɨꞌx oiꞌñgaꞌn,
nam bɨɨx aixim tuꞌm tu ñiok gam bɨɨx aixim tuutuꞌm,
na pich guꞌ bɨɨx ja sabaꞌlh kɨꞌn gum ɨꞌɨɨr na pich kɨꞌn tu ja namkix gu ja uaꞌtulhdharaꞌ na baꞌ miꞌ dhɨr bax bhaiꞌ kaꞌ nam yammɨ aayaꞌ na paiꞌp tuꞌiiꞌ gu Dios.
10 Baꞌ xib puiꞌ jaꞌk ba duu pich nam jaiꞌ dhɨt ba tu daam kɨɨkaꞌ na jɨꞌx oiꞌñgaꞌn,
gam jaiꞌ nam naiꞌ ba tu aꞌgidhaꞌ gux bhaiꞌm kaiꞌchdham ñioꞌkiꞌñ gu Dios,
nam puiꞌ ja tɨtdaidhaꞌ gu jaꞌtkam nam ba tɨ jɨɨꞌñdhaꞌ soiꞌm ɨlhdhai aap jum bui.
11 Baꞌ miꞌ dhɨr muiꞌ cham daaxix kam miꞌ bam maax jamɨt gu noonbiꞌñ gu Dios bɨɨx xikoolh dhɨr miꞌ na paiꞌ daa gux ioꞌm Gɇꞌkam, gio nam paiꞌ daraa gu maaꞌn ooꞌm daman maakob gu jaꞌtkam gio baꞌ gu maakob sasoiꞌ.
12 Jup kaiꞌch am gɇꞌ kɨꞌn:
Gɇꞌkamtuꞌndaꞌ ich dhiꞌ na puiꞌ ji buusan na gux kɨɨꞌ kasnir,
nat guꞌm makgɨrta kuruus taꞌm.
Na guꞌ xib jix ioꞌm gɇꞌkam kɨꞌn ba daa,
bɨɨx bhaan ba tu bii gu tuꞌ nax chu jaiꞌch,
puiꞌ na jax gu gɇꞌgɇr jup tum duuꞌnkam gio gu aꞌlhich jup tum duuꞌnkam.
Xib dhiꞌ bax bhaiꞌ na pu tu duñiaꞌ jax ña ɨlhiiꞌñdhaꞌ ja bui bɨɨx gu jaꞌtkam.
Jaꞌpni kuch baꞌ moo gammɨjɨ tuꞌ kaꞌm nɨidhat gɇꞌkamtuꞌndaꞌ.
13 Baꞌ miꞌ dhɨr bɨɨx guiꞌ nat jɨꞌk tuꞌp tu duu gu Dios na bhammɨ jaꞌp jix chu jaiꞌch jix dhaam, gio baꞌ mu jaꞌp na jɨꞌx oiꞌñgaꞌn bhaan, gam mu jaꞌp suudaiꞌ chɨr, jup kaiꞌch am ɨp:
Gammɨjɨch moo tuꞌ kaꞌm nɨidhat tu daandaꞌ buiñor gux ioꞌm Gɇꞌkam na bhaiꞌ daa atooxkor taꞌm gio dhiꞌ nat jaꞌp ji buus na gux kɨɨꞌ kasnir nat jum makgɨrtak,
nam guꞌ gammɨjɨ pur gɇꞌgɇrkam sia nar paiꞌ dhuuk kaꞌ gɨt.
14 Baꞌ gu maakob sasoiꞌ nam bɨɨx xikoolh dhɨr guguuk miꞌ na paiꞌ daa gux ioꞌm Gɇꞌkam jup kaiꞌch am ɨp:
―Puiꞌ dho.
Guꞌ baꞌ gu maaꞌn ooꞌm daman maakob guiꞌ nam bɨɨx xikoolh dhɨr daraa, na mɨt jax ja oꞌlhia kɨꞌn guguu bhaiꞌ ji chu daanɨ mɨt buiñor.