4
O Mia Nga Kael E Gi Nut Tuk Ktar Ko Pum Ngaro Kerok
1 He ekam ko e Yesus ta laut enang tok, va mgua mi kut kael mularo papat mang kam kerkolkol vgum o vnek kam vle tok, gi enang ko e Kristus mruo tkerkolkol vgum o vnek ruk endruk kuon mang ka vok tok kat. Va muk kat mguak sir kserppak orom a papat to endo tok kat kam toot. Ko ani mhel to nma kerkolkol vgum o vnek kuon mang ka vok tok, ta khenam te, ther mi kut ksir pum karo kerkeknen tgus, nang kle ka vle ngang E Nut he.
2 He ekam ko a mhel ther mi kut ksir pum karo kerkeknen ruk tok, va a mhel to endo nam lo kta ngam en mruo ekam ka vok karo svil kat e, endruk ngam kaenen en kam tmar kim mar ko nma vle mo mmie vop. Nove, ta kle ka khenam te, nam kle va kngam en mruo ekam E Nut kmeharom E Nut ka svil ha.
3 Mgua mi ktua khenam ma mmok te, muta ksir pum mularo kerkeknen tok, ekam ko tesgun, ko mut lo kor mnam muk mang E Nut he lua mokpom kar vop, mut her tagur pum a ngaeha to kam rum mularo svil ruk mang o kerkeknen ruk o tamatan ngam mi kut kael ngaro papat mang ngar kam mi kut kaeharom mar. Ii, ko o tamatan ngam ngae ho mi ktua sovet hak kam mrua ngam mar mruo ekam a kerkeknen to kmem pnes he kaivie kveve va enangthe kam totu pum E Nut tok. Ko ngam kaeharom tok, kam ho ksovet hak kam mo gorgor pum lraip lurokol he mrua ngam mar mruo ma mmok mang ngar ko pa pnes. Ii, ngma mo kaum tok kmivie he kveve kam ho ksovet kam mur kaen mar mruo ngang o mia kam gi vrong mo vret mar ko ngam kaeharom tok kam totu pum ngartaro tarmki enangthe mar E Nut msim. Ii, a keknen to endo tho mi kut kernonho hak ko pum E Nut kalo keik.
4 Ii, o tamatan ruk endri ngam kaeharom o kerkeknen ruk endruk, nang kle ksenkrip kim muk ekam ko mum lua gun ngok kmar kam klang nguk mruo kun mnam mar orom ngaro kerkeknen ruk ngat ho mi kut kernonho hak gi, ko mar ngam ngae sei kam mrua ngam mar mruo ekmar. Ii, ngma senkrip kim muk tok, he kpetpet o rhek ngang nguk kam kerrereng nguk vgum tok.
5 Ngam si petpet o rhek ngang nguk tete, vanangko koknaik her mar ruk arhe ngar kle mia sir ko pum E Nut kalo keik, yek kam mrua havae mang ngar mruo. Ii, ko E Nut tkaelel mang En mruo he re kam momngan kar o mia tgus, endruk ngat yor va endruk ngat lo yor vop.
6 He her gi mang a papat to ketasuo E Nut kam momngan kar o mia tgus arhe, yek e Kristus ther grung ngok mLol si ko kim endruk ngat her yor he, kam mi ktua havaeng ngar kat mang a knovvur. Ii, thavaeng ngar tok, he nang E Nut kam momngan kar mar kmikkiem ngaro keknen ruk ngaro pkor ngam kaenen mar kmeharom mar ko ngat lo yor vop, nang kmel a ngaekam ekam mar, he nang nok mar kam kle mi kut kais kam kol a ktalhok to kam plong vle ko kim En ngnik ngnik kat her vgum E Nunu A Totur. Ii, ngar kais kam kol a ktalhok to endo tok, kmikkiem gi enang ko E Nut nama vle ngnik ngnik tok kat.
7 Vanangko ketasuo o vrong tgoluk tgus kam loloong he. He ekam tok, mgua smia papat he mrua toot mang mularo pkor, he nang muk kam mi kut kais kam smia ngarkie.
8 Va a keknen to a ngaenpaeir ta vle ti te, muk kam sovet kmelongtok mo nguk mruo hak, ko a keknen to kmelongtok mang o mia tok, tkais kam kir mang o kerkeknen tgus ruk o mia ngam kaeharom mar ngang nguk.
9 Va mguak mo vaeng nguk mruo ngok mnam mularo rektor, nang mguak or kam rere porom muk mo kmuk ko mguak kaeharom tok e.
10 Va langto langto mnam muk, nak kaeha orom kta nngiar mruo to tmi ktua kol vgum E Nunu A Totur kam sim kut kaeha ngang o mia kam turang ngar orom. He enangthe langto langto mnam muk na kaeha orom kta nngiar mruo to endo mekam mekam ngang o mia, gi enang ko E Nut ta svil muk kmeharom tok, yek muk tgus mguer mi ktua khenam E Nut ka keknen to kam ring ya mang o mia orom mularo vrong nngiar ngo mamten tgus ruk tok.
11 Ii, ko enangthe tang mnam muk na kol a nngiar to kam rere malpgem o mia, va o mia ngak vokom a mhel to endo te, en nma rere orom E Nut karo rhek msim. Va enangthe langto mnam muk na kol a nngiar to kmeha ngang o mia kam turang ngar, va a mhel to endo na kaeha orom ka nngiar to endo ngang ngar orom E Nut ka serppak to E Nut nam kaenserpgam en orom. Va enangthe akuruk ngap kaeha orom o nngiar ruk endruk tgus enang tok, to endo yek, o mia ngar kais kam kanprim E Nut mang ngar her gi vgum ko ngata ktar kor mnam mar mang e Yesus Kristus he kmokpom kar. Ko her En arhe o mia tgus ngak teiver En orom kla serppak hak kngorom kngorom. Lmien hak.
Endruk Ngat Kor Mnam Mar Mang E Yesus He Kmokpom Kar Ngar Mia Kerkolkol Vgum O Vnek
12 Kolenar ruk kom kaelongtok mang nguk, tete mut her vaik kun mnam o vnek ruk o koppeter he. Ii, mum sia kerkolkol vgum mar tok, vanangko mguak or kam senkrip kim mar enangthe, mar o vnek ruk o gunngae he ngat gnua pagis kim muk.
13 Parem ko, mguak kle va ksirei tete mang ngar, ko muma tuur mnam o vnek ruk e Kristus tkerkolkol vgum mar her tok kat arhe. Ii, mguak sirei tete tok, he nang koknaik a sirei to endo kam pis alaut he kerngorom muk koknaik kat ko E Nut nak khenam e Kristus kla mmok ma mmok mnam a kolkha to nak kta pis mnam.
14 Ii, va enangko muma lol o vnek vgum o mia ko ngma kerrereng nguk mang ko mum kor mnam muk mang e Kristus ka munik he kmokpom kar, va muta lgekol he, ekam ko E Nunu A Totur ther viging nguk he, he nam kaenkrovgem muk. Va her E Nunu A Totur to kat arhe endo E Nut tmeng ngang nguk orom kla mmok.
15 Enangthe mupa kerkolkol vgum o vnek tok, mguak or kam kerkolkol vgum o vnek ekam ko muk o ngairivik msim, va o ngauruvik, i o ekam o gi vrong kerkeknen akuruk kat. Va a keknen to kam toop kim o mia ngartaro tgoluk kat, va mguak or kam kerkolkol vgum o vnek ekam a kerkeknen to endo tok kat.
16 Vanang, ani mhel to na kerkolkol vgum o vnek ekam ko tkor mnam en mang Endo E Nut Thim Orom Ka Msasaen he kmokpom kar, va en nak or kam leep. Parem ko, en nak kle kanprim E Nut ha, ko a mhel to endo ta sir orom Endo E Nut Thim Orom Ka Msasaen ka munik tok arhe.
17 Ii, mguak kanprim E Nut enang tok, ekam ko a her venloot ta tete arhe to E Nut kmelha kam momngan kar o mia, va ner kaelha orom ka valngan mruo na. Va enangthe E Nut ner lua mnang ngor ruk ngot mi kut kor mnam mor mang a knovvur kam mon a kapnes ngang ngor pum nguaro kerkeknen, to ner le ho mi ktua kernonho hak ngang o mia ruk ngat si kol a re to mang e Yesus, nang kle kael ngaro yaik ngang he lo kor mnam mar mang.
18 Va
“Enangthe ta koppet ngang endruk E Nut tmur mon mar la mmok ko pum kalo keik, he E Nut kam susulgim mar, va ner kle ho mi ktua kernonho hak ngang endruk ngat lo kor mnam mar mang E Nut, nang kle gia plong kaeharom o kerkeknen.”
19 He ekam tok, endruk E Nut tmi kut svil mar kam kerkolkol vgum o vnek ekam o mia, mar ngak kael mar mruo ko maktiegom Endo tkueng ngar, Endo nam lo vur korim mar hak. Ii, ngak kael mar ko maktiegom En to le kaeharom o keknen ruk lyar mekam mekam.