11
وَكِلِقٍ
1 تَالِ ندٍيٍ نَن يِ كِ؛
شَ عِ تَامِ وٌلِ يٍ مَ،
عِ قَمَ نّ عَ مَسْتْدٍ لْشْي ندٍ.
2 عِ شَ عِ شَ سْتْسٍ تَشُ مِشِ سٌلٌقٍرٍ رَ، شَ نَ مُ عَ رَ، مِشِ سٌلٌمَسَشَن،
بَرِ مَ عِ مُ عَ كٌلٌن حَشَنكَتّ نَشَن قَمَ دُنِحَ لِدٍ.
3 شَ نُشُي رَقٍشِ يٍ رَ،
تُنّ قَمَ نّ بِرَدٍ بْشِ مَ.
شَ وُرِ بِرَ يِرٍ قَنيِ مَ، شَ عَ بِرَ كْولَ مَ،
عَ لُمَ نَا نّ.
4 مِشِ يٌ بْنبْ قٌيٍ رَبّنقٍ رَ، نَ مُ سَنسِ سِمَ.
مِشِ يٌ بْنبْ نُشُي مَتٌقٍ رَ، نَ مُ قَمَ سَنسِ شَبَدٍ.
5 عِ مُ حّنفِ نُن شْرِيٍ رَقَلَ كِ كٌلٌن قُرِ فِنّ قُرِ كُي،
عِ مَن مُ عَلَ دَالِ مَنفّ شَ وَلِ قَن كٌلٌن.
6 عِ شَ وَكِلِ كٍلِقٍ فّيسّفّ هَن نُنمَرٍ سَنسِ سِقٍ رَ،
بَرِ مَ عِ مُ عَ كٌلٌن عِ شَ وَلِ مُندُن قَمَ سْونّيَدٍ.
7 نَءِيَلَنيِ تٌقٍ حْشُن.
8 عَ لَنمَ مِشِ شَ سّيوَ عَ شَ سِمَيَ رَ،
كْنْ عَ نَشَ نّيمُ دِ مِ مَ نَشَن نُ نَ عَ شَ سِمَيَ كُي.
قٍ نَشَن بِرِن قَمَ، قٍ قُقَقُ نَ عَ رَ.
9 قٌنِكٍ، عِ شَ حّلّشِن عِ شَ قٌنِكٍيَ كُي،
عِ سٌندٌنيِ شَ سّيوَ عِ شَ قٌنِكٍيَ وَشَتِ كُي.
عِ شَ بِرَ عِ بْحّ نُن عِ وَشْنقٍ قْشْ رَ،
كْنْ عِ شَ عَ كٌلٌن عَ عَلَ عِ مَكِيتِمَ نّ نَ بِرِن مَ.
10 نَ كُي كْنتْقِلِ مَكُيَ عِ رَ،
تْورّ كٍرِ عِ قْشْ رَ.
قٌنِكٍيَ قِندِشِ قٍ قُقَقُ نَن نَ.