12
سَيَمَلٍكّ دَنفِ سَلِ
1 عَلَتَلَ نَشَ عَ مَسٍن مُنسَ نُن هَرُنَ بّ مِسِرَ بْشِ مَ،
2 «يِ كِكٍ نَشَن يَ، يِ نَن قِندِ مَ وٌ بّ حّ كِكٍ سِنفٍ رَ.
3 وٌ شَ عَ قَلَ عِسِرَيِلَ حَمَ بِرِن بّ، يِ كِكٍ شِ قُ، دٍنبَيَ يٌ دٍنبَيَ شَ يّشّي كٍرٍن سْتْ.
4 شَ دٍنبَيَ ندٍ شُرُن، عٍ مُ نْمَ نَ رَ، عٍ شَ كَقُ عٍ دْشْ بٌورٍ ندٍيٍ مَ عَلَكٌ يّشّي كٍرٍن شَ عٍ بِرِن نَلِ.
5 نَ يّشّي شَ قِندِ شّمّ رَ، نَشَن بَرَ حّ كٍرٍن سْتْ، لَنيُرُ يٌ مُ نَشَن مَ. شَ نَ مُ عَ رَ، وٌ نْمَ سِ قَن نَوَلِدٍ.
6 وٌ شَ عَ رَفَتَ هَن نَ كِكٍ شِ قُ نُن نَانِ. نَ لْشْي عِسِرَيِلَ دٍنبَيَ بِرِن شَ عٍ فبٍ كْن نَشَبَ سٌفٍ دُلَ تّمُي.
7 وٌ شَ عَ وُلِ مَسٌ نَادّ فبَنيِ نُن عَ سّيتِيٍ مَ، عَ دٌنمَ بَنشِ نَشَن كُي.
8 نَ سُبٍ شَ فَن تّ رَ، وٌ شَ عَ دٌن نَ كْي رَ تَامِ لّبِنِتَرٍ نُن بُرّشّ شْنّ رَ.
9 وٌ نَشَ عَ دٌن عَ فَنتَرٍ رَ، وٌ نَشَ عَ حِن يٍ رَ. وٌ شَ عَ بِرِن فَن عَ قَنيِ رَ بٍينُ وٌ شَ عَ عِشَبَ. عَ شُنيِ، عَ سَنيِيٍ، نُن عَ قُرِنفّيٍ شَ فَن تّمُي كٍرٍن.
10 نَ سٍسٍ نَشَ شِ هَن فّيسّفّ. شَ ندٍ لُشِ، وٌ شَ نَ وٌلِ تّ شْورَ.
11 وٌ شَ عَ دٌن وٌ تَفِ عِشِرِشِ، وٌ شَ سَنكِرِيٍ سٌشِ وٌ سَنيِيٍ، عَ نُن وٌ شَ يِسُشُوُرِ سُشُشِ وٌ بّلّشّ رَ. وٌ شَ عَ دٌن مَقُرٍن مَقُرٍن. عَلَتَلَ شَ سَيَمَلٍكّ دَنفِ سَلِ سّرّشّ نَ عَ رَ.»
12 «نَ كْي رَ، ﭑ مِسِرَ بْشِ عِسَمَ نّ، ﭑ دِ سِنفٍ بِرِن قَشَ مِشِيٍ نُن شُرُ سٍيٍ يَ مَ. ﭑ مِسِرَ شَ عَلَيٍ حَشَنكَتَمَ نّ. ﭑ تَن نَن عَلَتَلَ رَ.
13 ﭑ نَ نَ وُلِ تْنشُمَ تٌ وٌ شَ نَادّيٍ مَ، ﭑ دَنفِمَ نّ مّننِ شُن مَ. كَسَرّ يٌ مُ وٌ لِمَ، ﭑ مِسِرَ بْشِ رَتْنمَ تّمُي نَشّ.»
14 «نَ لْشْي شَ قِندِ سَلِ شُنفبٍ نَن نَ وٌ بّ عَلَتَلَ شَ بِنيّ بُن مَ. وٌ شَ نَ سَلِ رَبَ حّ يٌ حّ عَلَتَلَ شَ يَامَرِ كِ مَ.
15 نَ سَلِ وَشَتِ وٌ شَ تَامِ لّبِنِتَرٍ دٌن شِ سٌلٌقٍرٍ بُن مَ. سَلِ قْلّ لْشْي، وٌ شَ لّبِنِ بِرِن نَمِنِ وٌ شَ بَنشِيٍ كُي. مِشِ يٌ نَشَن تَامِ لّبِنِ دَاشِ دٌنمَ نَ شِ سٌلٌقٍرٍ بُن مَ، نَ كَنيِ شَ رَ مِنِ عِسِرَيِلَ حَمَ يَ مَ.
16 نَ سَلِ لْشْي سِنفٍ نُن نَ سَلِ لْشْي سٌلٌقٍرٍ ندٍ، وٌ شَ وٌ مَلَن عَلَتَلَ شَ بِنيّ بُن مَ. نَ لْشْي قِرِنيِيٍ، وٌ نَشَ وَلِ يٌ رَبَ بَقٍ دٌنسٍ رَقَلَقٍ رَ.»
17 «وٌ شَ يِ تَامِ لّبِنِتَرٍ سَلِ رَبَ، بَرِ مَ ﭑ وٌ شَ حَمَ رَ مِنِ مِسِرَ بْشِ رَ نَ لْشْي نّ. ﭑ بَرَ وٌ يَمَرِ وٌ شَ يِ سَلِ رَبَ حّ يٌ حّ عَبَدَن.
18 كِكٍ سِنفٍ، شِ قُ نُن نَانِ، نُنمَرٍ قْلْ تّمُي، وٌ نَشَ تَامِ يٌ دٌن بَقٍ تَامِ لّبِنِتَرٍ رَ هَن عَ شِ مْشْحّن نُن كٍرٍن، عَ نُنمَرٍ تّمُي.
19 نَ شِ سٌلٌقٍرٍ بُن مَ، لّبِنِ يٌ نَشَ تٌ وٌ شْنيِ، بَرِ مَ شْحّ نُن عِسِرَيِلَكَ بِرِن نَشَن لّبِنِ دٌنمَ نَ وَشَتِ بُن مَ، عَ رَ مِنِمَ نّ عِسِرَيِلَ حَمَ يَ مَ.
20 وٌ نَشَ تَامِ لّبِنِ دَاشِ دٌن دّدّ.»
21 مُنسَ نَشَ عِسِرَيِلَ قٌرِ بِرِن شِلِ، عَ عَ قَلَ عٍ بّ، «وٌ شَ سِفَ شُرُ سٍ ندٍ سْتْدٍ وٌ شَ دٍنبَيَيٍ بّ. وٌ شَ عٍ كْن نَشَبَ سَيَمَلٍكّ دَنفِ سَلِ سّرّشّ رَ.
22 وٌ نَ فّ شُرُ سٍ كْن نَشَبَدٍ، وٌ شَ عَ وُلِ مَسٌ نَادّ فبَنيِ نُن نَادّ سّيتِيٍ مَ هِسٌثِ بُرّشّ رَ. مِشِ يٌ نَشَ مِنِ عَ شَ بَنشِ كُي هَن فّيسّفّ.
23 عَلَتَلَ نَ مِسِرَ بْشِ عِسَ دِ سِنفٍ قَشَقٍ رَ، عَ دَنفِمَ نّ بَنشِيٍ شُن مَ، وُلِ نَ نَشٍيٍ نَادّ فبَنيِ نُن عَ سّيتِيٍ مَ. عَ مُ تِنمَ كَنَرِ يٌ شَ سٌ وٌ شْنيِ.
24 وٌ نُن وٌ شَ دِيٍ شَ يِ يَامَرِ رَتِنمّ حّ يٌ حّ عَبَدَن.
25 وٌ نَ سٌ بْشِ كُي عَلَتَلَ نَشَن لَايِدِشِ وٌ بّ، وٌ شَ يِ سَلِ رَبَ عَ كِ مَ.
26 وٌ شَ دِيٍ نَ وٌ مَشْرِن، ‹يِ سَلِ مُنسٍ مَسٍنمَ وٌن بّ،›
27 وٌ شَ عٍ يَابِ، ‹سَيَمَلٍكّ دَنفِ سَلِ سّرّشّ نَن عَ رَ. وٌن نَ رَبَمَ عَلَتَلَ بّ نَشَن دَنفِ عِسِرَيِلَكَيٍ شَ بَنشِيٍ شُن مَ مِسِرَ، عَلَكٌ عٍ شَ رَتَنفَ، مِسِرَكَيٍ تَن شَ قَشَ.›»
عِسِرَيِلَ حَمَ نَشَ عَ سُيِدِ عَلَتَلَ بّ.
28 عِسِرَيِلَكَيٍ نَشَ نَ يَامَرِ رَتِنمّ عَلْ عَلَتَلَ عَ مَسٍنشِ مُنسَ نُن هَرُنَ بّ كِ نَشّ.
مَنكَنّ قُ ندٍ؛ دِ سِنفٍ قَشّ
29 كْي تَفِ عَلَتَلَ نَشَ دِ سِنفٍ بِرِن قَشَ مِسِرَ بْشِ كُي، كٍلِقٍ قِرَوُنَ كِبَنيِ كَنيِ شَ دِ سِنفٍ مَ، عَ سَ دْشْ فٍيلِمَنِ شَ دِ سِنفٍ رَ. عَ نَشَ شُرُ سٍ شَ دِ سِنفٍ قَن بِرِن قَشَ.
30 نَ كُي قِرَوُنَ نَشَ كٍلِ كْي رَ، عَ تَن، عَ شَ كُنتِفِيٍ، نُن مِسِرَكَيٍ بِرِن، عٍ قَ عٍ وَ شُي رَتٍ، بَرِ مَ بَنشِ كٍرٍن مُ لُ قَشّ مُ تِ دّننَشّ.
31 نَ كْي رَ قِرَوُنَ نَشَ مُنسَ نُن هَرُنَ شِلِ، عَ عَ قَلَ عٍ بّ، «وٌ نُن عِسِرَيِلَكَيٍ، وٌ مِنِ ﭑ مَ حَمَ يَ مَ. وٌ سِفَ، وٌ سَ عَلَتَلَ بَتُ، عَلْ وٌ نُ وَ مَ عَ شْن مَ كِ نَشّ.
32 وٌ شَ وٌ شَ شُرُ سٍيٍ شَنِن، عَلْ وٌ عَ قَلَشِ كِ نَشّ. وٌ سِفَ! وٌ شَ دُبَ ﭑ قَن بّ.»
33 مِسِرَكَيٍ نُ فبَتَشِ عِسِرَيِلَكَيٍ شَ سِفَ. عٍ نُ عَ قَلَ، «شَ عٍ مُ سِفَمَ، وٌن بِرِن قَمَ نّ سْنتْدٍ!»
34 نَ نَن عَ رَ عِسِرَيِلَكَيٍ نَشَ تَامِ رَ مُلَنشِ مَقِلِن عٍ شَ دُفِيٍ كُي، بٍينُ تَامِ شَ تٍ. عٍ نَشَ تَامِ نُن تَامِ رَ مُلَنسٍ دْشْ عٍ شُن مَ، عٍ قَ سِفَ.
35 عِسِرَيِلَكَيٍ نَشَ فبٍتِ، شّيمَ، نُن دُفِيٍ مَكُلَ مِسِرَكَيٍ مَ عَلْ مُنسَ عَ قَلَ عٍ بّ كِ نَشّ.
36 عَلَتَلَ نَشَ عَ رَفِرِ مِسِرَكَيٍ شَ تِن عِسِرَيِلَكَيٍ وَشْنقٍ رَ. نَ كُي عِسِرَيِلَكَيٍ نَشَ سٍ فبٍفبٍ سْتْ مِسِرَكَيٍ يِ رَ.
عِسِرَيِلَكَيٍ مِنِقٍ مِسِرَ
37 عِسِرَيِلَكَيٍ نَشَ كٍلِ رَ مٍسٍسِ، سِفَقٍ سُكْتِ. شّمّ وُلُ كّمّ سٍننِ نُ نَ، بَقٍ فِنّيٍ نُن دِ مّدِيٍ رَ.
38 مِشِ فبّتّيٍ قَن نَشَ بِرَ عٍ قْشْ رَ، عَ نُن فْورّ فبٍفبٍ مْولِ بِرِن.
39 عٍ نَشَ تَامِ فَن، نَ تَامِ لّبِنِتَرٍ رَ مُلَنشِ رَ، عٍ قَشِ نَشَن نَ عٍ شُن مَ كٍلِقٍ مِسِرَ. نَ تَامِ مُ نُ تٍشِ، بَرِ مَ مِسِرَكَيٍ تٌ عٍ كٍرِ، عٍ مُ نْ قَندّ رَقَلَدٍ.
40 عِسِرَيِلَكَيٍ نُ بَرَ حّ كّمّ نَانِ حّ تٌنفٌ سَشَن نَبَ مِسِرَ.
41 نَ حّ كّمّ نَانِ حّ تٌنفٌ سَشَن حْن لْشْي يَتِ، عَلَتَلَ شَ حَمَ بِرِن مِنِ مِسِرَ بْشِ رَ نَ نّ.
42 عَلَتَلَ تٌ نَ كْي رَدَنفِ عِسِرَيِلَ حَمَ رَ مِنِقٍ رَ مِسِرَ، عَ لَنمَ عِسِرَيِلَكَيٍ بِرِن شَ نَ كْي شُنفبِلٍنيِ رَدَنفِ عَلَتَلَ مَتْشْقٍ رَ حّ يٌ حّ.
43 عَلَتَلَ نَشَ يِ سّرِيّ سٌ مُنسَ نُن هَرُنَ يِ رَ سَيَمَلٍكّ دَنفِ سَلِ شَ قٍ رَ، «مِشِ يٌ نَشَ نَ سّرّشّ دٌن نَشَن مُ قِندِشِ عِسِرَيِلَكَ رَ.
44 وٌ شَ كٌنيِ سُننَشِيٍ نْمَ عَ دٌندٍ،
45 كْنْ وٌ شَ وَلِكّ نَشٍيٍ كٍلِشِ يِرٍ فبّتّ، عٍ نَشَ عَ دٌن.
46 نَ سّرّشّ شَ دٌن بَنشِ نَن كُي، وٌ نَشَ عَ سُبٍ شَنِن تَندٍ، وٌ نَشَ عَ شْرِ يٌ فِرَ.
47 عِسِرَيِلَ حَمَ بِرِن شَ سَيَمَلٍكّ دَنفِ سَلِ رَبَ.
48 شَ وٌ شَ شْحّ ندٍ وَ مَ سَيَمَلٍكّ دَنفِ سَلِ رَبَقٍ عَلَتَلَ شَ بِنيّ بُن مَ، قٌ عَ شَ شّمّ بِرِن سُننَ عَ شَ دٍنبَيَ كُي. شَ عَ بَرَ نَ رَبَ، عَ نْمَ نَ سَلِ رَبَدٍ عَلْ عِسِرَيِلَكَيٍ. كْنْ سُننَتَرٍيٍ مُ نْمَ عَ دٌندٍ.
49 لَسِرِ نُن شْحّ بِرِن نَ نَ سّرِيّ بُن مَ.»
50 عِسِرَيِلَكَ بِرِن نَشَ عَ رَبَ، عَلْ عَلَتَلَ مُنسَ نُن هَرُنَ يَمَرِشِ كِ نَشّ.
51 نَ لْشْي يَتِ، عَلَتَلَ نَشَ عِسِرَيِلَكَيٍ رَ مِنِ مِسِرَ بْشِ رَ، عٍ لَنشُندّ كِ مَ.