15
سَنسِ بِلِ نُن عَ سَلٌنيِيٍ
1 «ﭑ مِسَالِشِ وُرِ بِلِ نَن نَ، ﭑ بَبَ عَلَ نَن قِندِشِ عَ مّينِمَ رَ.
2 وُرِ بِلِ سَلٌنيِ نَشٍيٍ مُ بٌفِ رَ مِنِمَ ﭑ بّ، عَلَ عٍ سّفّمَ نّ. سَلٌنيِ نَشٍيٍ بٌفِمَ، عَلَ شَ عٍ مَفبَرَن، عَلَكٌ عٍ بٌفِ شَ فبٌ.
3 وٌ تَن نَشٍيٍ قِندِشِ نَ سَلٌنيِيٍ رَ، وٌ حَن بَرَ رَ سّنِيّن ﭑ مَ مَسٍنيِ سَابُي رَ.
4 وٌ لُ ﭑ مَ قٍ نّ، عَلْ ﭑ قَن لُمَ وٌ شَ قٍ كِ نَشّ. سَنسِ سَلٌنيِ مُ نْمَ بٌفِدٍ عَ يّتّ رَ شَ عَ مُ قَتُشِ سَنسِ بِلِ شَ مَ. وٌ قَن لُمَ نَ كِ نّ، شَ وٌ مُ لُ ﭑ مَ قٍ.
5 ﭑ تَن نَن نَ عَلَ شَ سَنسِ بِلِ رَ، وٌ قَن قِندِشِ نَ سَنسِ سَلٌنيِيٍ نَن نَ. نَشَن نَ لُ ﭑ مَ قٍ، ﭑ قَن لُ عَ شَ قٍ، عَ لُ نّ عَلْ سَنسِ سَلٌنيِ نَشَن عَ بٌفِ فبٍفبٍ رَ مِنِمَ. شَ وٌ نُن ﭑ تَن شَ مُ عَ رَ، وٌ تَن مُ نْمَ قٍقٍ رَ.
6 شَ نَشَن مُ لُ ﭑ مَ قٍ، عَ لُمَ نّ عَلْ سَنسِ سَلٌنيِ مَسّفّشِ نَشَن وْلّمَ، عَ شَرَ. وَلِكّيٍ نٍيٍ مَلَنمَ نّ، عٍ عٍ وْلّ تّ شْورَ، عٍ فَن.
7 شَ وٌ لُ ﭑ مَ قٍ، ﭑ مَ مَسٍنيِيٍ قَن لُ وٌ بْحّ مَ، وٌ نَ وَ قٍقٍ شْن، وٌ عَ مَشَندِ. عَ رَبَمَ نّ وٌ بّ.
8 ﭑ بَبَ مَتْشْي سْتْمَ، وٌ تَن نَ لُ عَلْ سَنسِ سَلٌنيِ نَشٍيٍ بٌفِمَ عَ قَنيِ رَ، وٌ عَ مَسٍن نَ وَلِ قَنيِيٍ كُي، عَ وٌ قِندِشِ ﭑ قْشِرَبِرّيٍ نَن نَ.
9 ﭑ بَبَ عَلَ ﭑ تَن شَنُشِ كِ نَشّ، ﭑ قَن وٌ شَنُشِ نَ كِ نّ. وٌ لُ ﭑ مَ شَنُنتٍيَ كُي.
10 شَ وٌ ﭑ مَ يَامَرِيٍ رَبَتُ، وٌ لُمَ ﭑ مَ شَنُنتٍيَ كُي، عَلْ ﭑ قَن لُشِ ﭑ بَبَ شَ شَنُنتٍيَ كُي كِ نَشّ، ﭑ تٌ عَ شَ يَامَرِيٍ رَبَتُشِ.»
11 «ﭑ يِ قٍيٍ مَسٍنشِ نّ وٌ بّ، عَلَكٌ ﭑ مَ سّيوّ شَ لُ وٌ بّ، وٌ شَ سّيوّ شَ كَمَلِ.»
12 «ﭑ مَ يَامَرِ قِندِشِ يِ نَن نَ؛ وٌ وٌ بٌرٍ شَنُ عَلْ ﭑ وٌ شَنُشِ كِ نَشّ.
13 شَ مِشِ عَ نِي قِ عَ شَنُنتٍنيِيٍ شَ قٍ رَ، شَنُنتٍيَ يٌ مُ نَ نَشَن دَنفِ نَ تَن نَ.
14 وٌ تَن قِندِشِ ﭑ شَنُنتٍنيِيٍ نَن نَ، شَ وٌ ﭑ مَ يَامَرِيٍ رَبَتُ.
15 ﭑ مُ قَ نْمَ عَ قَلَدٍ وٌ بّ ‹كٌنيِيٍ›، بَرِ مَ كٌنيِ مُ عَ كٌلٌن عَ مَرِفِ نَشَن يٌ رَبَقٍ. ﭑ تَن بَرَ عَ قَلَ وٌ بّ ‹ﭑ شَنُنتٍنيِيٍ›، بَرِ مَ ﭑ نَشَن بِرِن مّشِ ﭑ بَبَ رَ، ﭑ بَرَ وٌ رَكٌلٌن عَ بِرِن نَ.
16 وٌ تَن شَ مُ ﭑ سُفَندِ. ﭑ تَن نَن وٌ سُفَندِ، ﭑ وٌ قِندِ ﭑ مَ شّيرَيٍ رَ، وٌ شَ سَ لُ عَلْ سَنسِ سَلٌنيِيٍ نَشٍيٍ بٌفِمَ، وٌ سَ وَلِ قَنيِيٍ رَبَ نَشٍيٍ مُ كَنَمَ. نَ كُي، وٌ نَ قٍقٍ مَشْرِن بَبَ عَلَ مَ ﭑ تَن شِلِ رَ، عَ عَ سٌمَ نّ وٌ يِ.
17 ﭑ وٌ يَمَرِشِ نّ يِ قٍيٍ مَ، عَلَكٌ وٌ شَ وٌ بٌرٍ شَنُ.»
دُنِحَ عِسَ قْشِرَبِرّيٍ شْنقٍ
18 «شَ دُنِحَ وٌ شْن، وٌ شَ عَ كٌلٌن عَ ﭑ تَن نَن سِنفٍ شْن.
19 شَ وٌ قِندِ دُنِحَ مِشِيٍ نَن نَ نُ، وٌ رَقَنمَ نّ دُنِحَ مَ نُ، عَلْ عَ فبٍ مِشِيٍ. كْنْ دُنِحَ مِشِيٍ مُ وٌ رَ، بَرِ مَ ﭑ تَن بَرَ وٌ سُفَندِ عٍ يَ مَ. نَ نَن عَ تٌشِ، دُنِحَ وٌ شْنشِ.
20 وٌ شَ رَتُ وْيّنيِ مَ ﭑ نَشَن مَسٍن وٌ بّ، ‹كٌنيِ مُ دَنفِمَ عَ مَرِفِ رَ.› شَ عٍ بَرَ ﭑ تَن حَشَنكَتَ، عٍ وٌ قَن حَشَنكَتَمَ نّ. شَ عٍ ﭑ تَن شُي سُشُ، عٍ وٌ قَن فبٍ سُشُمَ.
21 عٍ يِ قٍ بِرِن نِيَمَ نّ وٌ رَ ﭑ تَن شِلِ شَ قٍ رَ، بَرِ مَ عٍ مُ ﭑ شّيمَ كٌلٌن.
22 شَ ﭑ مُ سَ قَ وْيّندٍ عٍ بّ نُ، عٍ مُ يُنُبِ سْتْمَ نُ. كْنْ يَكْسِ، عٍ مُ قَ نْمَ سٍسٍ قَلَدٍ نَشَن كِيتِ قَنمَ عٍ رَ.
23 نَشَن نَ ﭑ تَن شْن، عَ بَرَ ﭑ بَبَ قَن شْن.
24 شَ ﭑ مُ كَابَنَكٌي رَبَ عٍ تَفِ نُ نَشٍيٍ سِنفٍ مُ نُ رَبَ، عٍ مُ يُنُبِ سْتْمَ نُ. كْنْ يَكْسِ، عٍ بَرَ نَ بِرِن تٌ، عٍ مَن قَ ﭑ تَن نُن ﭑ بَبَ شْن.
25 كْنْ نَشَن سّبّشِ عٍ شَ سّرِيّ كِتَابُي كُي، قٌ عَ شَ كَمَلِ، عَ تٌ عَ مَسٍنشِ، ‹عٍ ﭑ شْنشِ نّ تُن.›»
26 «ﭑ سَابُي قَنيِ نَشَن شّيمَ وٌ مَ كٍلِقٍ بَبَ عَلَ يِرٍ، نَشَن قِندِشِ بَبَ عَلَ شَشِلِ رَ، نَشَن نْندِ مَكّنّنمَ، عَ تَن نَ قَ، عَ سٍيدٍ بَمَ نّ ﭑ مَ قٍ رَ.
27 وٌ قَن سٍيدٍ بَمَ نّ، بَرِ مَ وٌ نَ ﭑ قْشْ رَ كَبِ عَ قْلّ.»