4
يُدَيَ شَ فبَلٌي
1 عَلَتَلَ شَ مَسٍنيِ نَن يَ،
«عِسِرَيِلَ، شَ وٌ وٌ يّتّ رَفبِلٍن ﭑ مَ،
شَ وٌ قٍ رَتْنشِ بَ ﭑ يَ تٌدٍ رَ،
شَ وٌ مُ لِنتَن وٌ شَ كّوَلِ رَ،
2 شَ وٌ وٌ كَلِ عَلَتَلَ شِلِ رَ تِنشِنيِ نُن نْندِ رَ،
سِيٍ قَمَ نّ بَرَكَ نُن بِنيّ سْتْدٍ عَلَتَلَ سَابُي رَ.»
3 عَلَتَلَ شَ مَسٍنيِ نَن يَ شّمّيٍ بّ
نَشٍيٍ نَ يُدَيَ نُن دَرِ سَلَمُ؛
«وٌ شَ شّ نّينّ مَسّفّ،
وٌ نَشَ سَنسِ شْرِ سِ كُنسِ تُنبٍ شْورَ.
4 شّمّ نَشٍيٍ نَ يُدَيَ نُن دَرِ سَلَمُ،
وٌ شَ وٌ بْحّ سّنِيّن عَلَتَلَ بّ.
وٌ شَ قٍ حَاشِ بَ وٌ سٌندٌنيِ كُي،
عَلْ قٍ حَاشِ بَمَ وٌ مَ كِ نَشّ وٌ سُننَ تّمُي.
وٌ شَ نَ رَبَ عَلَكٌ ﭑ بْحّ نَشَ تٍ وٌ مَ،
ﭑ مَ شْنّ قَ وٌ فَن عَلْ تّ
نَشَن مُ نْمَ شُبٍندٍ وٌ شَ قٍ كٌبِ رَبَشِيٍ شَ قٍ رَ.
5 وٌ شَ يِ مَسٍنيِ تِ يُدَيَكَيٍ بّ،
وٌ مَن شَ عَ قَلَ دَرِ سَلَمُكَيٍ بّ.
وٌ شَ قٍرِ قٍ عِسِرَيِلَ يِرٍ بِرِن،
وٌ شَ عَ قَلَ وٌ شُي عِتٍشِ رَ،
‹وٌ شَ سٌ تَا مَكَنتَشِيٍ كُي.›
6 وٌ شَ عَ مَتْنشُمَ سِيٌنكَيٍ بّ عٍ شَ عٍ فِ،
عٍ نَشَ تِ كِرَ شْن مَ،
بَرِ مَ ﭑ نَ قَقٍ تْورّ نُن حَشَنكَتّ رَ كٍلِقٍ كْولَ مَ.
7 سِيٍ كَنَمَ بَرَ كِرَ سُشُ،
عَلْ يّتّ نَشَن مِنِمَ سُبٍ قٍندٍ.
عَ بَرَ كٍلِ عَ شْنيِ عَلَكٌ عَ شَ وٌ شَ بْشِ كَنَ.
وٌ شَ تَايٍ بِرِن قَمَ نّ كَنَدٍ،
مِشِ يٌ مُ لُمَ نَا.
8 نَ نَن عَ رَ وٌ لَنمَ وٌ شَ سُننُن دٌنمَ رَفٌرٌ وٌ مَ،
وٌ شَ سُننُن، وٌ شَ حْنقٍ رَبَ،
بَرِ مَ عَلَتَلَ شَ شْنّ مُ فبِلٍنمَ وٌ قْشْ رَ.»
9 عَلَتَلَ شَ مَسٍنيِ نَن يَ؛
«نَ لْشْي لِمَنِيَ بَمَ نّ مَنفّ نُن كُنتِفِيٍ يِ رَ.
سّرّشّدُبّيٍ نُن نَمِحْنمّيٍ دّيٍ عِشَرَ مَ نّ.»
10 ﭑ بَرَ عَلَ يَابِ،
«ﭑ مَرِفِ عَلَتَلَ،
مُنقٍ رَ عِ بَرَ عَ قَلَ عِ شَ حَمَ نُن دَرِ سَلَمُ بّ،
‹وٌ قَمَ بْحّسَ سْتْدٍ،›
كْنْ سَنتِدّفّمَ بَرَ فّ عٍ قَشَدٍ؟»
11 نَ تّمُي عَ قَمَ نّ عَ قَلَدٍ حَمَ نُن دَرِ سَلَمُ بّ،
«قٌيٍ بَرَ كٍلِ فبٍنفبٍرٍن يِرٍ.
عَ مُ قَمَ قٍ قَنيِ رَ،
عَ قَمَ ﭑ مَ حَمَ نَن تْورْدٍ.
12 عَ قِندِشِ قٌيٍ مَفَاشُشِ نَن نَ،
نَشَن كٍلِشِ ﭑ يِرٍ.
يَكْسِ ﭑ عٍ حَشَنكَتَمَ نّ.»
13 يَشُييٍ نَ قَقٍ عَلْ قٌيٍ بٍلٍبٍلٍ نَشَن كٍلِقٍ كٌورٍ مَ.
عٍ شَ سْورِ رَفِسٍيٍ لُمَ نّ عَلْ تُرُننَادّ.
عٍ شَ سٌي شُلُن عَلْ سّفّيٍ.
فبَلٌي بَرَ وٌن لِ، وٌن بَرَ هَلَكِ.
14 دَرِ سَلَمُ، وٌ وٌ بْحّ رَ سّنِيّن، عَلَكٌ وٌ شَ كِسِ.
كّوَلِ كٌبِ لُمَ وٌ بْحّ مَ هَن تّمُي مُندُن؟
15 دَنَكَيٍ بَرَ نَ فبَلٌي مَسٍنيِ تِ،
عٍقِرَ مِكَيٍ قَن بَرَ نَ قَلَ.
16 وٌ شَ سِيٍ رَ سِ، وٌ شَ دَرِ سَلَمُ قَن نَسِ،
يَشُييٍ نَ كٍلِقٍ يِرٍ مَكُيٍ نّ، عٍ نَ قَقٍ يُدَيَ تَايٍ كُي.
17 عَلَتَلَ شَ مَسٍنيِ نَن يَ؛
«عٍ بَرَ دَرِ سَلَمُ رَبِلِن
عَلْ شّ كَنتَمَيٍ شّ رَبِلِنمَ كِ نَشّ.
نَ قَمَ نّ دَرِ سَلَمُ لِدٍ بَرِ مَ عٍ بَرَ ﭑ مَتَندِ.
18 نَ قِندِشِ وٌ شَ وَلِ كٌبِ سَرٍ نَن نَ.
وٌ نَشَن نَبَشِ، نَ بَرَ فبِلٍن وٌ مَ عَ حَاشِ رَ،
هَن عَ وٌ سٌندٌنيِ سْشْ.»
19 ﭑ بْحّ قَن نَ تْورْقٍ.
ﭑ بَرَ سُننُن.
ﭑ مُ نْمَ مَدُندُدٍ،
بَرِ مَ ﭑ بَرَ سَرَيٍ نُن فٍرٍ شُي مّ قَ رَ.
20 عٍ عَ قَلَمَ فبَلٌي نَ قَقٍ،
بْشِ بِرِن بَرَ كَنَ.
ﭑ مَ كِرِ بَنشِيٍ بَرَ بِرَ كٍرٍن نَ،
لِنفِرَ يٌ مُ نَ ﭑ يِ رَ.
21 فٍرٍ تْنشُمَ عَ عِتِمَ هَن مُن تّمُي؟
فٍرٍ شُي مِنِمَ هَن مُن لْشْي؟
22 عَلَتَلَ نَشّ، «ﭑ مَ حَمَ شَشِلِ مُ نَ،
عٍ مُ ﭑ كٌلٌن،
عٍ لُشِ نّ عَلْ دِ لْننِتَرٍيٍ.
عٍ قٍ حَاشِ نَن فبَنسَن كٌلٌن،
كْنْ عٍ مُ قَتَ قٍ قَنيِ رَبَدٍ.»
23 ﭑ بَرَ لَامَتُنيِ تٌ يِ بْشِ شَ قٍ رَ.
سٍسٍ مُ لُمَ يِ بْشِ مَ،
هَلِ كٌورٍ مُ يَنبَمَ عَ مَ.
24 ﭑ بَرَ لَامَتُنيِ تٌ فٍيَيٍ شَ قٍ رَ.
فٍيَيٍ قَمَ نّ سّرّندٍ، تٍنتٍنيِيٍ رَ مَشَ.
25 ﭑ بَرَ لَامَتُنيِ تٌ نِمَسٍ شَ قٍ رَ.
مِشِ مُ لُمَ يِ بْشِ مَ سْنْن،
شْنِيٍ قَن بَرَ عٍ فِ.
26 ﭑ بَرَ لَامَتُنيِ تٌ يِ يِرٍ شَ قٍ رَ.
كَرٍ مٍلٍ فٍيَ قِندِ مَ نّ فبٍنفبٍرٍنيِ رَ،
تَا بِرِن قَمَ فَندٍ عَلَتَلَ نُن عَ شَ شْنّ شَ قٍ نَن نَ.
27 عَلَتَلَ بَرَ عَ مَسٍن،
«يِ بْشِ بِرِن حَشَنكَتَمَ نّ،
كْنْ ﭑ مُ عَ بِرِن شُن نَكَنَمَ.
28 نَ نَن عَ رَ يِ بْشِ نَ سُننُنيِ كُي، كٌورٍ بَرَ عِقْورْ.
ﭑ تَن نَن عَ رَفِرِشِ،
ﭑ مُ فبِلٍنمَ ﭑ مَ نَتّ قْشْ رَ.
29 فٍرٍ سٌي نَ قَ سٌي قَرِ، مِشِ بِرِن عٍ فِمَ نّ.
فٍرٍ سٌي نَ قَ تَنبّيٍ رَ، مِشِ يٌ مُ لُمَ تَا كُي.
ندٍيٍ عٍ فِمَ نّ وٌندِ يِرٍ، ندٍيٍ عٍ فِ فٍيَيٍ قَرِ.
مِشِ بِرِن كٍلِمَ نّ تَا كُي.
30 عِ تَن نَشَن شُن نَكَنَشِ، عِ نَ مُنسٍ رَبَقٍ؟
عِ وَ مَ عِ مَشِرِقٍ دُفِ قَنيِ رَ،
عِ وَ مَ كْنمَفٌرٍ شّيمَ دَاشِ رَفٌرٌقٍ عِ مَ،
عِ وَ مَ تٌقَن سٍ سَقٍ عِ يَ كِرِ مَ؟
عِ نَ نَ بِرِن نَبَقٍ عِ شَنُنتٍنيِيٍ بّ قُقَقُ،
بَرِ مَ عِ مُ رَقَن عٍ مَ سْنْن.
عٍ وَ مَ عِ قَشَقٍ تُن.
31 ﭑ بَرَ وَ شُي ندٍ مّ.
نَ وَ شُي لُشِ نّ عَلْ قُرِ فِنّ نَشَن نَ عَ شَ دِ سِنفٍ بَرِقٍ.
دَرِ سَلَمُ نَ سَيَ كِرَ شْن مَ، عَ نَ عَ قَلَقٍ،
‹عَ فبٍ مُ لُشِ سْنْن، قَشّتِيٍ شَ ﭑ نِي بَ.›»