5
يُنُبِ ندٍيٍ نُن عٍ شَ سّرّشّيٍ
1 «شَ مِشِ ندٍ سَ عَ مّ عٍ سٍيدٍيٍ شِلِمَ كِيتِ ندٍ مَ، كْنْ عَ فُندِ سٍيدٍيَشِ قٍ نَشَن مَ عَ مُ نَ قَلَ حَمَ بّ، نَ يُنُبِ لُمَ عَ شُن مَ.
2 شَ مِشِ دِن سٍ سّنِيّنتَرٍ رَ عَ مُ عَ كٌلٌن، عَلْ سُبٍ رَهَرَ مُشِ بِنبِ، شَ نَ مُ عَ رَ شُرُ سٍ سّنِيّنتَرٍ بِنبِ، شَ نَ مُ عَ رَ بُبُسٍ سّنِيّنتَرٍ بِنبِ، نَ مِشِ قَن قِندِ مَ نّ مِشِ سّنِيّنتَرٍ رَ، عَ يُنُبِ سْتْ نَ كُي.
3 شَ مِشِ ندٍ سَ دِن سٍ سّنِيّنتَرٍ رَ نَشَن كٍلِشِ عَدَ مَدِ قَتٍ مَ، عَ قَ لِ عَ مُ عَ كٌلٌن نَ تّمُي، شَ عَ سَ عَ كٌلٌن تّمُي نَشّ، عَ قِندِ مَ سّنِيّنتَرٍ رَ، عَ يُنُبِ سْتْمَ نَ كُي.
4 شَ مِشِ ندٍ سَ عَ كَلِ قُقَقُ، قٍ قَنيِ شَ نَ مُ عَ رَ قٍ حَاشِ رَ، عَ قَ نّيمُ نَ مَ، عَ نَ رَتُ نَ قٍ مَ تّمُي نَشّ، عَ قِندِ مَ سّنِيّنتَرٍ رَ، عَ يُنُبِ سْتْ نَ كُي.»
5 «نَشَن نَ يُنُبِ مْولِ رَبَمَ، عَ لَنمَ عَ شَ عَ تِ نَ رَ.
6 عَ شَ يّشّي فِنّ، شَ نَ مُ عَ رَ سِ فِنّ بَ يّتّ رَفبِلٍن سّرّشّ رَ ﭑ تَن عَلَتَلَ بّ. نَ كُي سّرّشّدُبّ يُنُبِ شَقَرِ سّرّشّ بَمَ عَ بّ، عَلَكٌ عَ شَ يُنُبِ شَ شَقَرِ.»
7 «شَ قّيرّ مُ نَ عَ يِ رَ نَ سّرّشّ شَ قٍ رَ، عَ شَ كٌلٌكٌندٍ قِرِن شَ نَ مُ عَ رَ فَنبّ قِرِن بَ سّرّشّ رَ ﭑ تَن عَلَتَلَ بّ. كٍرٍن شَ قِندِ يُنُبِ شَقَرِ سّرّشّ رَ، بٌورٍ شَ قِندِ سّرّشّ فَن دَاشِ رَ.
8 عَ شَ عٍ شَنِن سّرّشّدُبّ شْن، سّرّشّدُبّ شَ يُنُبِ شَقَرِ سّرّشّ نَن سِنفٍ بَ. عَ شَ عَ كْنيِ فِرَ، كْنْ عَ نَشَ عَ شُنيِ بَ عَ دّ عِ.
9 عَ عَ وُلِ ندٍ كَسَنمَ سّرّشّبَدٍ سّيتِ مَ، وُلِ نَشَن لُشِ، عَ نَ عِقِلِمَ سّرّشّبَدٍ لَنبَنيِ. يُنُبِ شَقَرِ سّرّشّ نَ عَ رَ.
10 سّرّشّدُبّ شَ نَ شْنِ قِرِن ندٍ بَ سّرّشّ فَن دَاشِ رَ عَ رَبَ كِ مَ. نَ كُي، سّرّشّدُبّ شُنسَرٍ سّرّشّ بَمَ عَ بّ عَ شَ يُنُبِ رَبَشِ شَ قٍ رَ، عَلَكٌ عَ شَ شَقَرِ.»
11 «شَ قّيرّ مُ نَ عَ يِ رَ كٌلٌكٌندٍ قِرِن، شَ نَ مُ عَ رَ فَنبّ قِرِن سْتْقٍ رَ، عَ شَ سَنسِ شْرِ دِنشِ كٌنبٌ يَ كٍرٍن نُن عَ تَفِ بَ يُنُبِ شَقَرِ سّرّشّ رَ. عَ نَشَ تُرٍ، شَ نَ مُ عَ رَ سُرَيِ سَ نَ قَرِ دٍ، بَرِ مَ يُنُبِ شَقَرِ سّرّشّ نَ عَ رَ.
12 عَ شَ نَ شَنِن سّرّشّدُبّ شْن مَ، سّرّشّدُبّ سُشُ كٍرٍن فَنمَ سّرّشّبَدٍ قَرِ تْنشُمَ رَ. عَ نَ رَبَمَ سّرّشّيٍ قَرِ نَشٍيٍ فَنمَ سّرّشّبَدٍ قَرِ، بَرِ مَ يُنُبِ شَقَرِ سّرّشّ نَ عَ رَ.
13 نَ كُي سّرّشّدُبّ شُنسَرٍ سّرّشّ بَمَ عَ بّ، عَلَكٌ عَ شَ يُنُبِ رَبَشِ شَ شَقَرِ. سَنسِ شْرِ دِنشِ نَشَن لُشِ عَ قِندِ مَ سّرّشّدُبّ نَن فبٍ رَ.»
14 عَلَتَلَ نَشَ عَ مَسٍن عَننَبِ مُنسَ بّ،
15 «شَ مِشِ ندٍ سَ سٍ ندٍ تٌنفٌ نَشَن قِندِشِ ﭑ تَن عَلَتَلَ فبٍ رَ، كْنْ عَ مُ عَ كٌلٌن عَ نَ يُنُبِ مْولِ رَبَشِ، عَ شَ يّشّي كٌنتٌنيِ بَ يّتّ رَفبِلٍن سّرّشّ رَ ﭑ تَن عَلَتَلَ بّ عَ شَ يُنُبِ شَ قٍ رَ. عَ مُ لَنمَ لَنيُرُ يٌ شَ لُ نَ يّشّي مَ، عَ سَرٍ قَن شَ لَن سَرٍ مَ نَشَن نَوَلِمَ هْرْ مْلِنفِرَ كُي.
16 عَ شَ نَ سٍ تٌنفٌشِ رَفبِلٍن سّرّشّدُبّ مَ، عَ مَن شَ كْبِرِ سَ نَ قَرِ. نَ قِندِ مَ كْبِرِ نَشَن نَ، عَ نَ سٍ سَرٍ نَن عِتَشُنمَ دْشْ سُولِ رَ، عَ قَ دْشْ كٍرٍن بَ عَ رَ، عَ نَ سٌ سّرّشّدُبّ يِ رَ. نَ كُي سّرّشّدُبّ شُنسَرٍ سّرّشّ بَمَ عَ بّ سِكْتّ رَ نَشَن قِندِ يّتّ رَفبِلٍن سّرّشّ رَ، عَلَكٌ عَ شَ يُنُبِ شَ شَقَرِ.
17 مِشِ نَشَن يُنُبِ رَبَمَ، عَ ﭑ تَن عَلَتَلَ شَ يَامَرِ ندٍ مَتَندِ، هَلِ عَ مُ عَ كٌلٌن، نَ بَرَ يُنُبِ سْتْ، قٌ عَ شَ نَ سَرٍ قِ.
18 عَ لَنمَ عَ شَ سِكْتّ بَ يّتّ رَفبِلٍن سّرّشّ رَ، لَنيُرُ مُ نَ نَشَن مَ، نَشَن سَرٍ لَنمَ سّرِيّ مَ. نَ كُي سّرّشّدُبّ شُنسَرٍ سّرّشّ بَمَ عَ بّ عَ شَ يُنُبِ شَ قٍ رَ، عَ نَشَن نَبَشِ عَ مُ عَ كٌلٌن، عَلَكٌ عَ شَ يُنُبِ شَ شَقَرِ.
19 نَ بَرَ قِندِ يّتّ رَفبِلٍن سّرّشّ رَ، بَرِ مَ عَ يُنُبِ سْتْ نّ ﭑ تَن عَلَتَلَ رَ.»
20 عَلَتَلَ نَشَ عَ مَسٍن عَننَبِ مُنسَ بّ،
21 «شَ مِشِ ندٍ سَ يُنُبِ سْتْ، عَ قٍ حَاشِ رَبَ ﭑ تَن عَلَتَلَ رَ، عَلْ عَ نفَشَكٍرٍنيِ مَدَشُقٍ سٍ ندٍ شَ قٍ رَ، نَشَن نُ بَرَ تَشُ عَ رَ، شَ نَ مُ عَ رَ عَ نَشَن مُحَ، شَ نَ مُ عَ رَ عَ نَشَن بَشِ عَ بٌورٍ يِ رَ قُنمَلَيَ رَ،
22 شَ نَ مُ عَ رَ سٍ لْيشِ عَ نَشَن تٌشِ، عَ قَ وُلٍ قَلَ نَ شَ قٍ رَ كَلِ رَ،
23 نَ يُنُبِ رَبَ مْولِ لَنمَ عَ شَ نَ سٍ مُحَشِ رَفبِلٍن. شَ عَ مُحَشِ نّ بَ، شَ عَ تَشُشِ نّ عَ رَ بَ، شَ سٍ لْيشِ نَ عَ رَ عَ نَشَن تٌشِ بَ،
24 شَ سٍ نَ عَ رَ وُلٍ قَلَ نَشَن مَ قٍ رَ كَلِ رَ، عَ شَ نَ رَفبِلٍن عَ كَنيِ مَ كٍرٍن نَ، عَ مَن شَ كْبِرِ سَ نَ قَرِ. نَ قِندِ مَ كْبِرِ نَشَن نَ، عَ نَ سٍ سَرٍ نَن عِتَشُنمَ دْشْ سُولِ رَ، عَ قَ دْشْ كٍرٍن بَ عَ رَ، عَ نَ سٌ نَ كَنيِ يِ رَ.
25 عَ مَن شَ يّشّي كٌنتٌنيِ شَنِن سّرّشّدُبّ يِرٍ يّتّ رَفبِلٍن سّرّشّ رَ عَلَتَلَ بّ. قِ يٌ نَشَ لُ نَ يّشّي مَ، عَ سَرٍ قَن شَ لَن سّرِيّ مَ.
26 نَ كُي سّرّشّدُبّ شُنسَرٍ سّرّشّ بَمَ عَ بّ ﭑ تَن عَلَتَلَ يَ عِ، عَلَكٌ عَ شَ يُنُبِ، عَ نَشَن نَبَشِ، نَ شَ شَقَرِ.»