28
مِشِ حَاشِ شَ فَاشُي
1 مِشِ حَاشِيٍ لُمَ نّ فَاشُي كُي،
عٍ عٍ فِمَ نّ هَلِ مِشِ مُ عٍ قْشْ رَ.
تِنشِنتْييٍ تَن مُ فَاشُمَ،
عٍ سُو سَ عَلْ يّتّ.
2 مَنفّ دِيٍ وُيَ حَمَ مَتَندِلَ يَ مَ،
كْنْ مَنفّ شَشِلِمَ قَتَ حَمَ رَشَندٍ.
3 سٍتَرٍ نَشَن عَ بٌورٍ سٍتَرٍيٍ تْورْ مَ،
نَ مَنِيَ تُنّ وُندٍ رَ نَشَن شّ كَنَمَ.
4 سّرِيّ مَتَندِ مِشِ حَاشِ مَتْشْمَ نّ،
سّرِيّ رَبَتُي تَن شْنْمَ نّ مِشِ كٌبِ مَ.
5 مِشِ حَاشِيٍ مُ سّرِيّ كٌلٌن،
كْنْ عَلَتَلَ قٍنمَيٍ عَ قَهَامُمَ نّ عَ قَنيِ رَ.
6 سٍتَرٍ تِنشِنشِ قِسَ بَننَ تِنشِنتَرٍ بّ.
7 سّرِيّ بَتُلَ قِندِشِ دِ شَشِلِ قَنيِ نَن نَ،
كْنْ وَ سَتَرٍ تَن عَ بَبَ رَيَافِمَ نّ.
8 مِشِ نَشَن عَ شَ نَاقُلِ شُن مَسَمَ رِبَ رَ،
عَ شَ بَننَيَ فبِلٍنمَ نّ كِنِكِنِنتٍ مَ.
9 مِشِ نَشَن تٌندِ مَ عَ تُلِ مَتِدٍ سّرِيّ رَ،
عَلَ مُ عَ شَ دُبَ سُشُمَ قٍوٌ.
10 مِشِ نَشَن تِنشِنتْييٍ رَتَنتَنمَ،
عَ بِرَ مَ عَ يّتّ كَن شَ فَنتَنيِ نَن كُي،
تِنشِنتْي تَن قَ كّ قَنيِ سْتْدٍ.
11 بَننَ مِشِ حْشْ عَ مَ عَ شَ لْننِ فبٌ،
كْنْ سٍتَرٍ شَشِلِمَ نْمَ نّ نَ كَنيِ رَ.
12 تِنشِنتْييٍ شُن نَ رَكٍلِ، حَمَ حّلّشِنمَ نّ،
كْنْ تِنشِنتَرٍ شُن نَ رَكٍلِ، حَمَ عَ نْشُنمَ نّ.
13 مِشِ نَشَن عَ شَ يُنُبِيٍ نْشُنمَ، عَ شَ قٍ مُ سْونّيَمَ،
كْنْ مِشِ نَشَن عَ تِمَ عَ شَ يُنُبِيٍ رَ، عَ فبِلٍن عٍ قْشْ رَ، عَلَ كِنِكِنِمَ عَ مَ.
14 سّيوّ نَ مِشِ بّ نَشَن فَاشُمَ عَلَ يَ رَ،
كْنْ بْحّ شْرْشْي كَنيِ لُمَ تْورّ نَن كُي.
15 مِشِ حَاشِ نَشَن حَمَ سٍتَرٍ يَمَرِ مَ،
عَ لُشِ نّ عَلْ يّتّ مَفَاشُشِ نُن وُلَءِ سُبٍ شَاحّ.
16 مَنفّ شَشِلِتَرٍ مِشِ تْورْ مَ نّ،
كْنْ مَنفّ نَشَن نَاقُلِ تِنشِنتَرٍ شْنمَ،
نَ سِمَيَ شْنكُيٍ سْتْمَ نّ.
17 مِشِ نَشَن عَ كٌلٌن عَ بْحّ كُي عَ قَشّ تِشِ،
نَ لُمَ عَ فِ رَ نّ هَن عَلِفِيَمَ.
مِشِ يٌ نَشَ نَ كَنيِ مَلِ.
18 مِشِ نَشَن حّرّ مَ تِنشِنيِ رَ، نَ كِسِمَ نّ،
كْنْ قِلَنكَقُي تَن بِرَ مَ نّ كٍرٍنيِ رَ.
19 مِشِ نَشَن عَ شَ بْشِ رَوَلِمَ، نَ بَلٌي سْتْمَ نّ،
كْنْ نَشَن بِرَ مَ قٍ قُقَقُ قْشْ رَ، نَ سٍتَرٍحَ نَن سْتْمَ.
20 مِشِ دُفُتّفّشِ بَرَكّ سْتْمَ نّ،
كْنْ نَشَن فبَتَمَ بَننَيَ رَ، عَ حَشَنكَتَمَ نّ.
21 عَ مُ لَن مِشِ شَ مِشِ رَقِسَ عَ بٌورٍ بّ،
كْنْ مِشِ ندٍ قٍ حَاشِ رَبَمَ تَامِ شُنتُنيِ شَ قٍ رَ.
22 مِلَنتٍ فبَتَمَ بَننَيَ رَ،
كْنْ عَ مُ عَ كٌلٌن عَ تْورّ نَن تُن سْتْمَ.
23 مِشِ نَشَن مَرَ سِ شْرْشْي قِمَ مِشِ ندٍ مَ،
نَ هِننّ نَن سْتْمَ دَنفِقٍ مِشِ رَ
نَشَن لُمَ وْيّن حْشُنمّ فبَنسَن قَلَ رَ مِشِيٍ بّ.
24 مِشِ نَشَن عَ بَبَ نُن عَ نفَ مُحَمَ،
عَ قَ عَ قَلَ «عَ مُ حَاشُ،»
نَ بَرَ قِندِ كَسَرَتِ رَ.
25 مِشِ نَشَن مِلَمَ هَرِفٍ مَ،
نَ قِندِ مَ فٍرٍ سٌي نَن نَ،
كْنْ نَشَن بَرَ عَ يّتّ تَشُ عَلَتَلَ رَ،
نَ حَن بَرَ هّيرِ فبٍفبٍ سْتْ.
26 مِشِ نَشَن لَشِ عَ يّتّ كَن شَشِلِ رَ،
نَ بَرَ قِندِ شَشِلِتَرٍ رَ،
كْنْ مِشِ نَشَن حّرّ مَ شَشِلِ قَنيِ رَ،
نَ كَنيِ كِسِمَ نّ.
27 مِشِ نَشَن سٍتَرٍ كِمَ، نَ مُ تْورْ مَ،
كْنْ نَشَن سٍتَرٍ كُمَمَ، نَ دَنكّ نَن سْتْمَ.
28 مِشِ حَاشِيٍ شُن نَ رَكٍلِ، حَمَ عَ نْشُنمَ نّ،
كْنْ مِشِ حَاشِيٍ نَ هَلَكِ، تِنشِنتْييٍ تَن شُن نَكٍلِمَ نّ.