23
परमप्रभु आ अरेशो लीशो लोव़
1 मिनु वोंइश मुर कली आल मथीब सेल्चा कली आ चारतीक ख्रोइश्शो बाक्त हना, परमप्रभु यावे आ ग्रुम्तीकेमी ओव़ने मचाप्ब। यसैया ५६:३-४; प्रेरित ८:२७
2 तेल्लेम पा थिश्शो आल परमप्रभु यावे आ ग्रुम्तीकेमी ओव़ने मचाप्ब। मेको आ १० पाला सम्म परमप्रभु यावे आ ग्रुम्तीकेमी ओव़चा मताइनीम। एज्रा ९:-; एज्रा १०:-
3 अम्मोनी नु मोआबी परमप्रभु यावे आ ग्रुम्तीकेमी ओव़ने मचाप्नीम। मेको आ १० पाला सम्म परमप्रभु यावे आ ग्रुम्तीकेमी ओव़चा मताइनीम। उत्पत्ती १९:३७-३८
4 मारदे हना गे इजीप्त रे ग्रूनीनु, मेकोपुकीमी जचा थोव़क नु ब्वाक्कु कुरशा इन कली ग्रुम्थ मपीम। मिनु मेकोपुकीमी यो इन कली सराप पचा, दे बेओर आ तौ बालाम मेसोपोटामीया आ नेक्था ङा अराम-नाहाराइम ङा पेथोर सहर रे क्येट गेशा ब्रेत्ताक्म। गन्ती २२:५-६
5 मो हना यो परमप्रभु यावे, इन परमप्रभुमी बालाम आ लोव़ मनेन। मेकोमी मेको सराप के आसीक सेल्तु। मारदे हना परमप्रभु यावे, इन परमप्रभुमी इन कली दाक्ताक्व।
6 मोपतीके गेपुकीमी गेनायो मोआबी नु अम्मोनी नु मगरीन, वारच मदुमीन। एज्रा ९:१२
7 मिनु गेपुकीमी एदोमी आन कली ग्रांग्रा मदित्चा। मारदे हना मेकोपुकी इन लोक्ब बाक्नीम। गेपुकीमी इजीप्ती आन कली ग्रांग्रा मदित्चा। मारदे हना गेपुकी मेको आन रागीम बाक्शो बाक्तीनी।
8 मेको आन युइ आन पाला रे परमप्रभु यावे आ ग्रुम्तीकेमी ओव़चा गेने चाप्नीनी।
लडाइ पाइब आन बाक्तीके
9 मिनु गेपुकी लडाइ पथ लनीनु, इन ताम्बुम नेल्ल मरिम्शो रे ङोन बाक्कीन।
10 मिनु इन दाते ङा वोंइश मुर का नाक्दोम ग्रांग्रा दितीके दुम्त हना, मेको बाक्तीके रे ङोन लचा माल्ब। मिनु लडाइ पाइब आन बाक्तीके मओव़चा। लेवी १५:१६-१८
11 मिनु मेको मुर नाक्नाक्दो चिक्सीशा, नां रिक्ची ना लेंशा आ बाक्तीके ओव़चा ताइब।
12 मिनु गेपुकी लडाइ पाइब आन बाक्तीक मेर ङाइक्तीके का सेल्चा माल्ब।
13 गेपुकी इन थोव़क नु दोतीक का यो बाक्चा माल्ब। ङाइक्चा कली लनीनु, पोव़ला दोशा, आगा ङाइश्शा नोले ख्री सुम्शा वोतीन।
14 मारदे हना इन कली प्रोंइचा नु इन जोरी सत्रु आन कली इन कली जिम्मा गेचा कली परमप्रभु यावे, इन परमप्रभु इन लडाइ पाइब आन बाक्तीकेम बाक्ब। मेकोमी इन कली इन जोरी सत्रु रे प्रोंइचा नु मेको आन कली इन गुइम गेब। मोपतीके इन बाक्तीके रिम्शो, आ खोदेंशो दुम्चा माल्ब। मिनु इन दातेमी ग्रांग्रा दित्चा ङा ताप्तु हना, इन बाक्तीक रे गाक्ब। लेवी २६:१२
प्रोक्शो मुर आन पर्बम शेंशो
15 मिनु वाइल का आ होव़प रे प्रोक्शा, इन बाक्तीकेम जाक्त हना, गेपुकीमी मेको कली लेंशा आ होव़प कली गेचा मदुम्ब।
16 मेको इन दातेमी आ दाक्शो सहरमी बाक्चा गेने। गेपुकीमी मेको कली श्येत मगेने। फिलेमोन १२-१६
17 मिनु इस्राएली आन तमी कि तौ मन्दीर ङा तेल्लेम पाइब दुम्चा मदुम्ब। होसे ४:१४; १राजा १४:२४; २राजा २३:७
18 वोंइश मुर, मीश मुर तेल्लेम पशो क्येट परमप्रभु यावे, इन परमप्रभु आ खिंम कबल खाप्चा कली चाक्चा मदुम्ब। मारदे हना मेको परमप्रभु यावे, इन परमप्रभु कली ग्रांग्रा बाक्ब। प्रकाश २२:१५
19 मिनु गेपुकीमी क्येट, जचा थोव़क नु मारेइ मारेइ जेर गेशो इन आंम लोक्ब रे मेको आ चाइक्ब मताक्चा। प्रस्थान २२:२४; लेवी २५:३६
20 अर्को रागी ङा मुर आन कली चाइक्ब गेपाइक्ने चाप्नीनी। तन्न इन लोक्ब आन कली जेर गेशा आ चाइक्ब मथाप्पाइक्चा। मिनु मेको टीतीनी हना, परमप्रभु यावे, इन परमप्रभुमी गे लचा चिक्शो इन के सेल्चा चिक्शो रागीमी इन कली आसीक गेब।
21 मिनु गेपुकीमी परमप्रभु यावे, इन परमप्रभु नु कसम जनीनु, मेको खाप्शा, थाप्चा कली मरिम्दीन। मारदे हना परमप्रभु यावे, इन परमप्रभुमी कसम खाप्शो कोव़चा दाक्ब। मो मपाइतीनी हना, गे पाप राइनीनी। गन्ती ३०:३
22 तन्न गेपुकी कसम मजाइतीनी हना, गे पाप मराइनीनी।
23 गेपुकीमी मार देंनी, मेको खाप्शा, पचा माल्नीनी। मारदे हना गे परमप्रभु यावे, इन परमप्रभु नु आंमान कसम जाइतीनी।
24 मिनु गेपुकी इन लोक्ब आ अङगुर रूमी ओव़तीनी हना, मरूनी सम्म सेक्शा ब्वने चाप्नीनी। तन्न कुरशा लाइक्चा मताइनीनी। मत्ती १२:१
25 मिनु गेपुकी इन लोक्ब आ बाली मीशो रूमी ओव़तीनी हना, जचा कली बाली सेक्चा ताइनीनी। तन्न रिक्चा चहिं मताइनीनी।