14
मूर्ति पूजा पाइब आन कली दोस
1 इस्राएल ङा खाल्पा का निक्शी जाक्शा, आं ङोंइती निस्साक्म। इजीकीएल २०:१
2 मिनु मेना परमप्रभु यावेमी आं कली लोव़ पाप्तु।
3 मार लोव़ पाप्तु देंशा हना “ए मुर, एको खाल्पापुकीम आन मूर्ति आन आन थुंम वोइश्शो बाक्तेक्म। मिनु मरिम्शो पा दाइल पांइसीतीक फुल्लु यो आन ङोंइती वोइश्शो बाक्नीम। मार, आन हिल्लो पशो लोव़ गो लेत्चा माल्नुङा, ङा?
4 मोपतीके गे मेको आन कली ‘परमप्रभु, परमप्रभु यावेमी इस्राएल आ खिं ङा मुर सुइमी मूर्ति आन थुंम वोइश्शा, आन मरिम्शो पा दाइल पांइसीतीक फुल्लु, आन ङोंइती वोइश्शा, आं लोव़ पाइब आन बाक्तीक जाक्तेक्म हना, गो, परमप्रभु यावेमी, मेको आन थुंम मूर्ति वोइश्शा जाक्शो मुर आन कली लोव़ लेत्नुङमी।
5 मिनु मेको मूर्तिम पतीके इस्राएल आ खिं ङा मुरपुकीम आं कली प्रोंइतेक्म। मो हना यो आन थुं फाइश्शा, आं गे लेत्ने चाप्नुङा, कों?’
6 मोपतीके इस्राएल आ खिं ङा मुर आन कली ‘परमप्रभु, परमप्रभु यावेमी इन ग्रांग्रा दिशो गेय नेल्ल प्रोंइशा, इन मूर्ति रे पा लेश्शा आं गे जाक्कीन’ देंशो बाक्ब, दे माइक्मी।
7 इस्राएल आ खिं ङा मुर सुइ नु मेकेर बाक्ब अर्को रागी ङा मुर सुइमी आं कली प्रोंइशा, मूर्ति आन थुंम वोइश्शा, आन मरिम्शो पा दाइल पांइसीतीक फुल्लु आन ङोंइती वोइश्शा, आं लोव़ पाइब आन बाक्तीक जाक्तेक्म हना, गो, परमप्रभु यावेमी, मेको आन थुंम मूर्ति वोइश्शा जाक्शो मुर आन कली लोव़ लेत्नुङमी।
8 गो मेको आन कली सजाइ गेनुङमी। मिनु गो मेको मुर कली कोंइतीक नु शुक्शी पाइक्तीक सेल्नुङ। गो मेको कली आं मुर आन दाते रे तिल्नुङ। मिनु गोन परमप्रभु यावे नङ, दे तुइक्चा माल्नीनी।
9 मिनु सुइ परमप्रभु यावे आ लोव़ पाइबम आ लोव़ मार बाक्बा, दे हिल्लो पाइब आन कली आंमा थुंम मिम्शा लोव़ पाप्तु हना, गो मेको कली मोदेंशो पपाइक्ता। मिनु गो मेको कली आं गुइ दिंशा, सजाइ गेशा आं मुर इस्राएली आन दाते रे क्याम्नुङ। १राजा २२:२०-२३
10 मेको निम्फाम आस मरिम्शो पशो आ पर्बम सजाइ ताइनीस। आं लोव़ पाइब नु आं लोव़ हिल्लो पाइब, निम्फा आस सजाइ उइक्थ उइक्थ दुम्ब। इजीकीएल ३:१७-२०
11 मिनु इस्राएल आ खिं ङा मुर गेनायो आं रे पा बरलेशा मलाइनीम। मिनु मेकोपुकीम गेनायो हेंथे पा आंम कली ग्रांग्रा दिशो मसेल्सीनीम। मिनु मेकोपुकी आं मुर दुम्नीम। गो मेको आन परमप्रभु दुम्नुङ, दे परमप्रभु, परमप्रभु यावेमी देंशो बाक्ब” देंत। इजीकीएल ११:२०
परमप्रभुम गेशो सजाइ ठीक बाक्ब
12 मिनु परमप्रभु यावेमी आं कली लोव़ पाप्तु।
13 मार लोव़ पाप्तु देंशा हना “ए मुर, तेकोइ रागी ङा मुर आन थुं फाइश्शा आं कली प्रोंइशा अर्को आ नोले खोइक्तेक्म हना, गो मेको आन पर्बम आं गुइ दिंशा आन जचा थोव़क खतम पोक्नुङ। अन्काल चाक्शा, मेकेर ङा मुर नु बी ब्यफ, क्यारश भेडा नेल्ल आन कली साइक्नुङमी। इजीकीएल ४:१६
14 मेकेर नोआह, दानीएल नु अय्युब सांफा बाक्तेक्म हना यो, मेकोम आन ठीक पतीकेम आंमा ला ब्रोंइचा ताम वा, दे परमप्रभु, परमप्रभु यावेमी देंशो बाक्ब” देंत। येरमीया १५:१
15 गो मोदेंशो रागी कली खतम सेल्चा कली ब्वाकी ङा जन्तु सोइक्ताक्ङमी हना, जन्तुपुकीम पतीके मेको रागी रे सुइ एर ओंथ पने मचाप्तेक्म हना,
16 मिनु मेको मुर सां मेकेर बाक्तेक्म हना, गो आं ब्रोंइशा बाक्शो खोदेंशो पा, मेकोम आन तमी तौ आन कली प्रोंइने मचबेम वा। मेकोपुकी आंमा ला ब्रोंइम वा। मिनु मेको रागी गोरशो रागी दुम वा।
17 मिनु परमप्रभु, परमप्रभु यावेमी “गो रागी आ पर्बम तरवार सोइश्शा, मेको तरवार कली ‘मुर नु बी ब्यफ, क्यारश भेडा नेल्ल साइक्मी’ देंती हना,
18 मिनु मेको मुर सां मेकेर बाक्तेक्म हना यो, गो आं ब्रोंइशा बाक्शो खोदेंशो पा मेकोम आन तमी तौ आन कली प्रोंइने मचबेम वा। मेकोपुकी आंमा ला ब्रोंइम वा।
19 मिनु गो मेको रागीम मुर बेक्तीक रोइ सोइश्शा, हुश ख्राक्श पोक्शा, मेकेर ङा मुर नु बी ब्यफ, क्यारश भेडा साइश्शा आं गाइश्शो मोइक्ता हना,
20 मिनु मेकेर नोआह, दानीएल नु अय्युब बाक्तेक्म हना यो, गो आं ब्रोंइशा बाक्शो खोदेंशो पा मेकोम आन तमी तौ आन कली प्रोंइने मचबेम वा। मेको आन ठीक पतीकेम आंमा ला ब्रोंइम वा” देंत।
21 परमप्रभु, परमप्रभु यावेमी “गो यरूसलेमम आं ४ ओटा हिंचा ङा श्येत तरवार, अन्काल, ब्वाकी ङा जन्तुपुकी नु मुर बेक्तीक रोइ सोइश्शा मेकेर ङा मुर नु बी ब्यफ, क्यारश भेडा आन कली साइक्तामी हना, सुइ मब्रोंइम वा। इजीकीएल ५:१७; लेवी २६:१६-२५; येरमीया १५:३; प्रकाश ६:८
22 मो हना यो मुर आन दाते ङा का निक्शी ब्रोंइशा बाक्नीम। मेको आं तमी तौ ग्रूशा इ बाक्तीक जाक्नीम। मिनु गे मेको आन मिम्शो नु आन पशो ताइनेवे। मिनु गो यरूसलेम कली श्येत गेशो नु क्याम्शो आ पर्बम इ थुं नाइक्नेवे।
23 मेको आन मिम्शो नु आन पशो तशा, मेकोपुकीम इ थुं नाइक्पाइक्नीम। मिनु गो मेकेर मार मार पङा, मेको नेल्ल मोशीन मपङ, दे तुइक्नेवे” दे परमप्रभु, परमप्रभु यावेमी देंत।