18
बेक्चा नु ब्रोंइचा आंम गुइम बाक्ब
1 परमप्रभु यावेमी आं कली लोव़ पाप्तु।
2 मार लोव़ पाप्तु देंशा हना “इस्राएल रागी आ पर्बम लेंशा पशो कथा आ अर्थ मार बाक्बा, दे मिम्नीनी? ‘आम आफोम ग्युरशो अङगुर ब्वाम्तेक्म हना, आन आल आन ख्रुइ ग्रिम्बा ङा?’ ” दे हिल्लो पाप्तु। येरमीया ३१:२९
3 लेंशा परमप्रभु, परमप्रभु यावेमी “गो आं ब्रोंइशा बाक्शो खोदेंशो पा, मुल रे गेपुकीम एको कथा इस्राएलम लेंशा काइ मदेनीन।
4 मारदे हना ब्रोंइशा बाक्ब नेल्ल आं केन नम, दे तुइक्चा माल्नीनी। आम आफ नु आल नेल्ल आं केन नम। सुम पाप पाइबा, मेको ला बेक्ब।
5 ठीक पाइब मुर का बाक्त हना, आं अरेशो टीब नु रिम्शो पाइब।
6 मेको डांडा मेर मजाइब नु इस्राएल आ खिं ङा मुर आन मूर्ति आन कली पूजा मपाइब, मेको आ नेक्था ङा मुर आन मीश नु मइप्ब, रां ब्रोल्शो मीश मुर नु मइप्ब। लेवी १८:१९; लेवी १८:२०
7 मेकोम सुइ आन कली मदिप्ब, जाकटी वोइश्शो मार मार लेश्शा गेब, मेकोम खुइ मपाइब, शोव़लु बेक्शो आन कली आ जचा थोव़क गेब। मिनु शिश्रा बाक्शो आन कली वा फेक्पाइक्ब। ब्यवस्था २४:१०-१३; यसैया ५८:७
8 मेकोम जेर गेशा चाइक्ब मताक्ब, मेको मरिम्शो पतीक रे ङोन बाक्ब नु मुर आन दातेम कुल मकोव़थु ठीक निसाफ पाइब। प्रस्थान २२:२४; भजन संग्रह १५:५
9 मेकोम आं फुल्लुम मुशा ब्रेक्शो लोव़ नु आं निसाफ पतीके लोव़ थुं मफाइक्थु पाइब। मोदेंशो मुर ठीक पाइब मुर बाक्ब। मिनु मेको थमा पा ब्रोंइचा माल्ब” दे परमप्रभु, परमप्रभु यावेमी देंशो बाक्ब।
10 मिनु “मेको मुर के तौ का बाक्ब। मेकोम हुश ख्राक्श पोक्ब नु मुर आन कली साइक्ब,
11 मेको आ आफोम मपशो गेय नेल्ले मेकोम पाइब, मेकोमी डांडा मेर जाइब, मेको आ नेक्था ङा मुर आन मीश नु इप्ब।
12 प्रुङग नु मारेइ मथीब आन कली दिप्ब, मुर आन मार मार रोइक्ब। जाकटी वोइश्शो थोव़क मलेप्ब, मूर्ति आन कली पूजा पाइब नु ग्रांग्रा दिशो गेय पाइब।
13 मेकोम आ चाइक्ब ताक्शा ला जेर गेब, मार मोदेंशो मुर ब्रोंइचा ताइबा ङा? मेको ब्रोंइचा मताइब। मोदेंशो ग्रांग्रा दिशो गेय नेल्ल पतीके, मेको थमा पा बेक्चान माल्ब। मेको आ हुश आ दोस मेको आंमा राइब।
14 तन्न मेको मुर आ तौमी आ आफोम पशो पाप नेल्ल ताइब। मेको नेल्ल तशा, मोदेंशो गेय मपाइब। ब्यवस्था २४:१६
15 मेकोम डांडा मेर मजाइब। इस्राएल आ खिं ङा मुर आन मूर्ति आन कली पूजा मपाइब, मेको आ नेक्था ङा मुर आन मीश नु मइप्ब।
16 मेकोम सुइ आन कली मरिम्शो मपाइब, मेकोमी जाकटी मताक्ब। मेकोम सुइ के मारेइ मरोइक्ब। तन्न शोव़लु बेक्शो आन कली आ जचा थोव़क गेब। शिश्रा बाक्शो आन कली वा फेक्पाइक्ब।
17 मेको मरिम्शो पतीक रे ङोन बाक्ब, जेर गेशा आ चाइक्ब मताक्ब। मेकोम आं निसाफ पतीक लोव़ नेल्ल पाइब। मिनु आं फुल्लुम मुशा ब्रेक्शो लोव़ नेल्ल खाप्ब। मेको मुर आ आफ आ मरिम्शो पशो आ पर्बम बेक्चा ममाल्ब। मेको थमा पा ब्रोंइब।
18 तन्न मेको आ आफोम चहिं आ दला दाक्स पशा, आ लोक्ब आन कली रोइक्ताक्व। आ मुर आन दातेम मरिम्शो पाप्तु। मेको आ मरिम्शो पशो आ पर्बम बेक्ब।
19 मो हना यो गेपुकीम मारदे आ आफ आ मरिम्शो पशो आ तौम कुरचा ममाल्दा? देंनीनी। आ तौम आं अरेशो टिशा, ठीक गेय पशो बाक्ब, मेकोम आं फुल्लुम मुशा ब्रेक्शो लोव़ होस पा टिशो बाक्ब। मोपतीके मेको थमा पा ब्रोंइब। प्रस्थान २०:५
20 सुम पाप पाइबा, मेको ला बेक्ब। आलमी आ आम आफ आस मरिम्शो पशो आ पर्बम श्येत जचा ममाल्ब। आ आम आफोम यो आस आल आन मरिम्शो पशो आ पर्बम श्येत जचा ममाल्नीस। ठीक पाइब आ ठीक पशो आ कली दुम्ब। मिनु परमप्रभु यावे आ अरेशो मटीबमी आ मटिशो आ कलीन दुम्ब। २राजा १४:६
21 तन्न परमप्रभु यावे आ अरेशो लोव़ मटीब मुर कामी आ पशो पाप नेल्ल प्रोंइशा, आं फुल्लुम मुशा ब्रेक्शो लोव़ नेल्ल पाप्तु हना, आं अरेशो नु ठीक गेय पाप्तु हना, मेको थमा पा ब्रोंइब। मेको मबेक्ब। इजीकीएल ३३:१०-२०
22 मेको आ हेंथे पशो आ पर्बम लेंशा ममिम्सीब। मेको आ ठीक पतीकेम ब्रोंइब। यसैया ४३:२५
23 मार, गो आं अरेशो लोव़ मटीब मुर बेक्मेनु ग्येरनुङा ङा? मेको क्येङा यो गो मेको आन मरिम्शो पशो प्रोंइशा ब्रोंइशा बाक्शो तचा मदाक्नुङा ङा? १तिमोथी २:४
24 तन्न ठीक पाइब मुरुम आ ठीक पतीक प्रोंइशा, मरिम्शो पाप्तु हना, आं अरेशो लोव़ मटीबपुकीम खोदेंशो पा ग्रांग्रा दिशो गेय पाप्तु हना, मार मेको ब्रोंइबा ङा? मेको आ ङोंइती पशो ठीक गेय मारेइ ममिम्सीब। मेको आ मरिम्शो पशो नु आ पाप आ पर्बम बेक्चा माल्ब। इजीकीएल ३:२०
25 मो हना यो गेपुकीम ‘परमप्रभु आ पशो ठीक मबाक्ब’ देंनीनी। इस्राएल आ खिं ङा मुर नेनीन, मार, आं पशो ठीक मबाक्बा ङा? मार, इन पशो कका ठीक बाक्बा ङा?
26 ठीक पाइब मुरुम आ ठीक पतीक प्रोंइशा मरिम्शो पाप्तु हना, मेको आ ठीक मपतीकेम बेक्ब। मेको आ मरिम्शो पशो आ पर्बम बेक्चा माल्ब।
27 तन्न परमप्रभु यावे आ अरेशो मटीब मुरुम आ मटितीके प्रोंइशा, आं अरेशो ठीक गेय पाप्तु हना, मेको ब्रोंइब।
28 मारदे हना मेकोम मिम्शा, आ पशो मरिम्शो नेल्ल रे लेत्त हना, मेको थमा पा ब्रोंइब। मेको बेक्चा ममाल्ब।
29 मो हना यो इस्राएल आ खिं ङा मुरपुकीमी ‘परमप्रभु यावे आ पशो ठीक मबाक्ब’ देंनीम। ए इस्राएल आ खिं ङा मुर, मार, आं पशो ठीक मबाक्बा ङा? मार, इन पशो कका ठीक बाक्बा ङा?
30 मोपतीके ए इस्राएल आ खिं ङा मुर, गो नेल्ल इन कली इन पशो कोव़शा निसाफ पाइनुङ। मिनु इन हेंथे पशो नेल्ल रे लेतीन। मो मपाइतीनी हना, इन मरिम्शो पशोम इन कली साइक्ब।
31 गे इन आं कली हेंथे पशो नेल्ल प्रोंइशा, गे नक थुं नु नक सोक्ती ताक्कीन। ए इस्राएल आ खिं ङा मुर, गे मारदे बेक्चा दाक्नीनी? इजीकीएल ११:१९
32 मारदे हना गो सुइ मुर बेक्शोम मग्येरसीनुङ। मरिम्शो पतीक रे लेश्शा, ब्रोंइशा बाक्कीन” दे परमप्रभु, परमप्रभु यावेमी देंत।