11
अथाल्याह नु योआश
1 अहाज्याह आ ममा अथाल्याहम आ तौ कली साइश्शो तशा, पिप आ खिं ङा मुर नेल्ल आन कली साइक्चा गोवा बाक्त। २राजा ८:२६; २राजा ९:२७
2 तन्न पिप येहोराम आ तमी, अहाज्याह आ समी येहो-शेबा बाक्माक्त। मेकोमी अहाज्याह आ तौ योआश कली मेको साइक्चा पुंइसीब पिप आ आल आन दाते रे लाइश्शा, मेको आ खाल पाइब मीश मुर नु इप्तीके कोठा काम ख्रुइक्ता बाक्त। मोपा अथाल्याहमी मेको आल कली साइक्चा मतवा बाक्त।
3 मिनु मेको आल ६ बर्स सम्म मेको नु परमप्रभु यावे आ खिंम ख्रुइश्शा बाक्माक्त। मेना अथाल्याहमी सासन पशो बाक्माक्त।
4 मिनु ७ बर्सम येहो-यादामी सहे, सहे जना पिप कली कोव़ब केरेती नु खाल पाइब आन ठेयब मुर आन कली परमप्रभु यावे आ खिंम ब्रेश्शा चाक्मी बाक्त। मिनु येहो-यादाम मेको आन कली कबल का पपाइश्शा, परमप्रभु यावे आ खिंम कसम जपाइक्मी बाक्त। मिनु मेको आन कली पिप आ तौ कोंइदीमी बाक्त। केरेती परमप्रभु यावे आ खिं कोव़ब बाक्नीम।
5 मिनु येहो-यादामी मेको आन कली “गे मार पचा माल्नीनी देंशा हना, सु सु नाइक्तीक नाक्ती गेय पथ जाक्नीनी, मेकोपुकीम भाग सां ङा भाग का पिप आ खिं खाल पने।
6 मिनु अर्को भाग का सुर माइश्शो लाप्चोम बाक्कीन। नोले ङा भाग लाप्चो खाल पाइब आन नोले गे बाक्शा, दरवार कोव़चा माल्नीम।
7 मिनु गे नाइक्तीक नाक्ती गेय मपाइब हुल निक्शी चहिं परमप्रभु यावे आ खिं खाल पा बाक्कीन।
8 गे नेल्ल आंम आंम गुइम या शेशा, पिप कली खाल पा आ एर ओंथ बाक्चा माल्नीनी। इन नेक्था जाक्ब नेल्ल आन कली सतीन। पिप ते लत हना यो, गे मेको आ नेक्था बाक्चा माल्नीनी” दे अरेमी बाक्त।
9 मिनु पिप कली कोव़ब आन ठेयब मुरपुकीमी चढ़ेब येहो-यादा आ अरेशो नेल्ल पामे बाक्त। मेको नेल्लेमी आन आन मुर आन कली खुप्तमे बाक्त। नाइक्तीक नाक्ती गेय पचा माल्शो नु ममाल्शो नेल्ल चढ़ेब येहो-यादा आ बाक्तीक जाक्मा बाक्त।
10 मिनु मेको चढ़ेबम मेको आन कली परमप्रभु यावे आ खिंम बाक्शो दाऊद आ तूतीक नु तेक्तीक गेमी बाक्त। २सामुएल ८:७
11 मिनु मेको खाल पाइबपुकी आंम आंम या शेशा परमप्रभु यावे आ खिं आ दक्खिन रे उत्तर सम्म, खिं नु चढ़ेतीक आ एर ओंथ पिप कली खाल पा बाक्मा बाक्त।
12 मिनु येहो-यादाम पिप आ तौ कली ग्रुंइदा बाक्त। मिनु मेको आ पियाम सिरपेच गुक्ता बाक्त। मिनु येहो-यादामी मेको कली कबल ङा कागज का गेवा बाक्त। मिनु मेको कली तेल लुक्शा पिप सेला बाक्त। मिनु मुरपुकीम गुइ फ्रोक्शा “पिप गेना हना यो ब्रोंइशा बाक्ल” देंमा बाक्त। ब्यवस्था १७:१८-१९; १राजा १:३९
13 मिनु अथाल्याहमी खाल पाइब नु मुरपुकी ठेयब सेंदा पा रेयके पशो नेना बाक्त। मिनु मेको परमप्रभु यावे आ खिंम बाक्शो मुर आन नेक्था लमाक्त।
14 मिनु मेकोम कोव़ङानु, पिप थाम आ नेक्था राप्पाइश्शो तवा बाक्त। मेको आन पतीक पशा ठेयब मुरपुकी नु तुराही ताप्बपुकी पिप आ नेक्था बाक्मा बाक्त। मिनु रागी ङा मुर नेल्ल तुराही ताप्ना ताप्न ग्येरसीशो बाक्मा बाक्त। मिनु अथाल्याहम आ वा खाक्गा बाक्त। मिनु ठेयब सेंदा पा “गो नु रागी नेल्ल खतम! गो नु रागी नेल्ल खतम!” दे वाइ ब्रेम्माक्त।
15 मिनु चढ़ेब येहो-यादामी लडाइ पाइब आन ठेयब मुर आन कली “मेको कली खिं रे ग्रुंइदीन। मेको आ नोले खोइक्ब नेल्ल आन कली तरवारम सतीन। मारदे हना ‘मेको परमप्रभु यावे आ खिंम साइक्चा मपुंइसेक्ल’ ” देंमाक्त।
16 मिनु मेको कली ग्याइश्शा, शारा वोइक्तीक लाइश्शा, सदमे बाक्त।
17 मेको नोले येहो-यादामी परमप्रभु यावे, पिप नु आ मुर कली कबल का पवा बाक्त। मेकोपुकी परमप्रभु यावे आ मुर दुम्नीम, दे कबल पवा बाक्त। मिनु मेकोम पिप नु मुर आन दातेम यो कबल का पवा बाक्त।
18 मिनु मेको रागी ङा मुर नेल्ल बाल आ खिं लशा, मेको प्रेत्मे बाक्त। मेकोपुकीम मेको आ चढ़ेतीक नु आ मूर्ति जिक्शा ताइक्तमे बाक्त। मिनु बाल कली चढ़ेब मत्तान कली चढ़ेतीक आ ङोंइती सदमे बाक्त। मिनु चढ़ेब येहो-यादाम परमप्रभु यावे आ खिं कली खाल पाइब मुर योव़मी बाक्त। २राजा १०:२६-२७; न्यायाधीस ६:२५
19 मिनु येहो-यादामी सहे का जना लडाइ पाइब आन कप्तानपुकी, केरेती, खाल पाइबपुकी नु रागी ङा मुर नेल्ल आन कली लाइक्मी बाक्त। मिनु मेकोपुकीमी पिप कली परमप्रभु यावे आ खिं रे खाल पाइब आन लाप्चो लां पा पिप आ खिंम चाक्गमे बाक्त। मिनु पिप आ नित्तीकेम निप्पदमे बाक्त। करेती परमप्रभु यावे आ खिं कोव़ब बाक्तेक्म।
20 मिनु रागी ङा मुर नेल्ल ग्येरसमा बाक्त। मिनु सहरम थुं नाइश्शा बाक्तीक दुम्माक्त। मारदे हना अथाल्याह तरवारमी साइक्चा पुंइसे बाक्त।
21 योआश पिप दुम्मेनु, मेको ७ बर्स दुम्शो बाक्माक्त। योआश नु येहो-आश नें का बाक्ब, येहो-आश कली योआश यो बाक्ब।