6
मुरपुकीम येसु कली थमा मसुइश्शो
मत्ती १३:५३-५८; लूका ४:१६-३०
1 मिनु मेकेर रे लशा, आ बाक्तीके सहरमी जाक्दीम्माक्त। आ शेंसीबपुकी यो खोइश्शा लमा बाक्त।
2 मिनु नाइक्तीक नाक्त ग्रुम्तीक खिं लशा, मुर आन कली शेंचा गोवा बाक्त। मिनु आ शेंशो नेंब शुशेमी छक लाक्शा “मेकोमी ओदेंशो शेंचा ते रे शेंसे माइ? ओदेंशो निप्स पाइश्शो लोव़ पचा दोपा जोक्गा? मेको आ गुइ रे दोदेंशो सक्ति पाइश्शो गेय दुम्मे? यूहन्ना ७:१५
3 शी मुइब ममाइ ङा? मरीयम आ तौ ममाइ ङा? याकूब, योसेस, यहूदा नु सिमोन आन लोक्ब ममाइ ङा? आ लोक्बपुकी गोपुकी नु मबाक्नीमी ङा?” दे आन थुं मनुशो लोव़ पमुमा बाक्त। यूहन्ना ६:४२
4 मिनु येसुम मो देंब आन कली “तेइ तेइ परमप्रभु यावे आ लोव़ पाइब आन कली ठेयब सेल्शा मान पाइनीम। आंम रागी ङा नु आंम जात ङा, आंम खिं ङा मुरपुकीमी चहिं महिक्नीम” दे माइक्मी बाक्त।
5 मिनु का निक्शी रोइ पशो मुर आन कली आ गुइम थिशा सापाइक्चा ङा लाक्शा, अरु सक्ति पाइश्शो गेय कोंइने मचबा बाक्त।
6 मिनु “थमा मसुइय्यीमी बाक्त” दे तुइश्शा, छक लाक्माक्त। मिनु एर ओंथ ङा गाउं गाउंमी हिरशा, शेंना शेंन गाक्माक्त।
शेंसीब आन कली सोइश्शो
मत्ती १०:१,५; लूका ९:१-६
7 मिनु काबु आ १२ जना शेंसीब आन कली ब्रेश्शा, निनिक्शी पा शेंथ सोइक्चा गोवा बाक्त। शेंसीब आन कली वोल खेरतीक सक्ति गेवा बाक्त। लूका १०:१
8 मिनु “जचा थोव़क, क्येट, झोला मारेइ मलाइक्चा। कोक्के कुरशा,
9 जुत्ता लिक्शा, फेक्तीक वा का ला फेक्शा गाक्कीन।
10 गाउं सहर जाक्दीश्शा, खिं कामी ओव़शा, बास बाक्कीन। मेको गाउं सहर रे गाक्ची मजाक्म सम्म बाक्कीन। खिं खिं याक्शा मबाक्कीन।
11 इन कली बाक्चा मगेथु इन शेंशो लोव़ यो मनेंतेक्म हना, इन खोइली ङा फुरक थुर थुर पाइश्शा गाक्कीन। इन मो पशोमी मेको आन कली चिन्ड दुम्ब” दे माइश्शा सोइक्तीमी बाक्त।
12 मिनु शेंसीबपुकी लशा, मुर आन कली “इन थुं परमप्रभु यावे गे लेत्तीन” दे नेंपाइक्ना पाइक्न गाक्मा बाक्त।
13 मिनु वोल आन कली ग्रुंइशा खेरबाक्मा बाक्त। रोइ पशो मुर आन कली तेल ख्रेक्शा, प्रार्थना पा सापाइक्बाक्मा बाक्त। याकूब ५:१४-१४
यूहन्ना कली साइश्शो
मत्ती १४:१-१२; लूका ९:७-९; लूका ३:१९-२०
14 मिनु हेरोद पिपमी मेको लोव़ नेंना बाक्त। मारदे हना येसु आ नें तेइ तेइ ब्रशो बाक्माक्त। का निक्शी मुरपुकीमी “ब्वाक्कुमी ख्रुम्शा ग्रुंइब यूहन्ना बेक्शो रे सेंचा पुंइसे बाक्त। मोपतीके सक्ति पाइश्शो गेय पाइबाक्माक्त” देंबाक्मा बाक्त।
15 का निक्शीमी “एलीया बाक्माक्त” देंबाक्मा बाक्त। का निक्शीमी “साइ ङा परमप्रभु यावे आ लोव़ पाइब आन दाते ङा का, माइ” देंबाक्मा बाक्त।
16 हेरोद पिपमी मोदेंशो लोव़ नेंशा “गो आ पिया क्योरपाइश्शो यूहन्ना बेक्शो रे सेंचा पुंइसे बाक्त” देंमाक्त।
17 हेरोदमी हरोदनी कली ग्येरपाइश्शा, यूहन्ना कली ग्याइक्पाइश्शा, जेल्खानमी चोक्पाइश्शा वोइश्शो बाक्माक्त। मारदे हना हेरोदमी आ लोक्ब फिलीप आ मीश लाइश्शो बाक्माक्त।
18 मिनु यूहन्नामी हेरोद कली “इन लोक्ब आ मीश लाइक्चा मदुम्ब” दे माइश्शो बाक्माक्त। प्रस्थान २०:१४; लेवी १८:१६
19 मोदेंशो आ पर्बम हेरोद आ मीशेमी चुरशा, यूहन्ना कली साइक्पाइक्चा माल्शो बाक्माक्त।
20 तन्न साइक्पाइक्ने मचाप्शो बाक्माक्त। मारदे हना हेरोद पिपमी “यूहन्ना ठीक पाइब नु रिम्शो थुं पाइश्शो मुर बाक्ब” दे तुइश्शा, यूहन्ना क्येङा हिंबाक्माक्त। मोपतीके साइक्चा मगेथु वोइश्शो बाक्माक्त। मिनु यूहन्ना आ लोव़ नेंनें दाक्शा, आ थुं ग्येत्थ लुक्च दुम्शा, नोफा दाइश्शा नेंबाक्माक्त।
21 काबु मार दुम्माक्त देंशा हना, पिप आ जरमेशो नाक्ती मिम्चा कली हेरोद पिपमी आ दरवार ङा गेय पाइब, सरकार ङा गेय पाइब नु गालील ङा ठेयब मुर नेल्ल आन कली ब्रेश्शा, ठेयब भोज का गेवा बाक्त।
22 मिनु हेरोदनी आ तमीमी सिल कोंइदा बाक्त। मिनु हेरोद नु मेकेर खुम्सीशा बाक्बमी मेको सिल पशो तशा, शुश दाक्शा, नेल्ल ग्येरसमा बाक्त। मिनु पिपमी मेको मीश आल कली “इ दाक्शो पुनो। गो मेको गेनन” देंमाक्त।
23 मिनु लोव़ थोक्शा “मार पुंइतीवी हना यो, इ पुंइशो नेल्ल गेनन। राज्य उइक्थ उइक्थ पा योक्शा यो गेनन” दे कसम जशा, लोव़ गेवा बाक्त। एस्तर ५:३-६
24 मिनु मीश आल ग्रूशा, आ ममा कली “मार पुनु माइ” दे हिल्लो पवानु, आ ममामी “ब्वाक्कुम ख्रुम्शा ग्रुंइब यूहन्ना आ पिया गेचा नङ, दे पुनो” देंमाक्त।
25 मिनु मीश आल फ्रा लेश्शा, ओव़शा पिप कली “ब्वाक्कुम ख्रुम्शा ग्रुंइब यूहन्ना आ पिया थालमी कुर पा गेयीनी” दे पुना बाक्त।
26 मेको आ पुंइशो नेंशा, पिप आ थुं शुश खाइक्माक्त। तन्न मेकेर बाक्ब आन कुल कसम जशा ङा मिन “इ पुंइशो गेनन” देंतीके “मगेनन” देंने मचबा बाक्त।
27 मोपतीके सिपाइ का कली “लशा, यूहन्ना आ पिया क्योरशा चाक्को” दे सोइक्ता बाक्त।
28 मिनु आ पिया थालम कुर पा चाक्शा, मीश आल कली गेवा बाक्त। मिनु मीश आलमी आ ममा कली गेवा बाक्त।
29 मिनु यूहन्ना आ शेंसीबपुकीमी “यूहन्ना साइक्चा पुंइसे बाक्त” देंशो नेंशा, जेल्खानमी लशा, आ बेक्शो रां लाइश्शा, थिम्मे बाक्त।
शुश मुर आन कली रूथ्री थुल्शो
मत्ती १४:१३-२१; लूका ९:१०-१७; यूहन्ना ६:१-१३
30 येसु आ सोइश्शोपुकी लशा शेंशा, लेश्शा जाक्मा बाक्त। मिनु मार पामे, मार शेंदमे, मेको लोव़ येसु कली शोव़ङमे बाक्त। लूका ९:१०; लूका १०:१७
31 मिनु येसुमी “मुर मबाक्तीके लशा नांइसय” देंमाक्त, मारदे हना शुश मुर ग्रुम्थ जाक्बाक्मा बाक्त। मिनु येसु नु आ शेंसीबपुकीमी जचा कली यो नाइक्चा मतामे बाक्त।
32 मिनु डोंगा ङोइश्शा, समुन्द्र शोक्शा लमा बाक्त। मुर मबाक्तीके जाक्दीश्शा, नाइक्चा, दे थुं पामे बाक्त।
33 तन्न शुश मुरुमी येसु नु आ शेंसीब आन कली लशो तुइश्शा, डोंगाम ङोइश्शो तशा, आइक्ची हांबु गे लमा बाक्त दे तुइश्शा, समुन्द्र हिरशा, दोरशा जाक्दीम्मा बाक्त।
34 मिनु येसु डोंगा रे तोंइसीशा, शुश मुर देल्शा बाक्शो तशा, शिशी पवा बाक्त। मारदे हना मेको आन कली गोठला मपाइश्शो भेडा खोदेंशो दुम्शो तामी बाक्त। मिनु शुश लोव़ शेंचा गोवा बाक्त। मत्ती ९:३६
35 मिनु शेंस ङा शेंस पवानु, नां रिक्चवा बाक्त। मिनु शेंसीबपुकीमी येसु कली “मुर मबाक्तीके बाक्ब, नां रिक्चाप्तु।
36 एको देल्शो मुर आन कली सोइक्चा। मारदे हना गाउं सहर लशा, आंम कली जचा थोव़क ग्याप्मेक्ल” दे मदमेनु, मर्कूस ८:१-९
37 येसुमी “गेपुकीमी एको आन कली जचा गेने” दे माइक्मी बाक्त। मिनु शेंसीबपुकीमी “गोपुकी लशा, सहे निक्शी देनार खोइ ङा शोब्ले ग्याप्शा, चाक्शा, थुल्चा देंनी?” दे हिल्लो पामेनु, देनार का नाक्त का ङा गाल्च बाक्त। मेको रोम ङा चांदी के क्येट बाक्त।
38 “शोब्ले दोशो कुरनी? कोव़थ लने” देंमाक्त। मिनु कोव़शा “शोब्ले ५ ओटा नु ङांइ निक्शी बाक्त” देंमा बाक्त।
39 मिनु येसुमी मुर आन कली गिग घांस बाक्तीके दिंममी “लस्कर पा निप्पतीन” दे माइक्मी बाक्त।
40 मिनु सहे, सहे नु ५०, ५० ङा लस्कर पा निस्समा बाक्त।
41 मिनु येसुमी शोब्ले नु ङांइ शेशा, सरीङ गे कोव़शा “परमप्रभु गे रिम्शो पाइब बाक्नीनी” देंशा, शोब्ले जिक्शा, निप्पाइश्शो मुर आन कली “योक्शा गेने” दे आ शेंसीब आन कली गेवा बाक्त। ङांइ यो योक्पाइक्मी बाक्त। मर्कूस ७:३४
42 मिनु नेल्लेमी रूथ्री जामे बाक्त।
43 मिनु जशा, हेंशो शोब्ले नु ङांइ गुप्मेनु, १२ डालो ब्रीमाक्त।
44 जाइबपुकी वोंइश मुर ला ५ हजार बाक्मा बाक्त।
येसु ब्वाक्कु तार गाक्शो
मत्ती १४:२२-३३; यूहन्ना ६:१५-२१
45 मिनु येसुमी आ शेंसीब आन कली “आं ङोंइती लशा, समुन्द्र शोक्शा, बेथसैदा सहरमी जाक्दीतीन” दे डोंगामी ङोइक्पाइश्शा, सोइक्तीमी बाक्त।
46 मिनु नोले प्रार्थना पथ डांडा ङोंइसे बाक्त।
47 मिनु नां रिक्मेनु, डोंगा समुन्द्रमी बाक्माक्त। येसु चहिं डांडाम बाक्माक्त।
48 मिनु येसुमी आ शेंसीबपुकीमी श्येत जामे बाक्त, दे तुइक्ता बाक्त। मारदे हना फशेमी डोंगा तेक्गा बाक्त। मिनु नां सोव़चावानु, येसु ब्वाक्कु तारी गाक्शा पिमाक्त।
49 “मेको आन कली दाम पाइक्नुङ” दे मिम्शा, पेत्चावानु, शेंसीबपुकीमी येसु कली ब्वाक्कु तारी गाक्शो तशा, वोल दाप्शा, हिंशा वाइ ब्रेम्मा बाक्त।
50 मारदे हना नेल्लेमी तामे बाक्त। मिनु शुश हिंमा बाक्त। मिनु येसुमी मेको आन कली सेश्शा “महिनीन, गो नङ, इन थुं बारपतीन” देंमाक्त।
51 मिनु डोंगा ङोंइसे बाक्त। मिनु फश गिवार दिक्माक्त। मिनु शेंसीबपुकी थाम्पा छक लाक्मा बाक्त। मर्कूस ४:३९
52 दोपा शोब्ले बारपदा, दे मारेइ ममिम्शो बाक्मा बाक्त। मारदे हना रुप्चा थुं मपाइबाक्मा बाक्त। मर्कूस ८:१७
रोइ पाइब आन कली सापाइश्शो
मत्ती १४:३४-३६
53 मिनु समुन्द्र शोक्शा, गेनेसरेथ जाक्दीम्मा बाक्त।
54 मिनु डोंगा रे तोंइसामानु, मुरपुकीमी येसु बाक्ब दे तुइक्तमे बाक्त।
55 मिनु येसु ते ते लमे, मेक मेक दोरशा लशा, रोइ पशो आन कली कुरशा, आ नेक्था चाक्ग्मे बाक्त।
56 येसु गाउं सहर ते ते लमे, मेक मेक रोइ पशो आन कली चाक्बाक्मा बाक्त। मिनु येसु कली “इन फेक्शो वा थिचा गेयीनी” दे पुंइबाक्मा बाक्त। मिनु सु सुमी आ फेक्शो वा थीमे, मेकोपुकी साबाक्मा बाक्त। मर्कूस ५:२७-२८; प्रेरित ५:१५; प्रेरित १९:११-१२