10
चांदी के तुराही
1 परमप्रभु यावेमी मोसा कली
2 “गे चांदी के तुराही निक्शी सेलो। मेको तुप्शा, सेल्चा माल्नेवे। मिनु गे मेको ताप्शा, इस्राएली आन कली ग्रुम्पाइक्चा माल्नेवे। मिनु गाक्ची ना दुम्मेनु, गे मेको ताप्चा माल्नेवे। गन्ती ३१:६
3 मेको निक्शी कालेम ताप्शोनु, इस्राएली नेल्ल इ ङोंइती ग्रुम्तीक ताम्बु आ ओव़तीकेमी जाक्शा बुक्चा माल्नीम।
4 तन्न का ला ताप्शोनु, इस्राएली आन थर थर ङा मुर आन ठेयब मुरपुकी इ ङोंइती जाक्शा बुक्चा माल्नीम।
5 मिनु ठेयब सेंदामी ताप्शोनु, पूर्ब गे बाक्शो मुरपुकी गाक्चा माल्नीम।
6 मिनु निक्शी खेयप ताप्शोनु, दक्खिन गे बाक्शो मुरपुकी गाक्चा माल्नीम। गाक्ची ना दुम्मेनु, गेना हना यो तुराही ताप्चा माल्नीम।
7 गे मुर आन कली ग्रुम्पाइक्ची ना मेको ताप्चा माल्नेवे। तन्न मेको गाक्ची ना ङा खोदेंशो पा ताप्चा मदुम्ब।
8 मिनु हारून आ तौ चढ़ेब निक्शीमी मेको तुराही ताप्चा माल्नीस। मेको इन कली नु इन चच युइ आन कली गेना हना यो पतीके बाक्ब।
9 मिनु गे इन रागीमी इन कली दिप्ब जोरी सत्रुपुकी नु लडाइ पथ लनीनु, ठेयब सेंदामी तुराही ताप्चा माल्नीस। मो पाइतीनी हना, परमप्रभु यावे, इन परमप्रभुमी इन कली मिम्शा, इन जोरी सत्रु रे प्रोंइब। न्यायाधीस ६:३४
10 मिनु गेपुकी ग्येरशा बाक्नीनु, गे इन पचा माल्शो चाड मानेनीनु, औंसी ङा चाड मानेनीनु, इन चोशा चढ़ेतीके नु इन दुशा बाक्चा आ पर्बम चढ़ेतीके चढ़ेनीनु, गेपुकीमी तुराही ताप्चा माल्नीनी। मिनु मेको ताप्नीनु, इन परमप्रभुमी इन कली मिम्ब। गो परमप्रभु यावे, इन परमप्रभु नङ” देंत। लेवी २३:२४; २राजा ११:१४; २इतिहास ७:६
इस्राएली सीनै डांडा रे गाक्शो
11 मिनु बर्स निक्शी, महिना निक्शी ङा २० नाक्ती मेको गोस्स परमप्रभु यावे आ कबल पशो सन्दोस बाक्शो ताम्बु रे इर लत। गन्ती १:१
12 मिनु नोले इस्राएलीपुकी सीनै ङा गोरशो रागी रे हुल हुल पा गाक्तेक्म। मिनु मेको गोस्स पारान ङा गोरशो रागीम नांइसाक्व।
13 मिनु परमप्रभु यावेमी मोसा कली अरेशो खोदेंशो पा टिशा, मेकोपुकी गाक्तेक्म। गन्ती २:-
14 नेल्ल क्येङा ङोंइती यहूदा आ बाक्तीक ङा मुर हुल हुल पा आन छेदर कुरशा गाक्तेक्म। मेको आन ठेयब मुर अम्मीनादाब आ तौ नहशोन बाक्त।
15 मिनु इस्साकार आ बाक्तीक ङा मुर आन ठेयब मुर सुआर आ तौ नेथनेल बाक्त।
16 मिनु जबूलून आ बाक्तीक ङा मुर आन ठेयब मुर हेलोन आ तौ एलीआब बाक्त।
17 मिनु नोले ग्रुम्तीक ताम्बु पोक्शा, गेरशोन आ मुरपुकी नु मेरारी आ मुरपुकीमी मेको कुरशा, गाक्तेक्म।
18 मिनु मेको आन नोले रूबेन आ बाक्तीक ङा मुरपुकी हुल हुल पा आन छेदर कुरशा गाक्तेक्म। मेको आन ठेयब मुर शेदेउर आ तौ एली-सुर बाक्त।
19 मिनु सिमियोन आ बाक्तीक ङा मुर आन ठेयब मुर सुरी-शदै आ तौ शेलुमीएल बाक्त।
20 मिनु गाद आ बाक्तीक ङा मुर आन ठेयब मुर दूएल आ तौ एली-आसाफ बाक्त।
21 मिनु कोहाथीपुकी परमप्रभु यावे आ ताम्बु ङा मार मार कुरशा, गाक्तेक्म। मेको आन जाक्चा क्येङा ङोंइती मेको ग्रुम्तीक ताम्बु सेल्ने थुम्शो बाक्चा माल्बाक्त।
22 मेको नोले एफ्राइम आ बाक्तीक ङा मुरपुकी हुल हुल पा आन छेदर कुरशा गाक्तेक्म। मेको आन ठेयब मुर अम्मीहुद आ तौ एली-शामा बाक्त।
23 मिनु मनस्से आ बाक्तीक ङा मुर आन ठेयब मुर पेदा-सुर आ तौ गमालीएल बाक्त।
24 मिनु बेन्यामीन आ बाक्तीक ङा मुर आन ठेयब मुर गिदेओनी आ तौ आबी-दान बाक्त।
25 मिनु नेल्ल आन क्येङा नोले दान आ बाक्तीक ङा मुर हुल हुल पा आन छेदर कुरशा, गाक्तेक्म। मेको आन ठेयब मुर अम्मी-शदै आ तौ अही-एजेर बाक्त।
26 मिनु आशेर आ बाक्तीक ङा मुर आन ठेयब मुर ओक्रान आ तौ पगीएल बाक्त।
27 मिनु नाप्ताली आ बाक्तीक ङा मुर आन ठेयब मुर एनान आ तौ अहीरा बाक्त।
28 मोपा इस्राएली आन हुल हुल पा गाक्चा माल्शो बाक्तेक्म।
मोसामी आ शिउ आ तौ कली ग्रुम्शो
29 मिनु मोसामी मिदयान ङा रूएल आ तौ होबाब, आ रिउ कली “परमप्रभु यावेमी आंइ कली गेशो रागी लना लन बाक्नीकी। गे यो गोपुकी नु पिने। गो इन कली रिम्शो पाइक्नीकी। मारदे हना परमप्रभु यावेमी ‘इस्राएली आन कली रिम्शो पाइनुङ’ देंत” दे मोसामी देंत। प्रस्थान २:१८; प्रस्थान १८:१; न्यायाधीस १:१६; न्यायाधीस ४:११
30 होबाबमी “गो मलाइक्नुङ। गो आं रागी नु आं मुर आन बाक्तीके लेत्नुङ” देंत।
31 मिनु मोसामी “आंइ कली मप्रोनीन। मारदे हना मेको गोरशो रागीमी ते ताम्बु कीचा मेको तुइक्नीनी। मिनु गे आंइ कली लां कोंइब दुम्नीनी।
32 गे गोपुकी नु गाक्तीनी हना, परमप्रभु यावेमी आंइ कली मार मार रिम्शो पाइबा, गो मेको खोदेंशो पा इन कली पाइनीकी” देंत।
33 मिनु मेकोपुकी परमप्रभु यावे आ डांडा रे नाक्त सां सम्म गाक्तेक्म। परमप्रभु यावे आ कबल पशो सन्दोस कुरबपुकी मेको आन कली बास बाक्तीक माल्चा, दे मेको आन ङोंइङोंइती गाक्तेक्म।
34 मिनु परमप्रभु यावे आ गोस्स मेको आन गाक्ची ना मेको आन तार बाक्त। प्रस्थान १३:२१; गन्ती ९:१५-२३
35 मिनु कुरबपुकीमी मेको कबल पशो सन्दोस कुरशा गाक्मानु, गेना हना यो मोसामी “परमप्रभु यावे, बोक्कीन। इन जोरी सत्रु एर ओंथ ब्रामल। मिनु इन जोरी सत्रु इन क्येङा प्रोक्मल” देंबाक्त। २इतिहास ६:४१; भजन संग्रह ३:८; भजन संग्रह ९:२०; भजन संग्रह १०:१२; भजन संग्रह १७:१३; भजन संग्रह ६८:२; भजन संग्रह १३२:८
36 मिनु मेको कबल पशो सन्दोस नाइक्तमेनु, मेकोमी “परमप्रभु यावे, गे हजार, हजार इस्राएली आन दातेमी लेश्शा, जाक्कीन” देंबाक्त।