13
कनान रागी कली क्यारी पशो
ब्यवस्था १:१९-२५
1 मिनु परमप्रभु यावेमी मोसा कली
2 “गे कनान रागी क्यारी पाइब मुरपुकी सोइक्तो। गो मेको रागी इस्राएली आन कली गेनुङ। मेको आन थर थर रे पा मुर का का सोइक्तो। मेको आन मुर आन दाते ङा ठेयब मुर दुम्चा माल्नीम” देंत।
3 मिनु परमप्रभु यावे आ देंशो खोदेंशो पा, मोसामी मेको क्यारी पाइब आन कली पारान ङा गोरशो रागी रे सोइक्ताक्मी। मेको नेल्ले इस्राएली आन दाते ङा ठेयब मुर बाक्तेक्म।
4 मिनु सु सु बाक्तेक्म देंशा हना, रूबेन आ थर रे जाक्कुर आ तौ शम्मुआ,
5 सिमियोन आ थर रे होरी आ तौ शाफात,
6 यहूदा आ थर रे यपुन्ने आ तौ कालेब, यहोसु १४:७
7 इस्साकार आ थर रे योसेफ आ तौ इगाल,
8 एफ्राइम आ थर रे नून आ तौ होशेआ, गन्ती १३:१६
9 बेन्यामीन आ थर रे रफु आ तौ पाल्ती,
10 जबूलून आ थर रे सोदी आ तौ गददीएल,
11 योसेफ आ तौ मनस्से आ थर रे सूसी आ तौ गाददी,
12 दान आ थर रे गेमल्ली आ तौ अम्मीएल,
13 आशेर आ थर रे मिकाएल आ तौ सेथुर,
14 नाप्ताली आ थर रे वोफ्सी आ तौ नाहबी,
15 गाद आ थर रे माकी आ तौ गूएल बाक्तेक्म।
16 मिनु मोसामी मेको रागी कली क्यारी पथ सोइश्शो मुर आन नें एकोन बाक्नीम। मोसामी नून आ तौ होशेआ आ नें यहोसु वोइक्तु। गन्ती ११:२८; १इतिहास ७:२७
17 मोसामी मेको आन कली कनान रागी कली क्यारी पथ सोइक्ताक्मी। मिनु मोसामी मेको आन कली “गे एक रे लशा, नेगेब माइश्शो दक्खिन ङा रागी रे पहाड गे लने।
18 मेको रागी दोदेंशो बाक्मे, मेकेर ङा मुरपुकी बोल्यो बाक्मा कों, मबाक्मा, शुश बाक्मा कों, इच्का खोइ ला बाक्मा? मेको नेल्ल कोव़ङीन।
19 मिनु मेको आन रागी रिम्शो बाक्म कों, मरिम्शो बाक्म? मिनु मेको आन सहर गारो हिरशो बाक्म कों महिरशो बाक्म?
20 मिनु मेको रागी ङा खप दोदेंशो बाक्मे, मलिलो बाक्म कों, पाङकोक्च बाक्म? मेकेर रवापुकी बाक्मा कों, मबाक्मा? महिंब दुमीन। मिनु मेको रागी ङा फल फुल चाक्कीन” दे माइक्तीमी। मेना ङोंइती ङा अङगुर मीची जाक्शो बाक्त।
21 मिनु मेकोपुकी ग्येत्थ लशा, जीन ङा गोरशो रागी रे रेहोब सम्म मेको रागी क्यारी पाम्तेक्म। रेहोब लेबो-हमाथ आ नेक्था बाक्माक्त।
22 मिनु मेकोपुकी नेगेब गे ग्येत्थ लशा, हेब्रोन सहर जाक्दीम्मा बाक्त। मेकेर अनाक आ मुर अहीमान, शेशै नु तल्मै बाक्बाक्तेक्म। हेब्रोन चहिं इजीप्त ङा सोआन सहर क्येङा ७ बर्स ङोंइती सेल्शो बाक्त।
23 मिनु नोले एश्कोल ङा दिंममी जाक्दीत्तेक्म। मिनु मेकेर अङगुर सिश्शो राशी क्योरशा, मेको कोक्के कामी शुइश्शा मुर निक्शीमी कुरशा चाक्तेक्स। मेकोपुकीमी अनार नु फोव़शी गेडा यो चाक्तेक्म।
24 मिनु मेको ठेयब अङगुर ख्रोइक्तीके नोले मेको बेंसी आ नें एश्कोल ङा बेंसी वोइक्तेक्म।
क्यारी पथ लाइब आन लोव़
25 मिनु ४० नाक्ती नोले मेकोपुकीमी मेको रागी क्यारी पशा, लेत्तेक्म।
26 मिनु लेश्शा, मोसा, हारून नु इस्राएली नेल्ल आन बाक्तीके, पारान ङा गोरशो रागी कादेशमी जाक्तेक्म। मिनु मेको क्यारी पाइबपुकीमी मोसा, हारून नु मुर नेल्ल आन कली आन तशो शेंताक्मे। मिनु मेको रागी ङा फल फुल कोंइताक्मे। गन्ती २०:१; उत्पत्ती १६:१४; उत्पत्ती २०:१; ब्यवस्था १:१९,४६; यहोसु १४:६-७
27 मिनु मोसा कली “गोपुकी इन सोइश्शो रागीमी जाक्दीत्तक। मेको रागीम थमा पा दूध नु खुदो शुश बाक्ब। मिनु मेको रागी ङा फल फुल एकोन बाक्नीम। प्रस्थान ३:८,१७
28 तन्न मेकेर बाक्ब मुरपुकी बोल्यो बाक्नीम। मिनु मेको आन सहरपुकी गारोम हिरशो नु थम ठेयब बाक्नीम। मिनु गोपुकीमी मेकेर अनाक आ मुर आन कली यो ताइतक।
29 मिनु अमालेक आ मुर नेगेब रागीम बाक्बाक्तेक्म। मिनु हित्ती, यबुसी नु एमोरी पहाडम बाक्बाक्तेक्म। मिनु कनानी ठेयब समुन्द्र आ नेक्था नु यर्दन खोला आ नेक्था बाक्बाक्तेक्म” देंतेक्म।
30 मिनु कालेबमी मोसा आ ङोंइती बाक्शो मुर आन थुं नाइक्पाइक्चा, दे मोसा कली “गोपुकी रीब पा लशा, मेको रागी इं के सेल्य। मारदे हना गो मेको थमा पा ग्राने चाप्नय” देंत। गन्ती १४:६
31 मिनु नोले मेको नु लाइब मुरपुकीमी “गोपुकी मेको मुरपुकी नु लडाइ पथ लने मचाप्नय। मारदे हना मेकोपुकी गो इं क्येङा शुश बोल्यो बाक्नीम” देंतेक्म।
32 मोपा मेकोपुकीमी क्यारी पथ लतीक रागी आ पर्बम मरिम्शो लोव़ नेंपाइश्शा “गोपुकीमी क्यारी पथ लशो रागीमी आ मुर आन कली साइक्ब ताइतक। मिनु आंइ तशो मुरपुकी थम ठेयब बाक्नीम।
33 गोपुकीमी मेकेर नेफीलीमपुकी यो ताइतक। अनाक आ मुर नेफीलीम रे दुम्शो बाक्नीम। मिनु गो मेको आन कली तशा, गो आंमा माले खोदेंशो तांइसाक्क। मिनु गो मेको आन ङोंइती यो मोदेंशोन तांइसीनय” देंतेक्म। ब्यवस्था १:२८; ब्यवस्था ९:२