19
चोव़खेतीक आ पर्बम चढ़ेशो
1 परमप्रभु यावेमी मोसा नु हारून आस कली
2 “गे इस्राएली आन कली ‘परमप्रभु यावेमी ब्रेक्शा अरेशो पचा माल्शो लोव़ का एको बाक्ब। गेपुकी थम रिम्शो मारेइ मदुम्शो गेनायो जवा मलाप्शो लल बी का आंस बाक्तीक चाक्कीन’ देनीस। हिब्रू ९:१३; लेवी २२:२०; ब्यवस्था २१:३
3 मिनु गे मेको बी कली चढ़ेब एलाजर कली गेसे। मिनु मेकोमी मेको बी कली मुर आन बाक्तीक रे ङोन लाइश्शा, आ ङोंइती मेको कली क्योरपाइक्चा माल्ब।
4 मिनु चढ़ेब एलाजरमी आ ब्रेप्चोमी आ हुश ख्रुम्शा, ग्रुम्तीक ताम्बु आ ङोंइती ७ खेयप ब्रुइक्चा माल्ब। लेवी ४:६,१७
5 मिनु नोले मेको बी चढ़ेब आ ङोंइती चोचा माल्ब। आ कुशुल, आ श्ये, आ हुश नु गोबर सुन्दा चोचा माल्ब। लेवी ७:८; लेवी ४:११-१२
6 मिनु चढ़ेबमी लेबानोन ङा लाइश्शो रवा आ शी, हिस्सोप के ब्राक्स, लल रङ ङा ऊन चाक्शा, मेको बी कली जेन्ना जेन्न पशो मीम हुम्चा माल्ब। लेवी १४:६
7 मेको नोले चढ़ेबमी आ वा मुरशा, चिक्सीचा माल्ब। नोले मेको मुर आन बाक्तीके लेन्ने चाप्ब। तन्न मेको चढ़ेब नां मलाक्गा सम्म ग्रांग्रा दिशो बाक्ब। लेवी १६:२८
8 मिनु नोले मेको बी चोइबमी आ वा मुरशा, चिक्सीचा माल्ब। मेको नां मलाक्गा सम्म ग्रांग्रा दिशो बाक्ब।
9 मिनु ग्रांग्रा मदिशो मुर कामी मेको बी कली चोशो पुलु खुप्शा, मुर आन बाक्तीके रे ङोन ग्रांग्रा मदिशो बाक्तीकेम वोइक्चा माल्ब। मेको इस्राएली आन कली चोव़खेतीक ब्वाक्कु सेल्चा कली बाक्ब। मेको चोव़खेसीचा कली चढ़ेतीक बाक्ब।
10 मिनु मेको बी चोशो पुलु हुइक्बमी यो आ वा मुरचा माल्ब। मिनु नां मलाक्गा सम्म मेको ग्रांग्रा दिशा बाक्ब। मेको इस्राएलीपुकी नु मेकोपुकी नु बाक्ब अर्को रागी ङा मुर नेल्ल आन कली पचा माल्शो गेय बाक्ब।
11 मिनु सुमी बेक्शो मुर कली थीबा, मेको ७ नाक्त सम्म ग्रांग्रा दिशोन बाक्ब।
12 मिनु मेकोम मेको सां नाक्तीम ब्वाक्कु चोव़खेसीचा माल्ब। मिनु ७ नाक्तीम लेंशा चोव़खेसीचा माल्ब। मिनु मेको ग्रांग्रा मदिशो दुम्ब। तन्न मेकोमी सां नाक्त नु ७ नाक्त मचोव़खेसाक्व हना, मेको ग्रांग्रा दिशा बाक्ब।
13 मिनु सुमी बेक्शो मुर थिशा, मचोव़खेसीबा, मेकोमी परमप्रभु यावे आ ताम्बु ग्रांग्रा दिशो सेल्ब। मेको मुर इस्राएली आन दाते रे तिल्चा पुंइसीब। मारदे हना चोव़खेतीक ब्वाक्कु मेको आ तार मब्रुइश्शो बाक्ब। मोपतीके मेको ग्रांग्रा दिशो बाक्ब। मिनु मेको आ ग्रांग्रा दितीके मेको नु लीब। लेवी १५:३१
14 मिनु मुर आ ताम्बुम बेक्त हना, मेको आ पर्बम पचा माल्शो गेय मार बाक्ब देंशा हना, सु मेको ताम्बुम बाक्बा, सु मेको ताम्बुम जाक्बा, मेको ७ नाक्त सम्म ग्रांग्रा दिशो बाक्नीम।
15 मिनु मसुम्शो ग्योंब नेल्ल ग्रांग्रा दिशो बाक्नीम।
16 मिनु सुमी लांम तरवारम साइक्चा पुंइसीशो मुर बाक्त हना यो, आंमा बेक्शो मुर बाक्त हना यो, मुर आ रुश बाक्त हना यो, मेको थीब मुर ७ नाक्त सम्म ग्रांग्रा दिशो दुम्ब।
17 मिनु मुरुमी मेको ग्रांग्रा दिशो मुर कली चोव़खेचा कली चढ़ेतीक पुलु ग्योंबुम कुर पा नक ब्वाक्कु लुक्चा माल्ब।
18 मिनु नोले ग्रांग्रा मदिशो मुर कामी हिस्सोप के ब्राक्स मेको चोव़खेतीक ब्वाक्कुम नुप्शा, मेको बेक्शो मुर आ ताम्बु, मेकेर बाक्शो मारेइ मारेइ, मेक बाक्ब मुर आन कली, रुश थीब मुर आन कली, साइक्चा पुंइसीशो मुर थीब, बेक्शो मुर नु तुरस थीब मुर आन कली मेको ब्वाक्कु ब्रुइक्चा माल्ब।
19 मिनु ग्रांग्रा मदिशो मुरुमी सां नाक्तीम नु ७ नाक्तीम ग्रांग्रा दिशो मुर आन कली मेको चोव़खेतीक ब्वाक्कु ब्रुइक्चा माल्ब। मिनु ७ नाक्तीम मेको आन कली चोव़खेतीके नुप्ब। मिनु नोले मेकोपुकीम आन वा मुरशा, आन रां चिक्सीचा माल्नीम। मिनु मेकोपुकी नां लाक्गा नोले ग्रांग्रा मदिशो दुम्नीम। गन्ती १९:१२-१३
20 मिनु सु ग्रांग्रा दिशो दुम्शा यो, मचोव़खेसीबा, मेकोमी परमप्रभु यावे आ ताम्बु ग्रांग्रा दिशो सेल्ब। मेको मुर इस्राएली आन दाते रे तिल्चा पुंइसीब। मारदे हना चोव़खेतीक ब्वाक्कुम मेको कली मब्रुइश्शो बाक्ब। मोपतीके मेको ग्रांग्रा दिशोन बाक्ब।
21 मिनु मेको, मेको कली गेना हना यो आ पतीक दुम्ब। मिनु मेको ब्वाक्कु ब्रुइक्ब मुरुम आ वा मुरचा माल्ब। मिनु सुमी चोव़खेतीक ब्वाक्कु थीबा, मेको नां मलाक्गा सम्म ग्रांग्रा दिशो दुम्शो बाक्ब।
22 ग्रांग्रा दिशो दुम्शो मुरुमी मार थिवा, मेको नेल्ल ग्रांग्रा दिशो दुम्नीम। मिनु सुमी मेको ग्रांग्रा दिशो थोव़क थीबा, मेको यो नां मलाक्गा सम्म ग्रांग्रा दिशो दुम्ब” देंत।