5
मुर बाक्तीक ग्रांग्रा मसेल्चा
1 परमप्रभु यावेमी मोसा कली
2 “गे इस्राएली आन कली गेपुकीमी कोव़र खोदेंशो रोइ पाइब, आन रां रे ग्रांग्रा दिशो यिशो नु बेक्शो मुर थिशा ग्रांग्रा दुम्शो मुर आन कली इन बाक्तीक क्येङा ङोन वोइक्चा माल्नीनी। लेवी १३:४६; लेवी १५:२; गन्ती ९:६-७
3 मोदेंशो वोंइश मुर नु मीश मुर नेल्ल आन कली मुर आन बाक्तीके क्येङा ङोन वोइक्चा माल्नीनी। मेकोपुकीमी मुर आन बाक्तीके ग्रांग्रा दिशो सेल्चा मदुम्नीम। मारदे हना गो इन दातेमी बाक्शो बाक्नुङ” देंत। गन्ती १२:१४-१५; प्रस्थान २५:८
4 मिनु इस्राएलीपुकीमी मो पाम्तेक्म। मोदेंशो मुर आन कली मुर आन बाक्तीके क्येङा ङोन वोइक्तेक्म। परमप्रभु यावेमी मोसा कली अरेशो खोदेंशो पा इस्राएलीपुकीमी पाम्तेक्म।
खुइ पशो आ पर्बम शेंशो
5 मिनु लेंशा परमप्रभु यावेमी मोसा कली
6 “गे इस्राएली आन कली ‘मीश मुर, वोंइश मुर सु बाक्त हना यो, परमप्रभु यावे आ ङोंइती पाप पा अरु मुर आन कली मारेइ मरिम्शो पाप्तु हना, मेको मुर दोस ताइब दुम्ब। लेवी ५:२१-२६
7 मिनु मेकोमी आ मरिम्शो पशो शोव़चा माल्ब। मिनु मेको मुरुमी आ खुइ पशो नेल्ल लेश्शा गेशा, मेको क्येङा यो ५ भाग तेम्शा गेचा माल्ब।
8 तन्न मेको खुइ पचा पुंइसीशो मुर बेक्शा, मेको के सुइ मबाक्तेक्म हना, मेको पाप आ पर्बम थाप्शो परमप्रभु यावे के दुम्शा, चढ़ेब आन के दुम्ब। मिनु आ पाप क्याम्तीक गेय पचा कली सांड का गेचा माल्ब।
9 मिनु इस्राएलीपुकीमी आन परमप्रभु यावे कली गेशो क्युक्शा चढ़ेतीक नेल्ले चढ़ेब कली गेचा माल्नीम। मिनु मेको चढ़ेब केन दुम्ब। गन्ती १८:८
10 मिनु मुर नेल्ल आन परमप्रभु यावे कली गेशो, मेको केन दुम्ब। मार गेम्तेक्म हना यो, मेको चढ़ेब केन दुम्ब’ दे अरेमी” देंत।
मीश मुर कली नाक्शो
11 मिनु परमप्रभु यावेमी मोसा कली
12 “गे इस्राएली आन कली ‘सुइ आन मीश हेंथे गाक्शा, आ वोंइश कली मरिम्शो पाप्तु हना,
13 अरु वोंइश मुर नु इप्त हना, मेको आ वोंइश रे ख्रुइश्शो बाक्त हना, मेकोमी सुइम मतुइक्थु, ग्रांग्रा दिशो सेल्सीशो बाक्त हना यो, मेको सुइम थित्चा मपुंइसीशो बाक्त हना यो,
14 मेको वोंइश मुरुमी आ ग्रांग्रा दिशो सेल्सीशो मीश आ पर्बम रुश पा, आ थुंम मरिम्शो मिम्शो बाक्त हना, मेको आ मीश आंम कली ग्रांग्रा दिशो मसेल्सीशो बाक्त हना यो,
15 मेको वोंइश मुरुमी आ मीश कली चढ़ेब आ बाक्तीके चाक्चा माल्ब। मिनु मेको आ मीश आ पर्बम एफाह का ङा १० भाग ङा भाग का क्योव़ज फस चाक्चा माल्ब। मेको आ तारी तेल लुक्चा नु धूप वोइक्चा मदुम्ब। मारदे हना मेको रुश पशो आ पर्बम अन्न चढ़ेतीक बाक्ब। मेको अन्न चढ़ेतीक मरिम्शो पशो मिम्चा कली बाक्ब। एफाह का २२ लिटर ङा पुक्तीक बाक्ब।
16 मिनु चढ़ेबमी मेको मीश मुर कली आ नेक्था चाक्शा, परमप्रभु यावे आ ङोंइती राप्पाइक्चा माल्ब।
17 मिनु चढ़ेबमी खप के ग्योंबुम नक ब्वाक्कु चाक्चा माल्ब। मिनु मेकोमी ग्रुम्तीक ताम्बु ङा खप ङा फुरक इच्का हुइश्शा, मेको ब्वाक्कुम कुर पचा माल्ब।
18 मिनु चढ़ेबमी मेको मीश मुर कली परमप्रभु यावे आ ङोंइती राप्पा, मेको आ चां प्रुइक्चा माल्ब। मिनु मेकोमी मेको मिम्चा कली अन्न चढ़ेतीक आ गुइमी वोइक्चा माल्ब। मेको रुश पशो आ पर्बम अन्न चढ़ेतीक बाक्ब। मिनु मेको चढ़ेबमी मेको सराप चीले रशो कशो ब्वाक्कु आ गुइमी ग्याइक्चा माल्ब।
19 मिनु चढ़ेबमी मेको मीश मुर कली कसम जपाइश्शा “थमा पा गे सुइ वोंइश मुर नु मइप्शो बाक्ते हना, इ वोंइश नु बाक्शा, हेंथे मगाक्थु, इ कली ग्रांग्रा दिशो मसेल्सीशो बाक्ते हना, एको कशो ब्वाक्कु तूङीनु, गे सराप चीले मराइनेवे।
20 तन्न गे इ वोंइश नु बाक्शा यो, हेंथे गाक्शा, ग्रांग्रा दिशो सेल्सीशो बाक्ते हना, गे अरु वोंइश मुर नु इप्शो बाक्ते” हना, देंशा,
21 चढ़ेबमी मेको मीश मुर कली सराप चीले रतीक कसम जपाइक्चा माल्ब। मिनु मेकोमी मीश मुर कली “परमप्रभु यावेमी इ कोव़ज होम्पाइक्तीक नु देल्लो सोव़पाइक्तीक रोइ पपाइश्शो तशा, गे इ मुर आन दातेमी हिंचा ङा कोंइतीक दुम्नेवे।
22 एको सराप चीले रतीक ब्वाक्कु इ कोव़जम ओव़शा इ कोव़ज होम्तीक नु इ देल्लो सोव़तीक रोइ पपाइक्ब” देंचा माल्ब। मिनु मेको मीश मुरुमी “आमेन, मोदेंशोन दुम्ल” देंचा माल्ब।
23 मिनु नोले चढ़ेबमी मेको सराप चीले कागजम ब्रेक्शा मेको कशो ब्वाक्कुम मेको कागज कली मुरचा माल्ब।
24 मिनु नोले मेकोमी मेको मीश मुर कली मेको सराप चीले बाक्शो कशो ब्वाक्कु तूपाइक्चा माल्ब। मिनु मेको सराप चीले बाक्शो ब्वाक्कु मेको मीश मुर आ कोव़जम ओव़शा मेको कली शुश खाइक्पाइक्ब। भजन संग्रह १०९:१८
25 मिनु चढ़ेबमी मेको रुश पतीक आ पर्बम चढ़ेशो अन्न मेको मीश मुर आ गुइ रे लाइश्शा, परमप्रभु यावे आ ङोंइती क्युक्शा, चढ़ेतीकेम चाक्चा माल्ब।
26 मिनु चढ़ेबमी मेको अन्न चढ़ेतीक रे मिम्चा कली योल का हुइश्शा चढ़ेतीकेमी चोचा माल्ब। मिनु नोले मेको कली मेको ब्वाक्कु तूपाइक्चा माल्ब।
27 मिनु मेकोमी मेको मीश मुर कली मेको ब्वाक्कु तूपदानु, मेको ग्रांग्रा दिशो दुम्शो बाक्त हना, नु आ वोंइश कली मरिम्शो पशो बाक्त हना, मेको सराप चीले बाक्शो कशो ब्वाक्कु मेको आ आगा ओव़शा, शुश खाइक्पाइक्ब। मेको आ कोव़ज होम्ब। मिनु मेको आ देल्लो सोव़ब। मिनु मेको मीश मुर आ मुर आन दातेमी हिंचा ङा कोंइतीक दुम्ब।
28 तन्न मेको मीश मुरुम आंम कली ग्रांग्रा दिशो मसेल्सीशो नु मरिम्शो मपशो बाक्त हना, मेको ब्वाक्कु मखाइक्थु, आल थीब दुम्ब।
29 आ वोंइश नु बाक्शा यो, हेंथे गाक्शा ग्रांग्रा दिशो सेल्सीशो मीश मुर आ पर्बम रुश पाइब वोंइश कली अरेशो लोव़ बाक्ब।
30 मिनु वोंइश मुर रुश पाइब दुम्शा, आ मीश आ पर्बम रुश पाप्तु हना, मेकोमी आ मीश परमप्रभु यावे आ ङोंइती राप्पाइक्चा माल्ब। मिनु चढ़ेबमी मेको अरेशो लोव़ नेल्ले मेको मीश मुर आ पर्बम पचा माल्ब।
31 मिनु मेको वोंइश मुर दोस मताइब दुम्ब। मिनु आ मीशेमी चहिं आ मरिम्शो पशो राइब’ दे इस्राएली आन कली शेंदो” दे परमप्रभु यावेमी मोसा कली देंत।