4
थुं का ङा दुमीन
1 मोपतीके आं दाक्शो लोक्बपुकी, प्रभु कली थमा सुइश्शा, खोइल थेक्शा बाक्कीन। गो इन कली दाक्शा शुश मिम्नुङ। गेपुकीम आं कली ग्येरपाइश्शा, आं ग्रातीक सिरपेच खोदेंशो दुम्तीनी। २कोरिन्थी १:१४; १थिस्सलोनिकी २:१९-२०
2 इयोदीया नु सुन्तुके “प्रभु कली थमा सुइश्शा थुं का दुमीस” देंती।
3 मिनु गो नु गेय पाइब वारच, इ कली “मेको मीश मुर निक्शी आस कली वारच पावो” देंती। मारदे हना मेको निक्शीमी गो नु काथ काथा ग्येरपाइक्ब लोव़ शेंतीक गेय पाम्ताक्से। क्लेमेन्त नु अर्को वारच आन कली यो वारच पाम्ताक्से। मेको नेल्ल आन नें ब्रोंइतीक किताबमी ब्रेक्शो बाक्ब। लूका १०:२०
परमप्रभुमी गेशो थुं नाइक्तीक
4 प्रभु नु बाक्शा गेना हना यो ग्येरसीन। गो लेंशा “ग्येरसीने” देंनुङ। फिलिप्पी ३:१; २कोरिन्थी १३:११; १थिस्सलोनिकी ५:१६
5 इन रिम्शो पतीके मुर नेल्ल आन कली कोंइदीने। प्रभु जाक्चशो बाक्ब। तीतस ३:२
6 सुर्ता मपने। परमप्रभु यावे नु लोव़ पा, इन माल्शो पुंइशा “गे रिम्शो पाइब बाक्नीनी” दे परमप्रभु यावे कली देनीन। मत्ती ६:२५-३४; १पत्रुस ५:७
7 परमप्रभु यावे आ गेशो थुं नाइक्तीके रुम्ने मचाप्चा ङा ठेयब बाक्ब। मेको थुं नाइक्तीके इन थुं नु इन मिम्शो ख्रीस्त येसु नु बाक्ब। यूहन्ना १४:२७; कलस्सी ३:१५
8 आं लोक्बपुकी, आं नेल्ल क्येङा नोले ङा लोव़ मार बाक्ब देंशा हना, तेको थमा बाक्बा, तेको शिरशो बाक्बा, तेको ठीक बाक्बा, तेको ग्रांग्रा मदिशो बाक्बा, तेको दाक्चा ङा बाक्बा, तेको रिम्शो लोव़ बाक्बा, तेको नेल्ल क्येङा रिम्शो नु दोस गेचा मपुंइसीब बाक्बा, तेको “रिम्शो पाइब” दे माइक्चा पुंइसीब बाक्बा, मेको आ पर्बम मिम्तीन।
9 गो इन कली मार शेंदु, गे मार रुम्नी, मार नेंनी, आं कली मार पशो तनी, मेकोन पने। मो पाइतीनी हना, इन थुं नाइक्चा गेब परमप्रभु यावे गेपुकी नु बाक्ब।
गेचा नु ताक्चा आ पर्बम
10 गो प्रभु नु बाक्शा शुश ग्येरसीनुङ। मारदे हना शुश नाक्त नोले गे आं कली लेंशा मिम्ताक्नी। गेपुकीमी आं कली नेल्ल नाक्त थमा पा मिम्शा बाक्तीनी। तन्न ङोंइती मारेइ सोइक्ने मचाप्शो बाक्तीनी। मुल चहिं सोइक्ताक्यीनी।
11 गो श्येत जचा आ पर्बम लोव़ मपाइनुङ। मार दुम्त हना यो, ग्येरसीशा बाक्चा, दे शेंसीशो नङ। १तिमोथी ६:६
12 प्रुङग दुम्चा नु शोंप पाइश्शो दुम्चा, दोपा बाक्मे, गो मेको निम्फा तुइक्नुङ। गो गेना हना यो रूशा बाक्चा नु शोव़लु बेक्शा बाक्चा, निम्फा शेंसाक्यी। मोपा शुश बाक्त हना यो, काइ मबाक्त हना यो आं कली ठीक दुम्ब। २कोरिन्थी ६:१०
13 आं कली सक्ति गेब आ नेंमी गो नेल्ल पने चाप्नुङ। २कोरिन्थी १२:१०
14 दोदेंब दुम्त हना यो, गेपुकीम आं कली वारच पशा रिम्शो पाइतीनी।
15 ग्येरपाइक्ब लोव़ शेंचा ङोंइती मासीडोनीया रागी प्रोंइशा लङा नोले, सुइमी आं कली वारच मपामे, गे फिलिप्पीपुकीम ला पाइतीनी। गेपुकीम आं शेंशो ताइतीनी, मिनु इन वारच पशो गो ताता। २कोरिन्थी ११:९
16 थिस्सलोनिकी सहरमी बाक्ङानु यो, गे निक्शी खेयप वारच पा क्येट सोइक्ताक्यीनी।
17 इन गेशो क्येट ममिम्नुङ, तन्न परमप्रभु यावेमी इन मो पशो तशा, इन कली रिम्शो पाइब। गो मोदेंशो तचा दाक्नुङ।
18 गो मार मार माल्ङा, आं माल्शो क्येङा शुश ताता। इपाफ्रोडीटसमी इन सोइश्शो क्येट गेती। मेको ब्रोव़शो रिना पाइश्शो परमप्रभु यावे कली चढ़ेशो खोदेंशो बाक्ब। परमप्रभु यावे इन मो पशो तशा ग्येरसाक्व। फिलिप्पी २:२५
19 मिनु आं परमप्रभु यावेमी इन माल्शो नेल्ल आ स्वर्ग ङा बाक्तीक येसु ख्रीस्त आ पतीक रे शुश गेब।
20 इं आफ परमप्रभु यावे कली गेना हना यो ठेयब सेल्य। आमेन।
नोले ङा लोव़
21 ख्रीस्त येसुमी बाक्शो थमा सुइक्ब नेल्ल आन कली “रिम्शो बाक्कीन” मतीन। गो नु बाक्ब लोक्बपुकीमी “रिम्शो बाक्कीन” देंतेक्म।
22 सिजर आ खिं ङा नु अरु थमा सुइक्ब नेल्लेमी यो इन कली “रिम्शो बाक्कीन” देंतेक्म। फिलिप्पी १:१३
23 प्रभु येसु ख्रीस्त आ शिशी गेपुकी नु बाक्ल।