12
परमप्रभु आ अरेशो टिचा माल्शो
1 सु सुमी शेंसीतीके दाक्नीमी, मेकोमी जोक्तीक दाक्नीम। सुमी हुइक्तीक काइ मदाक्नीमी, मेको निप्स मपाइश्शो बाक्नीम। हितोपदेस १३:१; हितोपदेस १३:१८
2 परमप्रभु यावेमी रिम्शो पाइब मुर आन कली दाक्ब। दूली मिम्शा हेंथे पाइब आन कली चहिं दोस गेब।
3 परमप्रभु यावे आ अरेशो मटीब रिम्शो मबाक्नीम। तन्न ठीक पाइब बोल्यो शाक्श पाइश्शो रवा खोदेंशो बाक्नीम।
4 रिम्शो मीश आ वोंइश आ सिरपेच खोदेंशो बाक्ब। मुने तोक्ब मीश चहिं आ वोंइश कली राक्शो रुश खोदेंशो बाक्ब। हितोपदेस ३१:१०-३१
5 ठीक पाइब मुर आन मिम्शो ठीक बाक्ब। तन्न परमप्रभु यावे आ अरेशो मटीब आन अर्ती चहिं दूली बाक्ब।
6 परमप्रभु यावे आ अरेशो मटीब आन लोव़ मुर साइक्तीक बाक्ब। तन्न रिम्शो थुं पाइश्शो मुर आन लोव़मी मेको आन कली प्रोंइब।
7 परमप्रभु यावे आ अरेशो मटीबपुकी बेक्शा जाम्शा लाइनीम। ठीक पाइब नु मेको आन खिं ङा मुर नोले सम्म लीनीम। हितोपदेस १०:२५
8 निप्स पाइश्शो मुरपुकी मान ताइनीम। दूली थुं पाइश्शो मुर आन कली चहिं महिक्नीम।
9 “ठेयब मुर नङ” देंखु पा जचा मताइब मुर दुम्चा क्येङा महिक्सीशो दुम्शा, वाइल का बाक्शो रिम्शो बाक्ब।
10 ठीक पाइब मुरपुकीमी आंम बी ब्यफ, क्यारश भेडा आन कली रिम्शो कोव़नीम। तन्न परमप्रभु यावे आ अरेशो मटीबपुकीमी शिशी मपाइनीम। प्रस्थान २३:५
11 सु सुमी आंम रूम शोक्नीमी, मेकोमी जचा शुश ताइनीम। तन्न सु सुमी शोर गाक्शो लोव़ पा गाक्नीमी, मेको निप्स मपाइश्शो बाक्नीम। हितोपदेस २८:१९
12 परमप्रभु यावे आ अरेशो मटीबपुकी रोइश्शो थोव़कीम आस पाइनीम। तन्न ठीक पतीके आ शाक्शम फल सिप्पाइक्ब।
13 मरिम्शो पाइब मुर आंम मरिम्शो लोव़मी ग्याइक्चा पुंइसीनीम। तन्न ठीक पाइब मुर श्येत रे ब्रोंइचा ताइनीम।
14 मुरपुकी आंम लोव़म पतीके मान ताइनीम। मिनु गेय पाइब मुरपुकीमी आन गेय ङा इनाम ताइनीमी। हितोपदेस १८:२०
15 मूर्खपुकी आंम लां नेल्ले “ठीक बाक्ब” दे मिम्नीम। तन्न जोक्ब तुइक्बमी अर्ती नेंनीम।
16 मूर्खपुकीमी आन गाइक्चा रीब पा कोंइनीम। तन्न होस पाइश्शो मुर कली मरिम्शो लोव़ पाम्तेक्म हना यो, सिक्सी पा बाक्ब।
17 सुमी थमा लोव़ पाइबा, मेकोमी ठीक पतीके कोंइब। तन्न जोल पाइब सांकछीमी गेना हना यो दूली लोव़ पाइब।
18 मुर आन ममिम्थु पशो लोव़मी तरवार खोदेंशो पा थोक्ब। तन्न जोक्ब तुइक्ब मुर आन लोव़मी सापाइक्ब। हितोपदेस १३:३
19 थमा लोव़ पाइब मुर गेना हना यो लीनीम। तन्न जोल पाइब मुर याम का ला लीनीम।
20 मरिम्शो मिम्ब आन थुंमी जोल ला बाक्ब। तन्न थुं नाइक्तीक अर्ती गेब ग्येरशा बाक्नीम।
21 ठीक पाइब मुर आन कली श्येत मदुम्ब। तन्न परमप्रभु यावे आ अरेशो मटीब आन कली श्येतम गिल्शो बाक्नीम।
22 परमप्रभु यावेम जोल पाइब आन कली तशा ग्रांग्रा दीब। जोल मपथु, आ अरेशो टीब आन कली तशा ग्येरसीब।
23 निप्स पाइश्शो मुरुमी आ तुइश्शो मकोंइब। तन्न मूर्खमी मूर्ख लोव़ पाइब।
24 शुश गेय पाइब मुर हुकुम पाइब दुम्नीम। तन्न अल्सी पाइब चहिं वाइल दुम्नीम।
25 सुर्ता पतीकेम मुर आन थुं लुक्च लपाइक्ब। तन्न रिम्शो लोव़मी मेको आन कली ग्येरपाइक्ब। हितोपदेस १६:२४
26 ठीक पाइबपुकीमी आन वारच आन कली रिम्शो अर्ती गेनीम। तन्न परमप्रभु यावे आ अरेशो मटीबपुकीमी दूली लां कोंइनीम।
27 अल्से सिखारीम सिखार मताइनीम। तन्न शुश गेय पतीकेमी मुर आन कली शोंप पाइश्शो सेल्ब।
28 ठीक पतीक लांमी ब्रोंइतीक बाक्ब। मेको लां गाक्बपुकी मबेक्नीम।