14
दाल्गीर मपथु गेय पचा
1 मिनु का निक्शी आन थमा सुइक्तीके बोल्यो मदुम्शो बाक्त हना यो, इन ग्रुम्तीकेमी जाक्चा गेन। तन्न मेको नु आन मिम्तीक आ पर्बम लोव़ मपने। रोमी १५:१; १कोरिन्थी ८:९
2 मुर कामी नेल्ल जचा दुम्बा, दे मिम्बा, आ थमा सुइक्तीकेम बोल्यो मदुम्शो मुरुम चहिं गिग खाइ ला ब्वाइब। उत्पत्ती १:२९; उत्पत्ती ९:३
3 मिनु श्ये ब्वाइबमी श्ये मब्वाइब आन कली आइक्च मसेलीन। मिनु श्ये मब्वाइबमी श्ये ब्वाइब आन कली यो दोस मगेन। मारदे हना जचा ब्वचामी मारेइ मपाइब। परमप्रभु यावेमी मुर आन कली कांइचीक पा दाक्शा, आ मुर सेल्तीमी। कलस्सी २:१६
4 मुर आन गेय पाइब कली निसाफ पाइब गे सु बाक्ने? आ होव़पमी ला मेको कली निसाफ पाइब। मेको ठीक दुम्ने चाप्ब, मारदे हना परमप्रभु यावेमी मेको कली ठीक सेल्ने चाप्ब। मत्ती ७:१; याकूब ४:११-१२
5 का निक्शी मुरुमी नेल्ल नाक्त कांइचीक मिम्नीम। का निक्शीम चहिं नाक्त का कली ठेयब मिम्नीम। तन्न मार रिम्शो बाक्बा, मेको आंमा तुइक्चा माल्नीम। गलाती ४:१०
6 थमा सुइक्बपुकीमी नाक्त का कली ठेयब मिम्तमेनु, परमप्रभु यावे कली मिम्शा ठेयब मिम्नीम। श्ये ब्वामेनु, परमप्रभु यावे कली मिम्शा ब्वाइनीम। श्ये मब्वाइबपुकीमी यो परमप्रभु यावे कली “गे रिम्शो पाइब बाक्नीनी” दे मिम्शा मब्वाइनीम।
7 गो नेल्ल आंम कली मब्रोंइनय, आंम कली मबेक्नय।
8 ब्रोंइतय हना यो, परमप्रभु यावे आ नें ठेयब सेल्चा कली ब्रोंइय। बेक्तय हना यो, परमप्रभु यावे आ नें ठेयब सेल्चा कली बेक्य। ब्रोंइतय हना यो, बेक्तय हना यो, परमप्रभु यावे आ मुर नय। २कोरिन्थी ५:१५; गलाती २:२०
9 मारदे हना ख्रीस्त बेक्शा, बेक्शो रे सेंसीशा, नेल्ल आन कली कोव़ब दुम्त। बेक्शो, ब्रोंइशो मुर नेल्ल आन प्रभु बाक्ब।
10 मिनु मार, इं लोक्ब आन कली नाक्चा दुम्बा ङा? आइक्च सेल्चा दुम्बा ङा? काबु नाक्ती परमप्रभु यावेमी नेल्ल इं कली आ ठेयब नित्तीक आ ङोंइती खुप्शा, का का पा निसाफ पाइब। मत्ती २५:३१-३२; प्रेरित १७:३१; २कोरिन्थी ५:१०
11 मारदे हना “प्रभुमी गो ब्रोंइशा बाक्शो खोदेंशो पा, मुर नेल्लेमी आं ङोंइती आन पोक्च थेक्नीम। मिनु नेल्लेमी परमप्रभु यावे कली ठेयब सेल्नीम” दे ब्रेक्शो बाक्ब। यसैया ४५:२३; फिलिप्पी २:१०-११
12 गो नेल्लेमी परमप्रभु यावे आ ङोंइती मार पशो बाक्या, मेको का का पा शोव़चा माल्नय।
13 मोपतीके आंम आंमा मनाक्मुय। थमा सुइक्ब लोक्ब आन थुं खाइक्पाइक्चा ङा गेय मपमुय। १कोरिन्थी १०:३३
14 गो प्रभु येसु आ मुर दुम्शा, मारेइ मारेइ जचा थोव़क रिम्शो बाक्ब, दे शेंसाक्ङ। तन्न सुमी ग्रांग्रा दिशो मिम्बा, मेको कली ग्रांग्रा दिशोन दुम्ब। मत्ती १५:११; प्रेरित १०:१५; तीतस १:१५
15 गे मार मार जशा ब्वशा, इ लोक्ब आ थुं खाइक्पाइक्नेवे हना, इ मदाक्तीके कोंइनेवे। इ जचा थोव़कम पतीके इ ख्रीस्त बेक्शो लोक्ब कली खतम मसेलो। १कोरिन्थी ८:११-१३
16 मोपतीके गे मार दाक्नीनी, मेको कली मुरुम ग्रांग्रा दिचा मगेने।
17 परमप्रभु यावे आ राज्य जचा तूचा आ पर्बम ममाइ। परमप्रभु यावे आ सोक्त रे पा थमा सुइक्बपुकीमी रिम्शो गेय पशा, दुशा ग्येरशा बाक्चा आ पर्बम बाक्ब। १कोरिन्थी ८:८; हिब्रू १३:९
18 गे मोपा ख्रीस्त आ गेय पाइतीनी हना, परमप्रभु यावे आ दाक्शो नु मुर आन ङोंइती मान ततीक दुम्ब।
19 मोपतीके दुशा गारशा नु थमा सुइक्तीक थुं बारपाइक्मुशा बाक्य। रोमी १२:१८; रोमी १५:२
20 गे जचा थोव़क आ पर्बम परमप्रभु यावे आ गेय मक्याम्दीने। मारेइ मारेइ जचा ठीक बाक्ब। तन्न होस पने। मारदे हना इन जचा ब्वचामी इन लोक्ब आन थुं खाइक्पाइक्तीनी हना, मरिम्शो दुम्ब।
21 मोपतीके श्ये मब्वथु, अङगुर शांबु मतूथु, इन लोक्ब आन कली थुं मखाइक्पाइक्थु, बाक्चा रिम्शो दुम्ब। रोमी १४:२; १कोरिन्थी १०:२५-२७
22 इ थमा सुइक्तीके परमप्रभु यावे आ ङोंइती बाक्ब। इन जचा थोव़क आ पर्बम दाल्गीर मपाइतीनी हना, गे ग्येरसीशो मुर दुम्नीनी।
23 दाल्गीर पा जाइब चहिं दोस ताइब दुम्ब। मारदे हना आ थमा सुइक्तीक रे मपाइब। मोपा थमा मसुइक्तीक रे पशो गेय नेल्ल पाप बाक्ब।