4
अब्राहाम मिम्शा शेंशो
1 इं किकी अब्राहाममी रिती थिती धर्म पशो तशा, परमप्रभु यावेमी ठीक दुम्पदा ङा? ममाइ।
2 गेय पशा, ठीक दुम्शो हना, मुर आन कली “गो रिम्शो पाइब नङ” देंने चाप्ब वा। तन्न परमप्रभु यावे कली चहिं मो देंने मचबा बाक्त।
3 मार ब्रेक्शो बाक्ब देंशा हना “अब्राहाममी परमप्रभु यावे कली थमा सुइक्तु। मिनु परमप्रभु यावेमी ठीक दुम्पाइक्तु” दे ब्रेक्शो बाक्ब। उत्पत्ती १५:६; गलाती ३:६
4 गेय पाइबपुकीमी गेय पशो ङा गाल्च ताइनीम। तन्न शिशी पा गेशो ममाइ। रोमी ११:६
5 तन्न सुमी गेय मपाइब, ङोंइती मटीब मुर आन कली ठीक पाइब कली थमा सुइक्बा, मेको आ थमा सुइक्तीके ठीक बाक्ब। रोमी ३:२६
6 इं किकी दाऊदमी “मुरुमी गेय मपथु, ठीक दुम्शा, मेको ग्येरसीशो मुर बाक्नीम, दे परमप्रभु यावे आ देंशो बाक्ब” देंशो बाक्त।
7 परमप्रभु यावे आ अरेशो मटितीके नु आन पाप क्याम्चा पुंइसीशो मुर ग्येरसीशो मुर बाक्नीम।
8 प्रभुमी पाप क्याम्चा पुंइसीशो मुर कली दोस मगेब। मेको ग्येरसीशो मुर बाक्ब। भजन संग्रह ३२:१-२
9 मिनु मुल मार देंचा? ग्येरसीशो मुर ख्रोइक्तीक चिनु ख्रोइश्शो बाक्नीम देय मबाक्नीमी? मारदे हना अब्राहाममी थमा सुइक्तु। मिनु परमप्रभु यावेमी मेको कली ठीक दुम्पाइक्तु।
10 ख्रोइक्तीक चिनु ख्रोइक्चा क्येङा ङोंइती अब्राहाममी परमप्रभु यावे कली थमा सुइक्तु। मिनु परमप्रभु यावेमी आ कली थमा सुइश्शोमी अब्राहाम कली ठीक दुम्पाइक्तु।
11 आ थमा सुइश्शोमी ठीक दुम्पाइक्चा कली ख्रोइक्तीक चिनु छाप खोदेंशो पा ताप्तु। मारदे हना मेको ङोंइतीन थमा सुइक्ब बाक्त। मोपतीके मेको ख्रोइक्तीक चिनु मख्रोइश्शो थमा सुइक्ब, ठीक दुम्शो नेल्ल आन आफ दुम्त। उत्पत्ती १७:१०-११
12 अब्राहामम ख्रोइक्तीक चिनु ख्रोइक्ब आन आफ ला ममाइ, ख्रोइक्तीके चिनु मख्रोइक्थु थमा सुइक्ब आन लां गाक्ब आन आफ यो दुम्त। मत्ती ३:९
13 परमप्रभु यावेमी अब्राहाम कली अरेशो लोव़ टितीके लोव़ मगेशो बाक्त। तन्न थमा सुइश्शो तशा “इ चच युइ शुश दुम्शा, रागी नेल्ल ब्रीनीम” दे लोव़ गेशो बाक्त। उत्पत्ती २२:१७-१८
14 अरेशो लोव़ टीब ला परमप्रभु यावे आ मुर दुम्नीम हना, थमा सुइक्तीके नु थोक्शो लोव़ जाम्शा लाइब।
15 मारदे हना परमप्रभु यावे आ अरेशो लोव़मी आ गाइक्तीक पोक्ब। मेको लोव़ मबाक्शो हना, पाप मतुंइस वा। रोमी ३:२०; रोमी ५:१३; रोमी ७:८,१०
16 थमा सुइक्तेक्म हना, शिशी ताइनीम। अरेशो टीबपुकीम यो शिशी ताइनीम। सु सुमी अब्राहामम खोदेंशो पा, परमप्रभु यावे कली थमा सुदमे, मेको आ थोक्शो लोव़ ङा मुर नु अब्राहाम आ आल दुम्नीम।
17 अब्राहाम आ पर्बम “गो इ कली शुश रागी ङा मुर आन किकी सेल्तन” दे ब्रेक्शो बाक्ब। अब्राहाममी “परमप्रभु यावे बेक्शो रे सेंब नु मारेइ मबाक्शो कली बाक्शो खोदेंशो पा ब्रेश्शा सेल्ब” दे थमा सुइश्शो बाक्ब। उत्पत्ती १७:५; २कोरिन्थी १:९; हिब्रू ११:१९
18 “शुश रागी ङा मुर आन किकी सेल्तन” दे परमप्रभु यावे आ गेशो लोव़ थमा सुइश्शा, आस पचा ङा मबाक्माक्त हना यो, आस पा बाक्माक्त। उत्पत्ती १५:५
19 मेको सहे का बर्स दुम्शा, आल मथिथु, आ रां बेक्शो खोदेंशो दुम्शा, आ मीश सारा शुश बर्स दुम्शो बाक्ब, दे तुइश्शा यो थमा सुइक्ना सुइक्न बाक्माक्त। उत्पत्ती १७:१७
20 दाल्गीर मपथु, आ थमा सुइक्चा बारना बारन लशा, परमप्रभु यावे कली ठेयब सेला बाक्त।
21 परमप्रभु यावेमी आ गेशो लोव़ दोपा यो खाप्ने चाप्ब, दे थमा पा तुइश्शो बाक्माक्त। हिब्रू ११:११
22 मोपा थमा सुइश्शोमी परमप्रभु यावेमी अब्राहाम कली ठीक दुम्पाइक्तु। उत्पत्ती १५:६
23 मेको कली ठीक दुम्पाइक्तु, दे ब्रेक्शो लोव़ अब्राहाम कली ला ब्रेक्शो ममाइ।
24 गो नेल्ल इं कली यो ब्रेक्शो बाक्ब। मारदे हना सु सुमी इं प्रभु येसु कली बेक्शो रे सेंपाइक्ब परमप्रभु यावे कली थमा सुइक्नीमी, मेको आन कली ठीक दुम्पाइक्ब।
25 येसु ख्रीस्त इं पाप क्याम्चा कली साइक्चा पुंइसाक्व। मिनु इं कली ठीक दुम्पाइक्चा कलीन बेक्शो रे सेंचा पुंइसाक्व। रोमी ८:३२-३४; यसैया ५३:४-६