2
रूथ सिला माल्दीशो
1 मिनु नाओमी आ वोंइश एलीमेलेक आ खिं ङा शुश शोंप पाइश्शो नु ठेयब मुर का बाक्माक्त। मेको आ नें बोआज बाक्माक्त।
2 मिनु मोआबी रूथमी नाओमी कली “गो रूम लशा, सु सुम आं कली शिशी पाइनीमी, मेको आन नोनोले सिला बाला गुप्दी ङा?” देंमाक्त। मिनु आ शिमीमी “दुम्ब, आं चाइमी लावो” देंमाक्त।
3 मिनु रूथ लशा, रिक्ब आन नोनोले सिला बाला गुबा बाक्त। आ जाक्दीश्शो रू चहिं एलीमेलेक आ खिं ङा मुर बोआज आ रू बाक्माक्त।
4 मेना बोआज बेथलेहेम रे जाक्माक्त। मिनु मेकोमी रिक्ब आन कली “परमप्रभु यावे गेपुकी नु बाक्ल” देंमाक्त। मिनु रिक्बपुकीमी यो “परमप्रभु यावेमी इन कली आसीक गेवल” देंमा बाक्त। रूथ १:२
5 मिनु बोआजमी आ गेय पाइब आन कली कोव़ब कली “एको मीश आल सुम?” दे हिल्लो पवा बाक्त।
6 मिनु मेको गेय पाइब आन कली कोव़ब मुरुमी “एको मोआब रागी रे नाओमी नु जाक्शो मोआबी मीश आल बाक्ब।
7 एकोमी आं कली ‘रिक्ब आन नोनोले मुठा आन नेक्था यो सिला गुप्चा गेयीनी’ दे पुंइतु। मिनु एको सुनी रे इच्कका ला नाइश्शा, सिला गुप्स ङा गुप्स बाक्त” देंमाक्त।
8 मिनु बोआजमी रूथ कली “नेनो, गे अरु आन रू सिला गुप्थ मलावो। आं गेय पाइब मीश मुर आन नेक्थान बाक्को।
9 मुरपुकीम ते ते रिक्नीमी, मेके मेके लावो। आं गेय पाइब वोंइश मुर आन कली ‘इ कली मथिचा’ दे माइक्तामी। तूतू दाक्ते हना, वोंइश मुर आन चाक्शो गर ङा ब्वाक्कु तूङो” देंमाक्त।
10 मिनु रूथ मेको आ ङोंइती बाप्शा, मेको कली “गो अर्को रागी ङा मुर नङ, दे तुइश्शा यो मारदे आं कली इश ङा शिशी पाइय्यीनी?” देंमाक्त। ब्यवस्था २३:४-६
11 मिनु बोआजमी “इ वोंइश बेक्म नोले इ शिमी कली दोदेंशो रिम्शो पवी, मेको नेल्ल मुरपुकीम आं कली माइक्तीमी। गे इ आम आफ, इ जरमेशो रागी प्रोंइशा, मतुइश्शो मुर आंइ बाक्तीके जाक्ते। रूथ १:१६,१७
12 परमप्रभु यावेमी इ कली रिम्शो पवल। परमप्रभु यावे, इस्राएली आन परमप्रभुम इ कली वारच पवल, दे मेको आ नेक्था जाक्ते। मेकोमी इ माल्शो नेल्ल गेवल” देंमाक्त। भजन संग्रह ३६:८
13 मिनु रूथमी “प्रभु, इन ङोंइती शिशी ताता। गे आं थुं नाइक्पाइक्तीनी। गो इन गेय पाइब मबाक्ती हना यो, गे आं कली रिम्शो लोव़ पाइतीनी” देंमाक्त।
14 मिनु लाम्ज जची ना, बोआजमी मेको कली “एक पिवो। शोब्ले जावो। इ शोब्ले अङगुर शांबुम तेप्तो” देंमाक्त। मिनु रूथ रिक्ब मुर नु निस्से बाक्त। मिनु बोआजमी मेको कली कारशो क्योव़ज गेवा बाक्त। रूथमी रूथ्री सम्म जशा, हेंशा वोदा बाक्त।
15 मिनु मेको बोक्शा, सिला गुप्थ लमाक्त। बोआजमी आ गेय पाइब वोंइश मुर आन कली “मेको कली मुठा आन नेक्नेक्था यो सिला गुप्चा गेने, महुइक्तीन।
16 इच्का बाला तोक्शा गेने। मिनु गुबानु, महुइक्तीन” दे माइक्मी बाक्त। लेवी १०:९-१०
17 मोपा रूथ नां रिक्चावा सम्म सिला गुम्ना गुम्न बाक्माक्त। मिनु तुबानु, एफाह का क्योव़ज दुम्माक्त। एफाह का २२ लिटर पुक्तीके खोदेंशो बाक्ब।
18 मिनु मेको कुरशा, सहर जाक्माक्त। आ शिमीमी मिश ङा क्योव़ज गुप्शा, चाक्शो तवा बाक्त। मिनु रूथमी आ हेंशो जचा थोव़क यो ग्रुंइशा, आ शिमी कली गेवा बाक्त।
19 मिनु आ शिमीमी “मुलाक्ती सिला गुप्थ ते लवे? इ कली शिशी पाइब मुर आसीक तवल” देंमाक्त। मिनु रूथमी ते सिला गुबा आ शिमी कली शेंदा बाक्त। “मुलाक्ती आं सिला गुप्शो रू ङा होव़प आ नें बोआज बाक्त” देंमाक्त।
20 मिनु नाओमीमी आ चाइमी कली “परमप्रभु यावेमी मेको कली आसीक गेवल। मिनु बेक्शो नु ब्रोंइशो मुर आन कली शिशी पचा मप्रोन। मेको मुर इस खाल ङा बाक्ब” देंमाक्त। रूथ ४:४
21 मिनु मोआबी रूथमी “मेकोमी आं कली ‘क्योव़ज नेल्ल ओंइने मथुमु सम्म आं मुरपुकी नु सिला गुप्थ जाक्को’ देंत” देंमाक्त।
22 मिनु नाओमीमी “आं चाइमी, मेको आ गेय पाइब मीश मुर नु गाक्चा रिम्शो बाक्ब। इ कली सुइमी अर्को आन रूमी श्येत मगेमेक्ल” देंमाक्त।
23 मोपतीके क्योव़ज नु चेरब रिक्ने मनुम्म सम्म, रूथ बोआज आ गेय पाइब मीश मुरपुकी नु सिला गुबा बाक्त। मिनु आ शिमी नु बाक्बाक्माक्त।