11
यूहन्नाम पुक्तीक ताक्शो
1 मिनु परमप्रभु यावे आ स्वर्ग ङा गेय पाइब कामी पुक्तीक का गेती। मेकोमी आं कली “लो, बोक्को। परमप्रभु यावे आ खिं नु चढ़ेतीके पुक्को। परमप्रभु यावे आ खिं आगाम सेउ पाइब आन कली हिक्को। इजीकीएल ४०:३; जकरिया ३:५-६; इजीकीएल ४२:२०
2 मिनु परमप्रभु यावे आ खिं ङा लाङगा रागी रागी ङा मुर आन कली गेशो बाक्त। मेको मपुक्को। मेकोपुकीमी परमप्रभु यावे आ योव़शो सहर ४२ महिना सम्म खोइलीमी दिप्शा ताइश्शा बिग्रेनीम” देंत। लूका २१:२४
परमप्रभु आ सांकछी निक्शी
3 मिनु नोले गो परमप्रभु यावेमी आ सांकछी निक्शी आस कली मार लोव़ पशो नेंता देंशा हना “गे आं लोव़ पाइब दुम्नीसी। गो इस कली आं लोव़ पचा कली सक्ति गेनुङ। गे निक्शीमी अरन्डी फेक्शा, हजार का सहे निक्शी ६० नाक्त सम्म आं लोव़ पाइनीसी” दे परमप्रभु यावेमी आ सांकछी निक्शी आस कली लोव़ पशो नेंता। प्रकाश १२:६
4 मिनु मेको सांकछी तेल रवा निक्शी नु दियारी निक्शी खोदेंशो दुम्शा, रागी ङा प्रभु आ ङोंइती बाक्नीस। जकरिया ४:३,११-१४
5 सु सुमी मेको निक्शी आस कली बिग्रेचा माल्नीमी, मेको साइक्चा पुंइसीनीम। दोपा साइक्चा पुंइसीनीम देंशा हना, मेको आस शोव़ रे मी ग्रूशा, मेको साइक्चा पुंइसीनीम।
6 मेको निक्शीमी परमप्रभु यावे आ लोव़ पाम्सेनु, रेउ मयिपाइक्ने चाप्नीस। मेकोमी ब्वाक्कु के हुश सेल्ने चाप्नीस। मिनु रागी कली मार श्येत गेचा दाक्तसे, मेकोन पने चाप्नीस। गिश खेयप मो पचा दाक्तसे, मिश खेयप यो पने चाप्नीस। १राजा १७:१; प्रस्थान ७:१९-२०
7 मिनु मेको निक्शीमी परमप्रभु यावे आ लोव़ थुम्से नोले, मेको पुं मपाइश्शो ढोडोङगा रे ठेयब जन्तु कुशा, मेको निक्शी नु राम्शी पा ग्रात। ग्राशा ङा मिन मेको आस कली साइक्तु। प्रकाश १३:३; प्रकाश १३:७
8 मेको आस बेक्शो रां चहिं ठेयब सहर ङा लांमी लीताक्से। मेको ठेयब सहर आ ख्रुइश्शो नें चहिं सोदोम नु इजीप्त माइश्शो बाक्त। मेको ठेयब सहरमी मुरपुकीमी मेको आस प्रभु कली शीम कांटी थोक्शा साइश्शो बाक्तेक्म।
9 मिनु थर नेल्ल ङा, जात नेल्ल ङा, आंम आंम लोव़ पाइब नु रागी रागी ङा मुर नेल्लेमी मेको आस बेक्शो रां नाक्त सां नु आधा मेकेर बाक्त। मुरपुकीमी मेको आस कली तुरसुमी वोइक्चा मगेमे।
10 मारदे हना मेको परमप्रभु यावे आ लोव़ पाइब निक्शीमी रागीम बाक्ब आन कली शुश श्येत गेतीके, रागीम बाक्बपुकीमी मेको आस कली साइश्शो तशा, शुश ग्येरशा, मार मार गेमुम्तेक्म।
11 मिनु नाक्त सां नु आधा नोले परमप्रभु यावे आ ब्रोंइचा गेब सोक्त मेको आस बेक्शो रांमी ओव़त। मिनु मेको निक्शी छुल छाल बोक्शा राप्ताक्स। मिनु रागी रागी ङा मुरपुकीमी मेको आस कली तशा थाम्पा हिंतेक्म।
12 मिनु सरीङ रे ठेयब सेंदामी मेको निक्शी आस कली “एक कुस” देंशो नेंताक्स। मिनु गोस्सुमी गिल्सीशा, इर सरीङ लाम्ताक्से। मेको आस जोरी सत्रुपुकीमी मेको आस कली सरीङ गे लशो ताम्तेक्म।
13 मिनु मेको निक्शी लसानु, ठेयब ख्रिनु कुत। मेको सहर ङा १० भाग ङा भाग का ब्रेत्त। मिनु ७ हजार मुर मेको ख्रिनुमी बेक्तेक्म। मेको लीशो मुरपुकी चहिं क्युल क्युल पा हिंशा, स्वर्ग ङा परमप्रभु यावे कली मान पाम्तेक्म।
14 हिंचा ङा श्येत निक्शी नुप्शा, नोले ङा हिंचा ङा श्येत जाक्चाप्तु। प्रकाश ९:१२
नेल्ल क्येङा नोले ङा तुराही
15 मिनु मेको नोले ङा परमप्रभु यावे आ स्वर्ग ङा गेय पाइबमी आ तुराही ताप्तु। मिनु स्वर्गमी ठेयब सेंदापुकी नेंता। मेकोपुकीमी “आंइ परमप्रभु नु आ ख्रीस्तमी रागी नेल्ल कली सासन पाइब दुम्ताक्से। मिनु गेना हना यो सासन पना पन बाक्नीसी” देंशो नेंता।
16 मिनु परमप्रभु यावे आ ङोंइती मेको २४ जना शेंब खाल्पा आन नित्तीकेमी निश्शा, परमप्रभु यावे आ ङोंइती खुम्की पा बाप्शा मान पाम्तेक्म। प्रकाश ४:४,१०
17 मिनु मेकोपुकीमी “परमप्रभु यावे, गे नेल्ल सक्ति पाइश्शो परमप्रभु बाक्नीनी। गे मुल बाक्नीनी, ङोंइती यो बाक्तीनी। इन ठेयब सक्तिमी सासन पचा गोइतीनी।
18 मिनु रागी रागी ङा मुरपुकी गाइक्ताक्म। मिनु मेको आन पर्बम गाइक्ताक्नी। बेक्शो मुर आन कली निसाफ पची ना दुम्त। मिनु इन लोव़ पाइब, इन नोले खोइक्ब, इन नें कली मान पा हिंब, आइक्च नु ठेयब मुर नेल्ल आन कली इनाम गेची ना दुम्त। मिनु गे रागी कली बिग्रेब मुर आन कली बिग्रेथ जाक्तीनी” दे परमप्रभु यावे कली देंतेक्म। भजन संग्रह २:३
19 मिनु परमप्रभु यावे आ स्वर्ग ङा खिं रोक्साक्व। मिनु मेको कबल पशो सन्दोस परमप्रभु यावे आ खिंम तांइसाक्व। मिनु चिला पाप्तु। शुश रेयके नु बुंबु पशो नेंसाक्व। ख्रिनु यो कुत। मिनु ठेयब मुप्स यित। प्रकाश १५:५