22
ब्रोंइचा गेब खोला
1 मिनु परमप्रभु यावे आ स्वर्ग ङा गेय पाइबमी ब्रोंइचा गेब खोला कोंइताक्यी। मेको खोला टल्केशो सिसा खोदेंशो तांइसाक्व। मिनु मेको खोला परमप्रभु यावे नु पाठा आस ठेयब नित्तीके रे ग्रूशा, इजीकीएल ४७:१-१२; जकरिया १४:८; उत्पत्ती २:९-१०
2 सहर ङा लां आ दाते रे पा शाइश्शो बाक्त। मेको खोला ओंथ हांबु नु आइक्ची हांबुमी ब्रोंइचा गेब रवा बाक्शो बाक्तेक्म। मेको ब्रोंइचा गेब रवापुकीमी १२ किसीम ङा फल सिप्बाक्तेक्म। महिनामी खेयप का सिबाक्तेक्म। मेको ब्रोंइचा गेब रवा आ सफा रागी रागी ङा मुर आन कली सापाइक्चा कली बाक्तेक्म।
3 मिनु मेको सहरमी सराप रशो काइ मबाक्नीम। मारदे हना परमप्रभु यावे नु पाठा आस ठेयब नित्तीके मेकेर बाक्ब। मिनु परमप्रभु यावे आ वाइलपुकीमी परमप्रभु यावे कली गेय पाइनीम। यहोसु ७:११-१३
4 मेकोपुकीमी परमप्रभु यावे आ कुल ताइनीम। मेको आन कुप्फीमी परमप्रभु यावे आ नें ब्रेक्शो बाक्ब। प्रकाश ३:१२
5 मेको सहरमी गेनायो नाक्दो मदुम्ब। मिनु मेको सहरमी बाक्ब आन कली बत्ती नु नां आ छेङछेङ यो ममाल्नीम। मारदे हना परमप्रभु, परमप्रभु यावे मेको आन छेङछेङ बाक्ब। मिनु मेकोपुकीमी गेना हना यो सासन पाइनीम।
एको किताब आ पर्बम
6 मिनु मेकोमी आं कली “एको लोव़ नेल्ल थमा बाक्ब। मोपतीके थमा सुइक्ने चाप्नीम। परमप्रभु यावे आ लोव़ पाइब आन सोक्त ङा प्रभु बाक्ब। मोपतीके आ वाइलीम वाइल आन कली आ स्वर्ग ङा गेय पाइब का सोइक्ताक्व। मारदे सोइक्ताक्व देंशा हना, दुम्चशो लोव़ शेंथ सोइक्ताक्व। आमेन। प्रकाश १:१
7 मिनु नेनीन, गो फ्रा लेश्शा जाक्नुङ” दे माइक्ती। सु सुमी एको किताबमी ब्रेक्शो लोव़ नेंशा पाइनीमी, मेको ग्येरसीशो मुर बाक्नीम।
8 गो यूहन्ना नङ। एको लोव़ नेंता नु मार दुम्चशो बाक्मे, मेको नेल्ल ताता। मिनु आं कली कोंइब परमप्रभु यावे आ स्वर्ग ङा गेय पाइब कली सेउ पचा कली आ खोइलीमी बाप्ती।
9 मेकोमी चहिं आं कली “मपावो, गो परमप्रभु यावे आ लोव़ पाइब इ लोक्बपुकी नु एको किताबमी ब्रेक्शो लोव़ पाइबपुकी खोदेंशो परमप्रभु यावे आ वाइल नङ। परमप्रभु यावे आ ङोंइती बाप्शा मान पावो” दे माइक्ती।
10 मिनु मेकोमी आं कली “एको किताबमी ब्रेक्शो लोव़ दुम्चाप्तु। मोपतीके ख्रुइश्शा मवोतो, पढेशा नेंपाइक्मी। प्रकाश १०:४; प्रकाश १:३
11 सु सुमी पाप पाइनीमी, मेको पामेक्ल। सु सु ग्रांग्रा दिचा ङा बाक्मा, मेको मोदेंन बाक्मल। सु सु चहिं ठीक पाइब बाक्नीमी, मेको ठीक पा बाक्मल। सु सु प्रभु आ मुर बाक्मा, मेको मोदेंशोन बाक्मल” दे परमप्रभु यावे आ स्वर्ग ङा गेय पाइबमी देंत। दानीएल १२:१०
12 मिनु नोले येसुमी “नेनो, गो फ्रा लेश्शा जाक्नुङ। मिनु जाक्शा, मुर नेल्ल आन कली आन पशो खोदेंशो पा गेनुङ। मेको आन गेय दोपा पामे, मोपा गेनुङ।
13 गो आल्फा नु ओमेगा नङ। नेल्ल क्येङा ङोंइती ङा नु नेल्ल क्येङा नोले ङा नङ। गोइब नु थुम्ब यो गो नङ। प्रकाश १:८; हिब्रू १३:८
14 ग्येरसीशो मुर सु सु बाक्नीम देंशा हना, सु सुमी आन वा मुरमे, मेको आन कली ब्रोंइचा गेब रवा आ फल ब्वचा गेनुङ। मिनु मेको मुरपुकी मेको सहर ङा लाप्चो रे ओव़चा ताइनीम। प्रकाश ७:१४
15 सु सुमी चहिं टुना मुना पाइनीमी, तेल्लेम पाइनीमी, मुर साइक्नीमी, मूर्ति नु फुल्लु कली सेउ पाइनीमी। जोल पना पन बाक्नीमी। मेको कुचुम खोदेंशो पा सहर रे लाङगा बाक्नीमी” देंत। प्रकाश २१:८,२७; १कोरिन्थी ६:९-१०
16 मिनु येसुमी “गो येसु नङ। गो दाऊद पिपी क्येङा ङोंइती बाक्ती। मिनु आ चच युइ यो नङ। गो टल्केशो सुक्कुर सोरुल यो नङ। गो परमप्रभु यावे आ स्वर्ग ङा गेय पाइब कली थमा सुइक्ब आन ग्रुम्तीकेमी शेंथ सोइक्ताक्ङ” देंत। यसैया ११:१०; लूका १:७८
17 मिनु परमप्रभु यावे आ सोक्त नु ग्युम्लीमी मुर आन कली “पिने” देंनीस। मिनु सु सुमी मेको लोव़ नेंनीमी, मेकोमी यो “पिने” देंमल। सु सु तूतू दाक्नी, पिने। मिनु ब्रोंइचा गेब ब्वाक्कु मोशा तूङीन। यसैया ५५:१; यूहन्ना ७:३७
नोले ङा लोव़
18 सु सुमी एको किताबम ब्रेक्शो परमप्रभु यावेम तुइक्पाइश्शो लोव़ नेंनीमी, मेको आन कली गो लोव़ का पाइनुङ, मार लोव़ पाइनुङ देंशा हना, सु सुमी एको लोव़मी अर्को लोव़ तेम्नीमी, मेको सजाइ ताइनीमी। मार सजाइ ताइनीमी देंशा हना, परमप्रभु यावेमी एको किताबमी ब्रेक्शो श्येत मोदेंशो मुर आन कली गेब। ब्यवस्था ४:२
19 सु सुमी परमप्रभु यावेमी तुइक्पाइश्शो एको किताबम ब्रेक्शो लोव़ ख्रोइक्नीमी, मेको यो सजाइ ताइनीम। मार सजाइ ताइनीम देंशा हना, परमप्रभु यावेमी मोदेंशो मुर आन कली ब्रोंइचा गेब रवा आ फल ब्वचा मगेब। मिनु मेको मुरपुकी परमप्रभु यावे आ योव़शो यरूसलेम सहरम ओव़चा यो मताइनीम।
20 मिनु एको लोव़ पाइबमी “आमेन, गो फ्रा लेश्शा यीनुङ” देंत। मिनु थमा सुइक्बपुकीमी “आमेन, प्रभु येसु जाक्कीन” देंतेक्म। १कोरिन्थी १६:२२
21 प्रभु येसु आ शिशी नेल्ल नु बाक्ल।