25
सामुएल बेक्शो
1 मिनु सामुएल बेक्माक्त। मिनु इस्राएली नेल्ल बुक्शा, मेको आ पर्बम रोंका पामे बाक्त। मेको कली आ खिं रामाह उइ थिम्मे बाक्त। मेको नोले दाऊद पारान ङा गोरशो रागीम ब्रुम्माक्त। १सामुएल २८:३
दाऊद, नाबाल नु अबीगेल
2 माओनमी कारमेल ङा मुर का बाक्माक्त। मेको शुश शोंप पाइश्शो मुर बाक्माक्त। मेको के हजार सां भेडा नु हजार का क्यारश बाक्मा बाक्त। मेको कारमेलम आ भेडा आन ऊन प्रेक्शो बाक्माक्त। यहोसु १५:५५
3 मेको आ नें नाबाल बाक्माक्त। आ मीश आ नें अबीगेल बाक्माक्त। अबीगेल दारशो नु निप्स पाइश्शो मीश मुर बाक्माक्त। मेको आ वोंइश, कालेब आ चच युइ, खकटा थुं पाइश्शो मरिम्शो पाइब बाक्माक्त।
4 दाऊदमी गोरशो रागीम “नाबालमी आ भेडा आन ऊन प्रेक्शो बाक्ब” देंशो लोव़ नेना बाक्त।
5 मिनु दाऊदमी आ १० ठिटा मुर आन कली “कारमेल लने। मिनु नाबाल कली ग्रुमीन। मिनु मेको कली आं नेंमी ‘रिम्शो बाक्कीन’ मतीन।
6 मिनु मार देनीन देंशा हना ‘इन थुं नांइसेक्ल। इन खिं ङा मुर थुं नाइश्शा बाक्चा तामेक्ल। गे नु बाक्ब नेल्ले थुं नाइश्शा बाक्मल।
7 गे नु भेडा आ ऊन प्रेक्ब मुर बाक्नीम, देंशो लोव़ नेंता। इन भेडा योव़बपुकी गो नु बाक्शो बाक्तेक्म। मिनु गो मेको आन कली मारेइ मरिम्शो मपक। मेकोपुकी कारमेलम बाक्मानु, मेको आन के मारेइ मजाम।
8 इन ठिटा आन कली हिल्लो पने। मिनु मेकोपुकीम इन कली शेंनीम। मोपतीके आं मुर आन कली रिम्शो पा शिशी पा ब्रने। मारदे हना मुलाक्त चाड का बाक्ब। इन गेय पाइब नु इन तौ दाऊद कली मार गेने चाप्नीनी मेको गेने’ देंत, दे मतीन” देंमाक्त।
9 मिनु दाऊद आ ठिटा मुरपुकी लशा, नाबाल कली दाऊद आ नेंमी मेको लोव़ नेल्ल मदमे बाक्त। मिनु रिम्तमे बाक्त।
10 तन्न नाबालमी दाऊद आ मुर आन कली “दाऊद माइश्शो सु बाक्बा? येस्से आ तौ बाक्बा? सिनाक्त मुलाक्ती आन होव़प रे प्रोक्शो वाइल शुश बाक्नीम।
11 आं शोब्ले, आं ब्वाक्कु नु ऊन प्रेक्ब आन कली सेल्शो श्ये लाइश्शा, मतुइश्शो मुर आन कली गेनुङा?” दे माइक्मी बाक्त।
12 मिनु दाऊद आ ठिटा मुरपुकी लेश्शा, जाक्दीश्शा, दाऊद कली मेको लोव़ नेल्ल शेंदमे बाक्त।
13 मिनु दाऊदम आ मुर आन कली “नेल्लेमी आंम आंम तरवार पिम्सीन” देंमाक्त। दाऊदमी यो आ तरवार पिम्से बाक्त। मिनु ४ सहे जना खोइ मुर दाऊद आ नोले खोदमे बाक्त। सहे निक्शी मुर चहिं मार मार खाल पचा कली मेक उइ बाक्मा बाक्त।
14 मिनु नाबाल आ ठिटा मुर कामी नाबाल आ मीश अबीगेल कली “दाऊदम गोरशो रागी रे आ मुर आन कली आंइ होव़प कली मान पा, मार मार पुंइथ सोइश्शो बाक्त। तन्न आंइ होव़पमी मेको आन कली हुइक्ताक्व।
15 मेको मुरपुकीम आंइ कली रिम्शो पशो नम। आंइ कली मारेइ श्येत मगेम। गोपुकी मेकोपुकी नु ब्वाकीम नाक्दो नाक्ती एर ओंथ पकानु, आंइ के मारेइ मजाम।
16 गो आंइ भेडा योव़दीकानु, मेकोपुकी नाक्दो नाक्ती आंइ एर ओंथ गारो खोदेंशो पा बाक्तेक्म।
17 गे मार पचा माल्नीनी मेको रिम्शो पा मिम्तीन। मारदे हना, आंइ होव़प नु आ खिं थमा पा खतम दुम्ब। आंइ होव़प थम मरिम्शो बाक्ब। मेको नु लोव़ पने सुइ मचाप्ब” देंमाक्त।
18 मोपतीके अबीगेलम रीब पा सहे निक्शी शोब्ले, थैलो निक्शी अङगुर शांबु, क्योरशा ठीक सेल्शो ५ ओटा भेडा, ५ एफाह तांब्रा, सहे का सोव़पाइश्शो अङगुर के शोब्ले नु सहे निक्शी सोव़पाइश्शो फोव़शी गेडा के शोब्ले ठीक पा गधा आन कली कुरपदा बाक्त। एफाह का ७ लिटर खोदेंशो पा रीब।
19 मिनु मेकोमी आ ठिटा गेय पाइब आन कली “गे आं ङोंइती लने। गो इन नोले पीनुङ” माइक्मी बाक्त। तन्न आ वोंइश नाबाल कली मेको मशेंदा बाक्त।
20 मिनु मेको डांडाम फारतीक रे गधा लना लन बाक्मानु, दाऊद नु आ मुरपुकी मेको आन गे लुक्च ब्रुम्ना ब्रुम्न बाक्मा बाक्त। मिनु अबीगेलमी मेको आन कली ग्रुमा बाक्त।
21 मिनु दाऊदमी “गोरशो रागीम मारेइ मजाम्चा ङा पा, मेको मुर आ मार मार खाल पशो मोशा दुम्त। मेकोम आ कली रिम्शो पाइश्शो आ पा ङा, आं कली मरिम्शो पाइक्ती” देंमाक्त।
22 मिनु दाऊदमी “दीसा सुनी सम्म गो मेको आ खिं ङा वोंइश मुर नेल्ल मसाइक्ताक्मी हना, परमप्रभुम आं कली मोन पवल” दे कसम जवा बाक्त।
23 मिनु अबीगेलमी दाऊद कली तशा, आ गधा रे फ्रु तोइश्शा, दाऊद आ ङोंइती बाम्माक्त।
24 मेको आ खोइलीम बाप्शा “आ प्रभु, दोस ताइब गो नङ। इन वाइलीम कली ब्वाक्चा गेने। आं लोव़ नेनीन।
25 आ प्रभु, मेको शोर गाक्शो मुर आ पर्बम मगाइक्तीन। मेको आ नें दोपा नाबाल बाक्मे, मेको मो देंशोन बाक्ब। आ नें नाबाल बाक्ब। मिनु मेको मूर्ख बाक्ब। तन्न गो, इन गेय पाइबम, इन सोइश्शो ठिटा आन कली मतङमी।
26 आ प्रभु, परमप्रभु यावे ब्रोंइशा बाक्शो खोदेंशो पा नु इन ब्रोंइशा बाक्शो खोदेंशो पा, परमप्रभु यावेमी इन कली हुश ख्राक्श पोक्तीक नु क्येक्क लेत्तीक रे तेक्शो बाक्ब। इन जोरी सत्रु नु इन कली मरिम्शो पाइब नाबाल खोदेंशो दुम्मल।
27 मिनु इन गेय पाइबम, आ प्रभु, इन कली चाक्शो कोसेली इन नोले खोइक्ब ठिटा आन कली गेन।
28 इन गेय पाइब आ मरिम्शो पशो ङा आं कली माफ गेयीनी। परमप्रभु यावेमी आं प्रभु, इन खिं ङा मुर आन कली गेना हना यो रिम्शो पवल। मारदे हना गे परमप्रभु यावे आ पर्बम लडाइ पशो बाक्नीनी। गे बाक्नी सम्म इन कली मारेइ मरिम्शो मदुम्ब। २सामुएल ७:१६
29 सुइ मुरुम इन कली खेदा पा साइक्चा माल्तु हना, परमप्रभु यावे, इन परमप्रभुमी इन कली कोव़ब। तन्न इन जोरी सत्रु आन कली चहिं हुरदम वोइश्शा ताइश्शो फुल्लु खोदेंशो पा ताइक्ब। भजन संग्रह ६९:२९
30 परमप्रभु यावेम आं प्रभु, इन कली, आ देंशो खोदेंशो पा रिम्शो पाप्तु हना नु इन कली इस्राएल ङा सासन पाइब सेल्तु हना, २सामुएल ५:२
31 गे मो हुश ख्राक्श पोक्तीक नु इन गाइश्शोमी मरिम्शो पशो आ पर्बम सुर्ता पचा ममाल्नीनी। इन थुं खाइक्पाइक्चा ममाल्नीनी। मिनु परमप्रभु यावेमी इन कली रिम्शो पाप्तु हना, इन गेय पाइब, आं कली यो मिम्तीन” देंमाक्त।
32 मिनु दाऊदमी अबीगेल कली “मुलाक्ती आं कली ग्रुम्पाइक्चा कली इन कली सोइक्ब परमप्रभु यावे, इस्राएली आन परमप्रभु ठेयब बाक्ल।
33 इन मिम्तीक रिम्शो बाक्ब। गे मुलाक्ती आं कली हुश ख्राक्श पोक्तीक नु क्येक्क लेत्तीक रे तेक्तीके आसीक राइनीनी।
34 मिनु परमप्रभु यावेम आं कली इ कली श्येत गेतीके रे तेक्शो बाक्ब। मारदे हना गे रीब पा आं कली ग्रुम्थ जाक्तीनी। मो मपशो ननी हना परमप्रभु यावे, इस्राएली आन परमप्रभु ब्रोंइशा बाक्शो खोदेंशो पा, सुनी सम्म नाबाल आ खिं ङा वोंइश मुर का सम्म यो मलीम वा” देंमाक्त।
35 मिनु दाऊदमी अबीगेलमी आ कली चाक्शो कोसेली ब्रवा बाक्त। मिनु “इन थुं नाइश्शा खिं लेतीन। गो इन लोव़ नेंशा बिस्साक्यी” देंमाक्त।
36 मिनु अबीगेल लेश्शा जाक्मेनु, नाबालमी आ खिंमी, पिपम खोदेंशो पा ठेयब भोज सेल्शा भोज पशो तवा बाक्त। नाबाल ग्येरसीशा शांबुम दुक्शा बाक्शो बाक्माक्त। मेको थाम्पा दुक्शा बाक्तीके आ मीशेमी सुनी सम्म रिम्शो मरिम्शो मारेइ शेंने मचबा बाक्त।
37 सुनी शांबुम प्रोना नोले आ मीशेमी लोव़ नेल्ल शेंदा बाक्त। मिनु मेको आ लुङगीर खाइश्शा, फुल्लु खोदेंशो दुम्माक्त।
38 मिनु १० नाक्त नोले परमप्रभु यावेमी मेको कली बेक्पदा बाक्त।
39 मिनु दाऊदम नाबाल बेक्शो लोव़ नेंशा मेकोमी “परमप्रभु यावे ठेयब बाक्ब। मारदे हना मेकोमी आं कली मरिम्शो पशो आ पर्बम नाबाल कली सजाइ गेप्तु। मिनु आ गेय पाइब, आं कली मरिम्शो पतीक रे तेक्ती। नाबाल आ मरिम्शो पशो आ पियामीन मोइक्तु” देंमाक्त। मिनु दाऊदमी अबीगेल कली आ मीश सेल्चा कली लोव़ पथ मुर सोइक्ता बाक्त।
40 मिनु दाऊद आ गेय पाइबपुकी अबीगेल आ बाक्तीक कारमेल लशा, मेको कली “दाऊदमी गे नु ग्युंबे पचा कली आंइ कली ब्रथ सोइक्ताक्व” देंमा बाक्त।
41 मिनु अबीगेल बोक्शा बाप्शा सेउ पा “गो इन गेय पाइब आन खोइल चिक्ब वाइलीम नङ” देंमाक्त।
42 मिनु अबीगेल रीब पा सासे बाक्त। गधा ङोइश्शा आ ५ जना गेय पाइब लाइश्शा लोव़ चाक्ब दाऊद आ मुरपुकी नु लमाक्त। मिनु मेको आ मीश दुम्माक्त। १सामुएल २७:३; १सामुएल ३०:५; २सामुएल ३:३
43 दाऊदम मेको क्येङा ङोंइती येज्रेल ङा अहीनोआम कली यो ग्युंबे पशो बाक्माक्त। मिनु मेको निम्फा मेको आ मीश दुम्सा बाक्त।
44 मेना सावलमी आ तमी, दाऊद आ मीश मिकाल कली गाल्लीम ङा लाइश आ तौ पाल्ती कली गेवा बाक्त। २सामुएल ३:१४-१५