27
दाऊदमी बाक्तीक पुंइशो
1 दाऊदमी “काबु सावलम आं कली साइक्ब। मोपतीके पलिस्ती आन रागीम आं कली प्रोक्शा लचा रिम्शो दुम्ब। मिनु सावलमी इस्राएल आगामी आं कली माल्चा प्रोंइब। मिनु गो मेको आ गुइ रे ब्रोंइनुङ” दे मिम्ता बाक्त। १सामुएल २३:२३
2 मोपतीके दाऊद नु आ ६ सहे मुर रीब पा सांद लाक्शा, गाथ ङा पिप माओक आ तौ अकीश आ बाक्तीकेम लमा बाक्त। १सामुएल २१:११-१६
3 दाऊद आ लडाइ पाइब मुर, मेको आन खिं ङा मुर नु दाऊद नु आ मीश निक्शी, येज्रेल ङा अहीनोआम नु कारमेल ङा बेक्शो नाबाल आ मीश अबीगेल गाथम अकीश नु बाक्मा बाक्त। १सामुएल २५:४०-४३
4 दाऊद गाथम प्रोक्शा लत देंशो लोव़ मुरुमी सावल कली नेंपदमे बाक्त। मिनु मेकोम दाऊद कली माल्चा प्रोना बाक्त।
5 दाऊदम अकीश कली “गे आं कली शिशी पाइतीनी हना, आं कली इन रागी ङा तेकोइ सहरम बाक्चा गेयीनी। गो दोपा पिप नु पिप आ सहरम बाक्नुङा?” देंमाक्त।
6 मिनु मेको नाक्ती अकीशम मेको कली सिकलाग गेवा बाक्त। मोपतीके मुल सम्म सिकलाग यहूदा ङा पिप आन के बाक्ब। यहोसु १५:३१
7 दाऊद पलिस्ती आन रागीम बर्स का ४ महिना सम्म बाक्माक्त।
8 दाऊद नु मेको आ मुरपुकी लडाइ पथ ग्रूमानु, गेशुरी, गिरजी अमालेकी आन मारेइ मारेइ रोइक्बाक्मा बाक्त। मारदे हना मेकोपुकी तेलाम रे शुर सम्म नु इजीप्त सम्म बाक्बाक्मा बाक्त।
9 दाऊदमी मेको आन रागीम मार मार रोइक्तानु, मेकेर ङा वोंइश मुर मीश मुर सुइ आन कली का यो मवोइक्थु साइक्बाक्माक्त। क्यारश भेडा, बी ब्यफ, गधा, दलओंठ वासी नेल्ल लाइश्शा अकीश आन बाक्तीक लेप्बाक्मा बाक्त।
10 मिनु अकीशमी मेको कली “मुलाक्त गे ते रोइक्तीनी” दे हिल्लो पाइक्बाक्माक्त। मिनु मेकोमी “यहूदा रागी ङा नेगेब, येराहमेल आ मुर आन नेगेब नु केनी आन नेगेबम रोइक्ताक्क” देंबाक्माक्त।
11 दाऊदमी सेस मीश मुर वोंइश मुर आन कली गाथम मचाक्बाक्माक्त। मारदे हना मेको आन पशो गेय आ पर्बम दाऊद नु आ मुर आन कली मरिम्शो सेल्नीम, दे दाऊद हिंबाक्माक्त। पलिस्ती नु बाक्म सम्म मेकोम मोदेंशो पवा बाक्त।
12 अकीशम “दाऊदम आंम रागी इस्राएलमी मरिम्शो पतीके मेक बाक्चा मताइब। मोपतीके गेना हना यो आं मुर दुम्शा गो नु बाक्ब” दे मिम्शो बाक्माक्त।