4
1 Abo Mose i heuoi i ene, “Na u ita, taba nige se awamamohoiegu, eo arinagu taba nige se ataiei: paana abo si ene, ‘GUIAU nige i taumasaraha arim eai.’ ”
2 To GUIAU i ribalau arinai i ene, “Meta me aisana nimam eai?” Eo i ene, “Tu’e.”
3 I ene, “U gabadobei tano eai,” to i gabadobei i hemala mota, eo Mose i dagogabaei.
4 Abo GUIAU i ribalau Mose arinai i ene, “Nimam u helelelaei delena eai u abilau.” Arinai nimana i helelelaei i abilau, eo i hemala tu’euio nimana eai.
5 “Bena tatao se awamamohoi GUIAU, tamadiyao edi Eaubada, Aberahama ena Eaubada, Isaako ena Eaubada, Iakobo ena Eaubada ia ede i taumasaraha arim eai.”
6 GUIAU hinage i ribauio arinai e ene, “Nimam u torelaei nuapoum eai.” To nimana i torelaei nuapouna eai, eo murina eai i abihai, abo ie ita nimana i lepela, i posiposi, i posiposi doha snow.
7 Abo i ene, “Hage u toreuioi nuapoum eai.” Nimana ie toreuio nuapouna eai, abo i abihaiuioi ie ita, ana ao i abiuioi doha buluma mamohoina.
8 “Arinai, ena nige se awamamohiem eo heiheinoi bagubagunana nige se awamamohoiei, heiheinoi helabuina arinai abo se awamamohoiei.
9 Ena ina heiheinoi labui ta nige se awamamohoiedi, eo em riba nige se ataiei, abo goila saga eai u abi, eo u hegoilaei tano pitapitalina potana eai: abo goila wa saga eai ue abi wa abo i hemala osina tano pitapitalina potana eai.”
10 Mose i ribalau GUIAU arinai i ene, “O Guiau e, eau nige tauribasibasiba, huia bagubagunana eai nige’e eo huiana wa u ribalaoma em heaheari arinai nige’e, na eau ea bebeda ribariba arinai eo memenagu i porohe.”
11 Eo GUIAU i ribalau arinai, i ene, “Eai tau awana i ginauri? Eai tauuna’una, e taudo’odo’o, e taumatalala, eo tau matagibugibu i ginauridi? Iaede eau GUIAU e nige’e?
12 Arinai abo u torohai, eau abo ea hemala awam eo saha ea heatam abo u ribaei.”
13 Na i ene, “O Guiau e, ea aibodaim, taba doga esau u hetamari.”
14 Abo GUIAU ena ouyalayala i lai ariri Mose arinai eo i ene, “Em tau Arona, Levi tauna, metai e nige: e? Abina ea ata i riba lolo. U ita, i laolaoma i hailobaim eo ena i itam abo i kode ariri.
15 Abo u ribalau arinai, eo hinage abo riba u toredi awana eai. Eau abo ea hemala awam, eo ia awana, eo saha eo saha bena au ginauri abo ea heatamiu.
16 Ia abo i ribalau tatao aridi eai, ia abo awam, oa hinage abo ia arinai doha Eaubada.
17 Nimam eai ina tu’e ta u abi abo arinai wau heiheinoi wa abo u ginauridi.”
Mose ena Uio Aigupito eai
18 Mose i uio Ietero, bosiana wa, arinai, i ribalau arinai, enaba, “Taba u earigabaegu ea uio ehaguyao Aigupito eai aridi eai, bena ea itadi, sora ma miadi, eo nige’e?” To Ietero i ribalau Mose arinai i ene, “U lau ma nuatarum.”
19 Eo GUIAU i ribalau Mose arinai Midiani eai, i ene, “U uio Aigupito eai, paana tatao wa em mauri bena se helautom, wa, se mateo.”
20 Arinai Mose monena ea nanatunayao tatao i abidi i hebawadi asini potadi eai, eo ie uio Aigupito tanona eai: eo Eaubada ena tu’e Mose ie abi nimana eai.
21 GUIAU hinage i ribalau Mose arinai i ene, “Ena u uio Aigupito eai abo laulau gigiboridi gamagaridi nimam eai ea toredi wa abo u ginauridi Parao matana eai: na nuana abo ea heoiura, taba nige tatao wa i eairigabaedi.
22 Abo Parao u heriba, ‘GUIAU i ribaei i ene, Isaraela ede egu ealahou tau.
23 To ea heribamo, “Natugu tau u abigabaei, bena abo i heayaiyegu” na ena u nuahi, tabu i lau, u ita, abo natum tau em ealahou abo hinage ea unui’.”
24 Abo ena aba aiyawasi dimona dobilana eai GUIAU Mose i hailobai, bena i unui.
25 Abo Sipora sapaila ie abi, natuna tau i heperitome eo bulumana opina i gabalaei Mose aena eai, i ene, “Mamohoi, eau arigu eai, oa osinam monegu.”
26 Arinai Eaubada Mose i abigabaei, na Sipora i ene, “Oa osinam monegu, heperitome debana eai.”
27 GUIAU i ribalau Arona arinai i ene, “U torohai u lau barabara eai Mose u hailobai.” To ie lau i hailobai Eaubada ena oea tupina eai, abo i alagoiei.
28 Mose, GUIAU ena riba gamagaridi i mosei ia arinai eo heiheinoi gamagaridi i lauhesom bena i ginauridi wa, Arona i heriba.
29 Abo Mose eo Arona se lau Isaraela edi babadayao gamagaridi se heoigogoidi,
30 eo GUIAU ena riba gamagaridi i ribaedi Mose arinai, Arona i ribaedi aridi eai, eo laulau gigiboridi gamagaridi hinage tatao matadi eai i ginauridi.
31 Tatao hinage se awamamohoiei: huiana wa se ataiei GUIAU Isaraela tataodi i nuatuidi, eo edi amamna ie ita, se dulu dobi eo se aihelahui.