আল-জবুর ১৯
এবাদত-বন্দেগি পরিচালকর লাগি: হজরত দাউদর মিজমর।
1 আছমান অকলে বয়ান করে আল্লা পাকর মহিমা,
চান-সুরুজ গ্রহ-তেরায় দেখায় তান লিলা-খেলা।
2 দিনে দিনে গায় তান জালাল আর শান,
রাইতে রাইতে হিকায় তান আখলর বয়ান।
3 নাই কুনু মাত-কথা নাই কুনু বুলি,
আওয়াজ-সুর যায় না হুনা এরার মুখো থাকি।
4 তা-ও তারার আওয়াজ মিলে দুনিয়াই জুড়ি,
পুব পচিম উত্তর দক্ষিন হারা জগত ভরি।
গাড়িলা আল্লায় অনো সুরুজর বসত ঘর,
তাম্বুর মাজে রইয়া সুরুজ করে জগত ফর।
5 বাসর থাকি বার অইন যেলা নয়া বিয়াতি দামান্দ,
দৌড়াই দৌড়াই ফুর্তি করইন জয়ী জনর লাখান।
6 আছমানর এক কিনার থাকি যাইন আরক কিনারো,
ইটার গরম থাকি সাইধ্য নাই কুনু কিচ্ছু লুকাইতো।
7 আল্লার দেওয়া হেদায়ত পুরাপুর নিখুত,
বন্দার জানরে করে ইখান তরতাজা মজবুত।
আল্লার ফরমান হক আর সঠিক চিরকাল বওয়াল,
বেআখল জনরে বানায় পুরাপুর আখলদার।
8 আল্লার দেওয়া নিয়ম-নীতি সঠিক হামেশা,
মনর মাজে যুগায় ইতায় খুশির ফোয়ারা।
আল্লার হুকুম-আহকাম তো খুলা-মেলা পরিস্কার,
উজিলা করে ইতায় দিলর চউখ আমরার।
9 আল্লার ডর-খফ তো নিখুত, হর-হামেশা জারি,
পুরাপুর সঠিক রায় দেইন হক-ইনছাফকারি,
10 সোনা থাকিও বউত দামি, মুল্যবান আর খাটি,
মউচাকর ফুটা পড়া মউ থাকিও মিষ্টি।
11 তুমার ই গুলামে অতা হুনিয়া হুশিয়ার রয়,
আমল করলে ইতা নিচ্চয় বউত ফায়দা অয়।
12 বন্দায় কুনু নিজর ভুল নিজেউ বুজে নি?
বেখিয়ালে করা গুনার লাগি আমি মাফি মাংগি।
13 মনর গরিমায় করা গুনা থাকি বাচাও আমারে,
ইতায় যানু কবজা করতো না পারে মোরে।
তেউগি আমি নেককার বন্দা বনিতাম পারমু,
বড় বড় গুনা থাকি মোর জান বাচাইমু।
14 তরানেআলা ও মাবুদ, আমার আশ্রয় টিল্লা,
দিলর ধিয়ান মুখর জবান কবুল করো গো আল্লা॥