আল-জবুর ৯৬
1 মাবুদর নামে নয়া গীত গাও,
ও হারা দুনিয়া, মাবুদর গীত গাও,
2 মাবুদর নামে গীত গাও, তান তারিফ করো,
দিনে দিনে তান দেওয়া নাজাতর তবলিগ করো।
3 হকল জাতিরে জানাও তান গৌরবর কথা,
হকল মানষরে কও তান কুদরতি কামর মহিমা।
4 মাবুদউ মহান, মহা তারিফ তান,
হকল দেব-দেবী থাকি বড় ভয়ংকর তাইন,
5 জাতি অকলর দেব-দেবী তো বেকামা পুতুল খালি,
মাবুদেউ বানাইছইন হকল আছমান মন্ডলি।
6 শান-শওকত আর মহিমা তান ছামনে রইছে,
বল-শক্তি আর জাক-জমকে তান ঘর হাজাইছে।
7 ও জগতর খান্দান অকল, জানাও মাবুদর গুনগান,
গৌরব আর বল-শক্তির কথা জানাও তান,
8 মাবুদর নামে তান পাওনা গৌরব জানাও,
লিল্লা-ছদগা আতো লইয়া তান দরবারো হামাও।
9 পাক-ছাফ দিলে মাবুদর ছামনে সইজদাত পড়ো,
হারা দুনিয়া তান ছামনে থর-থরাইয়া কাপিয়া উঠো।
10 জাতি অকলর মাজে এলান করো, মাবুদউ বাদশা।
জগতরে বানাইছইন মজবুত, করতো নায় কুনু লড়া-চড়া,
তাইন নিচ্চিত হকল জাতির হক বিচার করবা।
11 আছমান অকল ফুর্তি করউক, দুনিয়া খুশি অউক,
দরিয়া আর তার মাজর সব জানদার গর্জিয়া উঠউক,
12 জমিন আর এর হক্কলতা খুশি-বাসি করউক,
বন-বাগানর সব গাছ-পালাও আনন্দ-উল্লাস করউক।
13 মাবুদর ছামনে অলাউ করউক ইতা হকলতা,
তাইন তো আইরা দুনিয়ার বিচার করতা।
জগতর বিচার-ফয়ছালা করবা হক-ইনছাফে,
তামাম জাতির বিচার-ফয়ছালা করবা হক-হালালিয়ে॥