আল-জবুর ৯৯
1 মাবুদে বাদশাই করইন, জাতি অকল কাপউক,
দুইও কারুবীমর মাজে তান আসন, দুনিয়ায় থরথর করউক।
2 পবিত্র ছিয়ন নগরির মাজে মাবুদউ মহান,
হকল জাতির উপরে তান ইজ্জত-সম্মান।
3 তারা করউক তুমার গুনগান,
মহান আর ভয়ংকর তুমার নাম,
তারা কউক, মহা পবিত্র তাইন।
4 ও বলআলা বাদশা, হক বিচাররে ভালা পাও তুমি,
হক-হালালি গাথিছো তো মজবুত করি,
ইয়াকুবর বংশত বওয়াল করছো হক বিচার আর পরেজগারি।
5 আমরার মাবুদ আল্লার তারিফ করো,
সইজদা করো তান কদম মুবারকো,
কও, মহা পবিত্র তাইন।
6 মুছা আর হারুন আছলা তান ইমামতির কামো,
শামুয়েল নবীও রইতা তান দোয়া-মুনাজাতো,
জুয়াপ পাইতা তারা ডাকিলে মাবুদর দরবারো।
7 মেঘর খুটিত রইয়া তাইন মাতিতা তারার লগে,
তান কালাম মানিয়া তারা চলতা তান হুকুমে।
8 ও আল্লা আমরার মাবুদ, তারার মিনতি তুমি হুনতায়,
তারার কছুরির বদলা দিলেও তুমি আল্লায় মাফি দিতায়।
9 আমরার মাবুদ আল্লার তারিফ করো,
সইজদা করো তান পবিত্র পাহাড়ো,
আমরার মাবুদ আল্লা তো পাক-পবিত্র॥