আছমানি কিতাব
বিবি রুতর ছহিফা
পরিচিতি
রুত নামর ছহিফা অইলো হুরু একখান ছহিফা। হজরত মুছা (আঃ) অর উফাতর বাদ থাকি হজরত দাউদ (আঃ) অর শাসন আমল চালু অওয়ার আগে মাজখানর ই ৫০০ বছরর ভিতরে ঘটি যাওয়া বউত ঘটনার এক ঘটনা অইলো অউ বিবি রুতর ছহিফা। বনি ইছরাইল জাতিয়ে কেনান দেশো আইয়া বসতি গাড়লা। ইনো তারার কুনু নিরাপত্তা আছিল না। হউ সময় আস্তা কেনান দেশ তারা দখল করতো পারছে না, আর তারার কুনু রাজাও আছিল না, অইলে তারার আমির অকলে সময় সময় শাসন করতো। আস্তা ই সময় ধরি খালি যুদ্ধ আর অশান্তি আছিল।
হউ জমানাত আল্লার হুকুম আছিল, কুনু বেটায় যুদি বউ থইয়া নিআওলাদি হালতে মরিযায়, তে তার আপন ভাইয়ে তার বউরে নিকা করতে অইবো, যুদি আপন ভাই না থাকে, তে তার হকল থাকি করিব জনে তার বউরে নিকা করতে অইবো। বাদে অউ বেটির ঘরো জনম অওয়া আওলাদউ অইবো তাইর মরা জামাইর ওয়ারিশ। বিবি রুতর জামাই মরি যাওয়ার বাদে আল্লার হুকুম মতো জামাইর করিব একজনর গেছে রুতে হিরবার বিয়া বইলা। বাদে তান ঘরো পুয়া-পুড়ির জনম অইলো। আর অউলাউ বিবি রুত হজরত দাউদ (আঃ) অর বড়-মা, মানি তান দাদার মা অইলা।
অউ ছহিফা থাকি বুজা যায়, আল্লার মায়ার বন্দা বনি ইছরাইল অকল বে-পথে গেলেগি, তারার উপরে নানান দুখ-কষ্ট আইলো। আর ভিন-ধর্মী কুনু বেটা-বেটিয়ে যুদি আল্লার হুকুম মানিয়া চলে, তে তার উপরে আল্লার রহমতর জড়ি লামে। আর হে আল্লার মায়ার বন্দা বনিযায়। ইলাখান করি বিবি রুত ভিন-ধর্মী বেটি অইয়াও আল্লার মায়ার বান্দি বনিগেছলা।
আগর জমানার বড় বড় বুজর্গ অকলর মতে, হজরত শামুয়েল (আঃ) অর আতে হজরত দাউদ (আঃ) অর আমলো ই ছহিফা খান লেখা অইছে।
এরমাজে আছে:
(ক) বিবি নয়মীর পরিবার মোয়াব দেশো গেলো ১:১-৫
(খ) রুতরে লইয়া বিবি নয়মী বাড়িত ফিরত আইলা ১:৬-২২
(গ) বিবি রুতে হজরত বোয়াজর লগে দেখা করলা ২ রুকু
(ঘ) বিবি রুতর বিয়ার লাগি নয়মীর চিন্তা ৩ রুকু
(ঙ) হজরত বোয়াজর লগে বিবি রুতর শাদি ৪:১-১৭
(চ) বিবি রুতর পন্তি হজরত দাউদ ৪:১৮-২২
1
বিবি নয়মীর পরিবার মোয়াব দেশো গেলো
1-2 হজরত দাউদ নবীর তিন ছিড়ি আগে আমির অকলর হুকুমতর আমলো, এহুদা দেশো আলী মালিক নামে এক বেটা আছলা, তান বিবির নাম নয়মী, মহলোন আর কিলিয়ন নামর তারার দুই পুয়া আছলা। অউ সময় দেশো খুব বেজুইতা নিদান দেখা দিলো। নিদানর ঠেলায় বেথেলহাম গাউর ইফ্রাথা গুষ্টির অউ আলী মালিকে তান বিবি আর পুয়াইনরে লইয়া মোয়াব দেশো গেলাগি।
3 হনো যাওয়ার কয়দিন বাদে আলী মালিক মরিগেলা, তান বউ নয়মী আর দুইও পুয়া এতিম অইগেলো।
4-5 বাদে বিবি নয়মীয়ে দুইও পুয়ারে অউ মোয়াব দেশর দুই কইনার লগে শাদি দিলা। এক কইনার নাম রুত, আরক কইনার নাম অরপা। শাদির কয়দিন বাদে দুইও পুয়াও মরিগেলা। অউলা এক দশ বরছ গেল। বিবি নয়মীয়ে তান দুইও বউরে লইয়া ড়াড়ি হালতে হউ মোয়াব দেশোউ রইলা।
রুতরে লইয়া বিবি নয়মী বাড়িত ফিরত আইলা
6 আখতা একদিন তাইন খবর পাইলা, তান নিজর হউ এহুদা দেশো মাবুদে বরকত নাজিল করিয়া খানি-খুরাকি দান করছইন।
7 অউ খবর পাইয়া তাইন দুইও পুয়ার বউরে লইয়া হিরবার দেশো যাইতাগি করি তিয়ার অইলা।
8 পথো বার অইয়া বিবি নয়মীয়ে তান পুয়ার বউয়াইনরে কইলা, “ও বেটিন, তুমিতাইন তুমারতানর মাʼর গেছে যাওগি, হনো গেলে তুমরা সুখ পাইবায়। মা-বাফে তুমরারে বিয়া-শাদি দিবা, তুমরা নয়া ঘর-সংসার করবায়। আর মাই অকলরে, আমার পরিবারর লগে তুমরা যেলা ভালা বেবহার করছো, আল্লায়ও তুমরারে অউলা ভালাই করউক্কা,
9 তুমরারে ভালা বেটা মিলাই দেউক্কা, তুমরা যাতে সুখ-শান্তিয়ে জিন্দেগি কাটাইতায় পারো।” কইয়া তাইন তারারে আইঞ্জা করি ধরিয়া মায়া দিলা। তেউ তারা দুইওজনে আউ আউ করি ডাকাইয়া কান্দি কান্দি কইলা,
10 “মাই গো, আমরারেও আপনার লগখানো আপনার দেশো নেউক্কাগি।”
11 হড়িয়ে কইলা, “না রেগো মাই, তুমরা কিতাল্লাগি আমার লগে যাইতায়? তুমরার বাফ-মাʼর গেছে যাওগি। আমার লগে গেলে তো লাভ-উব অইতো নায়। ইলা তো নায় যেন আমার আরো পুয়াইন আছইন, অতার লগে তুমরারে রাখমু,
12 বা আমি আরক সংসার পাতিয়া হউ তরফা পুয়ার লগে তুমরারে রাখতাম পারমু। আমার তো আর ই বয়সও রইছে না। আর রইলেও আমি আইজ রাইতউ আরক সংসার পাতিয়া হারি আমার ঘরো কুনু পুত জন্মিলেও,
13 তুমরা কুনু অতদিন বাড় চাইবায় নি? তুমরা যারযির বাড়িত যাওগি, আমি তো অভাগি, কপাল-পুড়া। স্বয়ং মাবুদে আমার উপরে ঠাটা ফালাই দিছইন।”
14 ইখান হুনিয়া তারা আউ আউ করি কান্দন ধরলা। কত সময় কান্দিয়া হারি অরপায় তান হড়িরে মায়া দিয়া বিদায় লইয়া বাফর বাড়িত গেলাগি। অইলে রুত তান হড়ির লগেউ রইগেলা।
15 এইন গিয়া হারলে হড়িয়ে রুতরে কইলা, “ও বেটি, তুমার জাল তো তাইর নিজর বাড়ি আর দেবতার গেছে যারগি, তে তুমিও তাইর লগে যাওগি।”
16 রুতে জুয়াপ দিলা, “জি না আম্মা, আপনে ইলা মাতইন না যানু, আপনার খর অইয়া রইতে আমারে নিষেধ করইন না যানু। আপনে যেনোউ যাইন না কেনে আমিও যাইমু, আপনে যেনো রইবা আমিও অনো রইমু। আপনার জাতিউ অইবো আমার জাতি, আপনার মাবুদউ অইবা আমার মাবুদ।
17 যে জাগাত আপনে মরিযিবায়, অনো আমিও মরিযিমু, আর অনোউ আমার কয়বর অইবো। খালি মরন ছাড়া দুছরা কুনুতায় যুদি আমারে আপনার লগ ছাড়াইতো পারে, তে আল্লায় যানু আমারে গজবি শাস্তি দেইন।”
18 ইখান হুনিয়া হড়িয়ে আর কুন্তা কইলা না, তাইন বুজিলিলা রুতে তান লগে যাইতো করি দিল বান্দিলিছে।
19 বাদে তারা দুইওজনে আটা ধরলা, আটি আটি তারা বেথেলহাম গাউত আইয়া পৌছিলা। গাউত আইতেউ গাউর বেটিন্তে আইয়া উলইস্তল লাগাইয়া কইলা, “ইয়াল্লারে, নয়মীর অউ হালত অইছে নি?”
20 “অয় গো সোনা, আমারে আর নয়মী [মানি, সুখি] কইয়া ডাকিও না, মারুয়া [মানি, তিত্বা] কইয়া ডাকিও, সর্ব-শক্তিমান আল্লায় তো আমার জিন্দেগিরে তিত্বা বানাইলিছে।
21 আমি অভাগিনি কপাল-পুড়া। আমারে আর কিতাল্লাগি নয়মী কইয়া ডাকিরায়? দেশ থাকি গেছলাম ভরা আতে, আর মাবুদে আনলা খালি আতে। স্বয়ং সর্ব-শক্তিমানেউ আমার ভরা ডুবি করিলিছইন।”
22 অলাখান করি মোয়াবী রুতরে লইয়া নয়মীয়ে মোয়াব দেশ ছাড়িয়া নিজর বাড়িত বেথেলহাম গিয়া হামাইলা। অউ সময় বার্লি ফসল কাটার মউসুম আছিল।