6
Dan-ḳoerator befare talim
1 “Tumra hushiar roio, manshore deḳanir lagi ebadot-bondegi ḳorio na, ila ḳorle tumrar behesti baf Alla Pakor ges taki kunu furushkar faitae nae.
2 “Kunu manshore dan-ḳoerat dile bonḍo oḳolor laḳan dio na. Tara to manshor ges taki tarif faita ḳori mosido-mondiro ar fote-gaṭe, ḍul-ḍofki bazaia lilla-zoḳat dein. Ami tumrare hasau ḳoiram, tarar furushkar to tara failise.
3 Oile tumi kunu dan-ḳoerat dile, tumar ḍain ate bilaile bau ate zanu na zane.
4 Oula lukaia dan ḳorio. Teu tumar behesti baf Alla, zein lukaia hoḳolta deḳoin, tainu tumare furushkar diba.
Dua ḳorar befare talim
5 “Tumra zebla dua ḳoro, ou shomoe bonḍo oḳolor bab dorio na. Tara manshore deḳanir lagi mosido-mondiro ar fotor muko ubaia dua ḳore. Ami tumrare hasau ḳoiram, itae to tarar furushkar failise.
6 Oile tumi dua ḳorar bala goror doroza-zanala lagaia dua ḳorio, ar tumar niraḳar baf, zenre deḳa na geleo azir asoin, hou Allar gese saio. Tain to gufon hoḳolta deḳoin, tainu tumare fol diba.
7 “Tumra zebla dua ḳoro, ou shomoe duniar manshor laḳan ḳamoḳa ber-beri ḳorio na. Tara mono ḳoroin, beshi beshi ḳoile Allae tarar dua ḳobul ḳorba.
8 Tumra tarar laḳan oio na, tumrar behesti baf Allar gese saoar ageu, tain zanoin tumrar kita dorḳar.
9 Erlagi tumra olaḳan dua ḳorio,
O baba, amrar behesti baf,
tumar nam fak-fobitro mana ouk.
10 Duniait tumar bashshai zoldi auk,
shob tumar morzi mafik kora zauk,
behesto zela oula duniait,
behesto zela oula duniait.
11 O baba, aizkur ḳani aizku deo,
maf ḳoro amrar hoḳol oforad,
12 zara amrar birudde ḳorse faf,
amra to tarare dilaisi maf.
13 Falaio na amrare forikkat,
shoetanor ḳobza taki ḳoro ḳalas.
14 Huno, tumra zudi aroḳzonor oforad maf ḳoro, te tumrar behesti baf Allaeo tumrar oforad maf ḳori diba.
15 Oile tumra zudi oinnore maf na ḳoro, te tumrar behesti bafe tumrareo maf ḳorta nae.
Ruzar befare talim
16 “Tumra zebla ruza raḳo, ou shomoe bonḍo oḳolor laḳan muk kala ḳorio na. Tara ruza raḳsoin, oḳan deḳanir lagi souk-muk kala ḳori raḳoin. Ami tumrare hasau ḳoiram, itae to tarar furushkar failise.
17 Oile tumi ruza raḳle muk-at doio, matat tel-fani dio,
18 zela manshe buzto na fare, tumi ruza raḳso. Teu tumar niraḳar baf, zenre deḳa na geleo azir asoin, hou Allaeu ita deḳba. Tain to gufon hoḳolta deḳoin, tainu tumare fol diba.
Aḳerator don ḳamao
19 “I zindegit tumra nizor lagi oto don-shompod zomaio na. Duniar shompodor maze zongare dore, fuke ḳae ar hing kudia sure ney.
20 Oile behestor maze nizor lagi samana zomao, hino zongare dore na, fukeo ḳae na ar surio oe na.
21 Mono rakio, tumar don zeno, mon-o hono roe.
22 “Zano to, souk oilo shorilor batti. Tumar souk zudi bala oe, te tumar asta shorilo soḳsoḳa for oibo.
23 Oile tumar souk zudi ḳaraf oe, te asta shorilu ḳala andair oizibo. Tumar dilor batti andair oile, i andair boṛo bezuita.
24 “Zano ni, kunu gulameu dui munibor ḳezmot ḳorto fare na, he eḳzonre ginnaibo aroḳzonre bala faibo. Arnae eḳzonor bae kial ḳorbo, aroḳzonre elami ḳorbo. Te tumrao Alla Pak ar don-samana, duiotar ḳezmot eḳloge ḳortae faro na.
25 “Erdae ami tumrare ḳoiram, kila ḳaitam ar kila finditam, ita loia sinta ḳorio na. Ḳani taki zan boṛo, ḳafoṛ-sufoṛ taki shoril boṛo.
26 “Asmanor ou fakintor bae sao, tara zalao bain ḳore na, fosholo ḳaṭe na, ugaro kunta zomae na, ḳali tumrar behesti baf Allae tarar kuraḳ dein. Te tumra kunu ita taki aro dami nae ni?
27 Ḳo sain, tumrar maze ḳeu sinta-babna ḳoria tar haeati eḳan gonṭa baṛaito farbo ni?
28 “Finnor ḳafoṛor lagi sinta ḳoro ḳene? Tumra ou zongli fulor bae saia deḳo, ita ḳoto beshi shundor! Itae to nizor shundoror lagi kuntau ḳore na, kunu rongo silai ḳore na, baino ḳore na, emneu oe.
29 Te ami ḳoiram, Bashsha Sulaiman oto zak-zomoḳor maze roileo tan lebas to ota egu zongli fulor laḳano shundor asil na.
30 Deḳrae ni, zongolor maze ou zeta shundor ful oḳon ase, ḳail oileu manshe ita daru banaia aguindi zalaibo. Allae zudi ou zongolre ola shundor ḳori hazaisoin, te o ḳomzur imandar oḳol, tumrareo tain shundor ḳori hazaita nae ni?
31 Erdae kita ḳaitae ar kita finditae, ita loia sinta ḳorio na.
32 I duniar manshe ḳali ota loiau danda ḳore. Tumrar behesti baf Allae to zanoinu, ita hoḳolta tumrar zorur ase.
33 Erlagi tumra foelau Allar morzi zugaia solo, tan bashshair dandat ro. Teu ita hokkoltao tumra faibae.
34 Ḳailkur sinta ḳorio na, ḳailkur befar ḳailkur ufre saṛi deo. Dinor azab dinor lagi zotesṭo.