34
Kotiva qaiqaa uva maara qara ntuva tora
1 Noravano Kotiva Mosirara tiharo, Te tota oritanta ai amurara are muntu tairi kaanara vira voqaatanta qaiqaa teqa kera vara viri timiraqe te tota tuna uvara qaiqaa viraqaa qara ntuva taare.
2 Hura toqaqi qerama varera te variainara Sainai Aiqina noraqaa uruntera ti tivita kaane.
3 Kiama vo vaiintivanovata ai vatakero uruarire. Kiama vo vaiintivanovata aiqina aumanto ani variarire. Sipisipive, purumakauve, vikavata kiama aiqinaqaa ani vaiha ukau naate, tiro.
4 Viva minti tuvaro Mosiva Noravano Kotiva tuntema kero, ori taaraqanta nkauru kero vatero vira qararaa vaaka toqaqi himpiro ori vitanta varero Kotiva tuntema kero, Sainai Aiqinaqaa vurama.
5 Mosiva noraqaa vaarintovaro Noravano Kotiva tonavuqi tuvuntero Mosira vitakero nai nora autu nteharo, Te Noravano Kotikave tura.
6 Minti tivakero Noravano Kotiva Mosira avuqaa aitareharo tiharo, Te Noravano Kotika vairera, te aaqurihama nimite vaura Variqaukama vauro. Te kia vaaka arara ite vauraukama vauro. Ti muntukavano vaiinti nahentiara voqamakero vaimanta te kia vika vaaka qoririmake vaunarave.
7 Ti muntukavano airi tauseni vaiinti nahentiara vaimanta te vika qora kaiqa vare varia uvarave, vika ti qoririmake varia uvarave, vi uvara vi uvara nunka nimite vaunarave. Te mintimake vaihavata, vika noka qoka qora kaiqa varera kaara te vika vaintivata vika naintivata vika naintivara vaintivaravata ntaihama karerave, tura...
28 Mosiva Nora Kotikantiro 40 enta entaqivata aatitoraqaavata variqiro viharo kia namarivata karavata nora. Viva Kotiva uva maara tivatora oritantaqaa qara ntuva tora. Kotiva kempuka uva 10navu tivatora viva qara ntuva tora.
Mosiva Sainai Aiqinaqaahairo ururantero vura
29 Ho Mosiva Sainai Aiqinaqaahairo ururantero oritantavata varero tuviharo kia tavovaro vira virivano ataa i vaiharo takuqi vaura. Viva Nora Kotikantiro uva tuvarora tiro, vira virivano mintiro vauvaro viva tuvuntomanta
30 Eronivavata ekaa Isareri vikavata Mosira tavovaro vira virivano takuqi vaumanta vika qetake kia vira aumanto oru vura.
31 Mintuvarovata, Mosiva vika naarama komanta Eronivavata vaiinti nahenti vika nora vaiintinavuvata orurante Mosiva vaunaini aumanto vuvaro Mosiva vika hampata uva tura.
32 Vira naantiara Isareri vatanaa vaiinti nahenti ekaa Mosiva vaunaini aumanto vuvaro Mosiva Noravano Kotiva Sainai Aiqinaqaa vaiharo uva maara tivatora vika tiva nimura.
33 Mosiva uva tiva nimiqiro viro vuru taiqa kero viraqaahairo tavuna vara kero nai viri mantaaqa tero vaura.
34 Mosiva Kotira Seri Naavuqi Kotira aarareva vireva iharo tavuna vira qaqini vara kero oru Kotira aarora. Viva Kotira aarama taiqa kero vevantero Kotira uva Isareri vaiinti nahenti tiva nimi vaura.
35 Viva uva tiva nimireva umanta vaiinti nahenti tavovaro vira virivano ataa iharo takuqi vauvaro Mosiva qaiqaa tavunaqohairo nai viri naavuma tero variqiro viro, qaiqaa Nora Kotira aarareva iharo tavuna vira nai viri naavuma tora qaqini varake vaura. Mosiva mintiaqiro vi vaura...
Mosiva Kotira Seri Naavu kaqa amite vaiintinavuka kaama tora