6
Soromonuva Kotira Naavu kaqa amitora
1 Soromonuva Isareri vatanaakaqaa raqikiqiro viharo 4 ihi varakero, vi ihira 2 toraqaa, Sivive tu toraraqaa Soromonuva Nora Kotira naavu kaqa amitareva vi kaiqara hoqarama tora. Vi entara Isareri vatanaaka Isipi ke anu entaraqaahairo 480 ihi aitarora.
2 Soromonuva maantima vau naavura Nora Kotira kaqa amitora:
Vi naavura hini hini vukaitantavano vaireva, 27 mita vauvaro,
tauriniatanta vaireva, 9 mita vaura.
Vi naavura virini tura aratova vaireva 13½ mita vaura.
3 Nora naavu vira qentiana vika rumu vo tomaqa kovaro vi rumura tauriniava vaireva, nora naavu voqaantema kero, 9 mita vaura.
Vira vukaitantavano vaireva, 4½ mita vaura.
4 Naavuqi ataa iarire ti, vika oriqohai antura/tura ntavatora voqi voqi inaara uintua aututora. Uintua novano vahaaqaini inaara no vauvaro avutaqi nora no vaura.
5 Soromonuva tumanta vika nora naavu mintimake kaqate, viraqaahai rumu vonavu nora naavu ututuma taate ti, vika vira hini hini mantarainivata vira tauvaqainivata rumu vonavu tomaqake autu kora.
Rumu vonavu vataini autuke vate, vira qiataqaa vo autuke vate, qaiqaa vira qiataqaa vovata autuke vatora.
6 Vika vi rumura vi rumura nora naavuqaa tomaqa keha nora naavuqaa ori ntavatora kia nkauru karaiti, qaqi tomaqa tora. Vika vi rumura vi rumura tomaqerara iriha, hoqare vika nora ori antura/tura miani ntavaqi vivi, viraqaahai vira vuruvi katari rukiteva ho variarire ti, vika mantaquma vau orira ntavate, qaiqaa vira vuruvi katari rukiteva ho variarire ti, vika voqavata mantaquma vau orira ntavaqi vivi, vuru taiqa kora.
Vataqi vau rumura tauriniava vaireva, 2 mita 20 sentimita vauvaro, vira qiataqaa vau rumura tauriniava vaireva, 2 mita 70 sentimita vauvaro, qaiqaa vira qiataqaa vau rumura tauriniava vaireva, 3 mita 10 sentimita vaura.
7-10 Nora naavu ututumato rumunavura viriniava vaireva, vohaa qarama kero 2 mita 20 sentimita vaura. Vika vi rumura vi rumura sidaa katariqohai nora naavuqaa tomaqake kaqatora.
Vataqi vau rumunavura qentivano sauti mantaraini vauvaro, viraqihairo rataa vovano vira qiataqaa vau rumuraqi vuvaro, rataa vovano vira qiataqaa vau rumuraqivata vura.
Kotira Naavu kaqe vaivaro noraiqaakero kenko kaanko tiantorave ti, vika kia hamaave, kolsisive, vo aini haikave, varake kaiqa vararaiti, vika niaraini nora orivano vaunaini vaiha ori avuqavuqama keha koqemake teqakeha, viraqaahai ori vira vare vuru Kotira Naavu kaqatonaini evaara kaqe vaura.
Soromonuva tumanta vika vo ori vo ori varake naavu vira kaqaqi vivi, viraqaahai vika naavu qiata autiha nora sidaa rukite, sidaa tanuqira kututoraqohai qiataini vuqiteha naavumatora.
11 Noravano Kotiva Soromonurara tiharo,
12 Are ti naavu kaqa timite varianarara irihama, te ai uva tiva amirerave.
Are te tivatauna uvaravata, te ariara minti minti iane tivatauna uvaravata, koqema kera irihara vira avataqira virera, te tota ai qora Devitirara kauqu aiqiqaa aquke tiva amunantemake, ai koqema amitarerave.
13 Te ni tenta vaiinti nahenti Isareri kia qaqira karaiti, ni hampata variqi virerave, tiro.
Noravano Kotiva Soromonurara minti tura.
14 Ho Soromonuva Kotira Naavu kaqa vuru taiqa kora.
15 Soromonuva tumanta vika sidaa varake vi katariraqohai Kotira Naavu avutaqi antura/tura aratoraqaa vataihai vuqiqi vivi, vuru naavu qiataini taiqake, viraqaahai vika toqukera kututoraqohai vatakanta vuqitora.
16-17 Kotira Naavuqi vira turuaravano variarire tiro, Soromonuva tumanta vika naavu avutaqi 9 mita kaara ntuvake kavaqaara aratovaro viva kaankuka voqaara vauvaro vira hini mantaraini Kotira turuaravano vauvaro vira avuni vau rumura vira vukaivano vaireva, 18 mita vaura. Kavaqaara vira vataihai sidaaqohai aruqi vivi, naavu qiataini vuru kora.
18 Hauri avutaqi ori ntava taava qoqaa variantorave ti, vika sidaa katariqohai naavumate, sidaa viraqaa timonave/qantirave, qaqi maurave nkauruke vaataiqama tora.
19 Nora Kotira turuaraini vira Vokise vuru vataate ti, vika vi rumura qerama tora.
20 Vi rumuva vaireva: Vira vukaitantavano 9 mita vauvaro, vira tauriniava 9 mita vauvaro, vira viriniavavata vohaa qaramakero 9 mita vaura.
Soromonuva tumanta vika kori ori koqera ruqutuke kakanairimake/kavanairimake noraiqamakora varake, vi haikaraqohai vi rumura sidaa vaavi arutora naavuma teha mantaaqa kora. Vika ofaa tainta aututoravata kori oriqohai vuqiteha mantaaqa kora.
21 Soromonuva tumanta vika Kotira Naavu avutaqi kori ori koqera varake viraqohai ekaa katarive orive taatauke qapuqama tora. Vika koriqohai rerupa voqaara aututo seni naaquntara varake, viraqohai Kotira turuaraini vau rumura vira qentiana virini hiritora. Vika vi qentiravata koriqohai taatauke qapuqama tora.
22 Soromonuva tumanta vika ekaa Kotira Naavu avutaqivata, ofaa taintavano Kotira turuara qentiana vauravata, koriqohai ekaa vi haikara taatauke qapuqama kora.
23 Vika orivi katari varake viraqohai aroka vataa enseli maraqura/varaha taaraqanta autuke Kotira turuaraini vuru vatora. Vitanta viriniava vaireva, 4½ mita vaura.
24 Enseli aroka hinivano vaireva, 2 mita 25 sentimita vauvaro, vira hinivano vohaa qaramake vaura. Vira aroka airatovaro hini vitivano oru hini vitiqaa akukumaviro 4½ mita vaura.
25 Enseli vovata vohaa qaramake autuke vatora.
26 Enseli taara vitanta vohaa qaramake autu tovaro vitanta vukaivano 4½ mita vaura.
27 Soromonuva tumanta vika enseli taaraqanta autuke vare, vuru Kotira turuaravano vau rumuraqi vaaviarama tomanta vitanta aroka rairate/airate vaura.
Enseli vovano himpi vauvaro, vira aroka viti vovano naavu taqe hini vauvaro, enseli vovano vira tataaqa himpi vauvaro vira aroka viti vovano naavu taqe hini vaura. Rumu avuta viraqi vitanta aroka vitivano naiqaa naiqaa ani akukuma vura.
28 Vika enseli vitantavata koriqohai qapuqamake vatora.
29 Vika Kotira Naavu rumu taaraqantaqi vahehema/vaataiqama tareka, deti katarive, enseli aroka vataakave, qaqi maurave, sidaaqaa nkauruke aututora.
30 Vika qaiqaa kori ruqutuke kakanairimake/kavanairimake viraqohai rumu vitantaqi vataini vau taintaraqaa vuqite mantaaqa kora.
31 Vika orivi kututora varake, viraqohai Kotira turuaravano vau rumura nora qenti taaraqanta tampamake autuke vatora. Vi qentira auvahianta aruto katariva 5navu vaura.
32 Vi qentitanta vaataiqireka, enseli aroka vataakave, deti katarive, qaqi maurave nkauru keha autute, viraqaahai kori ori ruqutuke tanuqama toraqohai vi haikara vi haikara naavumatora.
33 Kotira Naavu vahaaqaini vau qentira autireka, vika orivi katari 4navuqohai qenti auvahianta arute,
34 viraqaahai vika qenti vitanta toqukeraqohai autuke, tampamake arutora.
Hini qenti qantua kaivaro tavaaraqaahairo raqantaa vuarirava vauvaro, hini qentivanovata vohaa qaramakero vaura.
35 Avutaqi vau qentitanta vahehema kontemake, vika vi qentitantavata vaatai qama kora. (6:32)
36 Kotira Naavuvano hohaa avutaqi vaumanta vika vi hohaara autireka maantimake aututora: Vika koqemake teqato orira, vo ori vo ori vevanto vontaqaa vontaqaa taaramo tataa ntavate, vira qiataqaa sidaa vuqitora.
37 Soromonuva Isareriqaa raqikiqiro viharo ihi 4navu varakero, vi ihira 2 tora, Sivive tu toraraqaa vika Nora Kotira Naavu kaqe kaiqara hoqaramate, avuni ori vataini ntava tora.
38 Soromonuva Isareriqaa raqikiharo 11 ihi 8 tora, Buluve tu torara varako entaraqaa, vika vi naavura kaqa vuru taiqa kora. Soromonuva minti mintimake kaqaate tuntemake, vika vi naavura 7 ihi varaqi viha, kaqa taiqa kora.