Yang Yadwang Isinulat NI PEDRO
Patkaw Ang Pasanag Tung Kumpurming Magbasa
Yang sulat ang naa yang yadwang isinulat ni Pedro ig yang mga tumatalig ang pinaeklan na pariu ka tung sinambit na tung primirung isinulat na ang wasak-wasak da (1 Pedro 1:1). Atiing pagpasulat na, naskean na rang lag̱i ang indi ra ilem mabuay, mapatay ra (1:13-14). Purisu baklu ra mapatay, gustu nang magbutwan tung nira yang sulat ang naa ug̱ud belag̱an maliwag ang mademdeman nira kung unu pay ipinagtulduk na taa tung isinulat nang naa (1:15).
Duruay katuyuan nang nagpasulat. Primiru, gustu nang magpaktel tung mga isip nirang mamagpaderep ang yang mga ug̱ali nira mas pang mag̱atu rang mag̱atu tung ug̱ali ni Jesu-Cristong panalig̱an nira ang para asan da nga papruibaay nira ang tanira pagpagaem dang matuud tung anya (1:3-21).
Yang sam bilug pang katuyuan na, kaministiran ang magpaaman tung nira natetenged tung mga manigtulduk ang buklien. Ay yang mga ug̱ali nira durug kalalaway ig pag̱atag̱aman da nirang tuksuen yang mga tumatalig ang para mag̱usuy ra tung nira. Ang pagkatapus tung uri, siguradung sintinsiaan yang Dios tung kalainan ang anday katapus-tapusan (2:1-22).
Yang sam klasing nag̱itulduk yang mga taung atia, pamagpaimukli ang indi ra unu maglekat ti Ginuung Jesu-Cristo natetenged tung tantu unung kabuay ra ang indi pa ka enged nag̱alkat. Piru binarik ni Pedro yang mga katadlengan nira. Yang Dios belag̱an mapinaw̱aya-w̱ayaen ang magkereng tung pinangakuan na ang ti Ginuung Jesus maglekat, kung indi, durug kapinarurusun tung mga tau ay pag̱elat pang pag̱elat tung nirang magsug̱at da tung mga kasalanan nira ay yang gustu na ang basi pa ra ilem anday mablag tung anyang dapat ang masintinsiaan na tung kadiaduan. Dispuis pa, dayun da kang pinademdem ni Pedro yang mga tumatalig ang kumus magkadiadu ra ka ilem ka man yang tanan ang bag̱ay, mintras pamagpakbat tanira tung ni Ginuung Jesus ang maglekat, kaministiran ang yang usuyun nirang ug̱ali pulus tung limpiu, maskin tung unu pang pag̱urubraenay (3:11-13). Ang para makayanan nira tia, pirmi ra ilem ang magpataw̱ang enged tung ni Ginuung Jesus ug̱ud maispirinsiaan nira yang kaneeman nang magpaktel tung nira. Ig mas pang papeg̱eten nira yang pagpakigkapulit nira tung anya (3:18).
1
Yang Intrada Yang Sulat (1:1-2)
1 Yang may sulat taa yuung ti Simon Pedrong sasa kang turuw̱ulun ni Jesu-Cristo bilang sasang apustul nang pangerengan tung anya. Ipinaekelu ra tung numyung kumpurming pinaeyangan da yang Dios ta ipagtalig mi tung ni Jesu-Cristo ang katulad ka tung ipinaeyang na tung yamen ang mga apustul na. Pariu ka ilem agkamaal tung anya yang pagtaralig̱en mi may yang pagtaralig̱en yamen ay natetenged tanyang yay Dios ang nag̱apanirbian ta ig ya kay pagtapnay tung yaten, pariu-pariu yang pag̱aratrataren na tung yaten ang anday pinilikan.
2 Yang nag̱ipag̱ampuu para tung numyu ang mas pang maispirinsiaan mi yang kaildaw may yang kalimengan ang liit tung Dios durua ni Ginuu tang Jesus ekel tung kaampiran mi tung nira.
Pinakdulan Da Tanira Yang Tanan Ang Kaministiran Nira Ang Para Mapag̱usuy Tanira Tung Nag̱auyunan Yang Dios (1:3-4)
3 Yang tanan ang kaministiran ta ang para mapag̱usuyita ra tung nag̱auyunan yang Dios, luw̱us dang ipinamakdul na tung yaten ekel tung kagaeman na. Nagkamaninganita ra ta maning tia ay natetenged tung kaampiran tang naa tung anya ang yay nagbeteng tung mga isip tang mag̱ing mga tauan nang sadili ang para tung uri, malg̱uran ta ra yang sadiling kasusulawen na may yang pagkamatinlu na.
4 Bilang pinakdulanita ra anya yang pinangakuan nang durug kamaal ig durug katimbang yang kantidad na ug̱ud asan da nga puklutay ta yang pagpakemkem ta tung sistimang pangkaliw̱utan ang asan da ka rin nga diadu yang pagkatau ta ekel tung pagparapsawen ta tung mga kalelyag̱an tang dati. Asanita ra ka ngaeyangay ta ipagbuat ta yang mag̱atu tung ug̱ali yang Ama tang Dios.
Kaministiran Nirang Magpaawat Ang Para Mamagkatinir Da Ta Pagkatau Nirang Matandes (1:5-11)
5 Kapurisu kung paneem-neeman ta yang binuat yang Dios ang atia para tung yaten, magkabag̱ay rang pisan ang ya ra ka man tia ay ipagpaderep tang magpaawat enged ang para siguruen ta ang belag̱an pa ka ilem ang ita magpadayun tung pagtaralig̱en ta tung ni Ginuung Jesus, kung indi, prusigiran ta ka ang yang mga ug̱ali ta mag̱ing matitinlu. Pati mga kinaisipan ta pawayangen ta ka ang para mamaresmesan ta kung unu pay talagang matinlu may yang belag.
6 Kaministiran kang maskeitang magsuspindi tung mga kalelyag̱an tang sadili. Yang sikaren ta ka ang magtenten da yang mga isip tang mag̱agwanta tung mga kaliwag̱an ig pirmi kang bilug tung kumpurming nag̱auyunan yang Dios.
7 Sikaren ta ka ang itang mga tumatalig maggeregmaanita ang katulad ka tung magpurutul ang sereked tung tian. Sikaren ta ka ang pati yang tanan ang mga masigkatau ta gegmaan ta ka ta ustu.
8 Kipurki kung ita may mga ug̱ali tang mga maning tia ig kung ya rag deregte agderegte, indiita ra magluang inutil ang andang pisan ay luluaan nang matinlu yang pagkarapulitan tang naa ni Jesu-Cristo.
9 Alimbawa, kung tinu pay anda asan tung anya yang mga ug̱aling maning tia, talagang anday naerem na ang yay durug kaimpurtanting maita tung sasang matuud ang tumatalig. Ay ya pa ag̱ari, nalipatan na ra kung unu pa enged ay kapulutan na ang tanya pinunusan da ni Ginuung Jesus tung mga kasalanan na.
10 Purisu, mga putulu, imbis mag̱usuyita tung taung maning tia, magpaderepitang magpaita ta pruiba tung mga sadili ta mismu pati tung duma ang ita talagang matuud ang pinilik yang Dios kag binteng nang mag̱ing mga tauanita ra anyang sadili. Kipurki kung paderepan ta yang mga ug̱aling atiang nagkarasambitu, indiita enged malambeg ang mabalik pa tung dating pag̱urubraen ta.
11 Yadwa pa, kung paderepan ta yang mga pasais ang atia, kung palg̱urunita ra nganing yang Dios tung paggaraemen ni Ginuu tang Jesu-Cristong anday katapus-tapusan na ang tanya ka man ay Mananapnay ta, belag̱an basta-w̱asta ilem yang pagpalg̱ud na tung yaten, kung indi, durung pisan agkasadya.
Yang Katuyuan Nang Nagsulat Tung Nira (1:12-15)
12 Purisu gustuu kang lag̱i ang pirmiamung pademdemenu natetenged tung mga bag̱ay ang atia, maskin nag̱aintindian mi ra, maskin asintadu ra ka yang mga isip mi tung ipinagtulduk tung numyu atiing primiru ang talagang ya ra ka man yang kamatuuran ang liit tung Dios.
13-14 Tung pag̱intindiu, mintras buiaw pa, may ubligasyunu pang magpademdem tung numyu natetenged tung mga bag̱ay ang atia ang para asan da nga paktelayu yang mga isip ming mag̱usuy. Ay kipurki nag̱askeanu ang indi ra ilem mabuay yang tiniru taa tung kaliw̱utan ang naa ang katulad ka tung ipinasanag dang lag̱i tung yeen ni Ginuu tang Jesu-Cristo.
15 Purisu mintras layunaw pa, indiamu tegkaanung paiwan-iwanan ta mupia ang para may sasang magamit ming belag̱an maliwag ang mademdeman mi yang mga bag̱ay ang atia tung maskin unu pang urasay, pagkatapus ang andanaw ra taa.
Nag̱ipasanag Na Tung Nira Kung Unu Pay Nag̱apatielan Nang Pagpaprusigir Tung Nira (1:16-21)
16 Kipurki telengan mi. Atiing pagpaintindi yamen ang mga apustul tung numyu natetenged tung paglekat ni Ginuu tang Jesu-Cristo taa tung kaliw̱utan ang naa ang ya ray uras ang ipagpabistu na rang pisan yang puirsa nang maggaraemen, belag̱an ang duun da ipatielay yamen tung mga isturia-isturiang atiang inimu-imu ka ilem ta mga taung ansianung mag̱imu-imu. Kung indi, duun da ipatielay yamen tung sinakep ang pisan ta mga mata yamen mismu ang ya ra yang kasusulawen nang nagpailala ang tanya may kagaeman nang maktel.
17 Ay kipurki atiing pagpadengeg ta mupia ni Ama nang Dios tung anya, may busis ang duun manliit tung anyang yay Makagag̱aem tung tanan ig inding pisan mapasiring-siringan yang kadengeg̱an na ang maning taa yang pagpasapet na tung anya:
“Uay, atia ra yang pag̱aningenung anaw ang ya enged ay nag̱agegmaanung nag̱auyunan ta mupia,” ag̱aaning.
18 Dispuis yang busis ang atiing liit tung langit, pati yami mismuy nagngel atiing nagkasira-siraanami ni Jesus duun tung bukid ang atiing nag̱ing sagradu sigun tung nainabu tung uras ang atii.
19 Kag yadwa pa, duun da ka nga siguruay enged yamen ang tung uri siguradung magkamatuud da ka man yang nagkaraula yang mga manigpalatay sigun tung paggaraemen yang pag̱aningen nirang Cristo. Dakulu kang taw̱ang na tung numyu kung yay pabilug̱an ta mga isip ming intindien yang nagkaraula nirang atii. Kipurki ya ray matinlung pitik ang magamit mi ug̱ud asan da nga deepay mi kung yang nag̱itulduk ta duma tung numyu matuud u kung bukli. Yay maning pa tung sasang kaas ang pagdekal tung makiklep ang naa ang asta kaw̱utun da ilem yang uras ang ipaglekat ni Ginuu tang Jesu-Cristo ang yay maning pa tung pagtela yang Kalamrag̱anen ang kung maita ra nganing yang pamagpulaw, nag̱aampayan da ta kasadyaan nirang duru ay nag̱askean da nira ang indi ra ilem buay, mandiklat da yang sag̱iid.
20 Tung pag̱irintindien mi tung nagkaraula nirang atii, landaw ra enged tung tanan ang pademdeman mi ang tung tanan ang nagkaraula nira ang pagkatapus isinulat da ka nira, anda enged ang pisan ay nanliit tung sadiling pag̱irintindien nirang mga manig̱ula, may san tag̱a.
21 Kipurki andang pisan ay inula nira natetenged tung kalelyag̱an ka ilem nirang sadili, kung indi, pinanggaeman da yang Espiritu Santong pinampabitala yang bitala mismu yang Dios.