15
Natetenged Tung Mga Taung Indi Ra Ka Enged Namagpadeeg Tung Ayep (15:1-4)
1 Numanyan may naitaw sing sam bilug sing pruiba tung langit ang durung pisan agkabew̱ereng. May pitu ngangilan ang yay may katengdanan ang mamagpadangat tung pitu ka nga sarutan. Yang mga sarut ang naa, ya ra yang pangultimung mga sarut ang asan da nga talusay yang Dios yang pagpaita na yang kasisilag̱en na.
2 Pagkatapus, pagtelengu si, unu pay maitaw, kung indi, ya si yang midyu salamin ang atiang pariu ka tung teeb aglapad ang may apuy nang maning pa tung pagbawang. May naitaw ra kang mga taung kemdengan asan tung binit na ang may ekel nirang mga dikuirdas ang ipinamakdul yang Dios tung nira ang para yay gamiten nirang mamagdayaw tung anya. Anday duma, ya ra yang mga taung indi ra ka enged namagpadeeg tung ayep, kung indi, namanguntiel dang indi ra namagtuu tung anya pati tung bultung ipinasuad tung anya. Asta yang lumirung atia ang yay kapananglitan yang aran na, indi ra ka namagpauyun ang imarka pa tung nira.
3-4 Yang pagturugtug̱un nira ya kay pagkarantaen nira ta sasang kantang nag̱ipagdayaw nira tung Dios natetenged tung pagparaktelen na tung nira ang asta indi ra namagpadeeg tung ayep ig natetenged tung pagdipindir na tung nirang nangimalesan tung kumpurming tinu pay nagpandeeg-deeg tung nira. Yang nag̱akanta nirang atii, magkaanggid ka ta palaksu tung kantang atiing kinanta ni Moises ang turuw̱ulun yang Dios atiing pagpalibri na tung nasyun nirang mga Israel ang tanira ipinagpalua na duun tung banwang Egipto. Puidi kang aningenu ang yang nag̱akanta nirang atii magkaanggid ka tung kinanta yang pag̱aningen ang karniru atiing nandeeg da tung sistima yang kaliw̱utan ang naa may tung kamatayen. Maning taa yang sarabyen yang kanta nira:
“Ampuan yamen ang Dios ang makagag̱aem tung tanan,
Durug puirsa yang mga pag̱urubraen mu ig makabew̱ereng.
Yawang may kagaeman tung tanan ang nasyun tung bilug ang kaliw̱utan,
Talagang matadleng ang pisan yang tanan ang pag̱abuat mu andang pisan ay mali na may gesye.
Yang tanan ang mga tau mamagkatinir da ta eled nirang duru tung nuyu,
Tanirang tanan mamagdayaw tung nuyu natetenged tung pagkadios mu,
Ultimu ilem yaway limpiung pisan ta ug̱ali.
Yang tanan ang mga tau maskin unu pang nasyunay mamagtuu ra ka enged tung nuyu,
Kipurki bistu tung nirang tanan yang pag̱urubraen mung pagkatamang pisan,” mag̱aning tanirang namagkanta.
Natetenged Tung Pitu NGangilan Ang Mamagpadalpet Yang Betang Yang Pitu Ka NGa Mangkukan (15:5-8)
5 Pagkatapus yang pagkarantaen yang mga taung atii, naitaw ra yang talub yang kuartung pinakasagradu ang yag lulg̱ud tung pagtuuan tung Dios tung langit ang naa pala, nabukaan da. Duun ka agbebtang yang mga katuw̱ulan yang Dios ang isinulat.
6 Asan da namansilua yang pitu ngangilan ang atiang may katengdanan nirang mamagpadalpet tung pitu ka nga sarutan. May pag̱asuut nirang aw̱el ang pag̱aningen ang lino ang durug kalimpiu ig durug kasusulaw ig may aw̱el kang yag baw̱anda tung tinanguni nirang bulawan yang kulay na.
7 Numanyan yang sam bilug tung epat ang atiang nag̱abui, ya ray nagparawat tung pitu ngangilan ang atii yang pitu ka nga mangkukan ang mga bulawan ang punuk ta irinemen ang yay kapananglitan yang kasisilag̱en yang Dios ang yay nag̱abuing asta tung sampang anda enged ang pisan ay katapus-tapusan na.
8 Pagkatapus yang pagtuuan tung Dios ang atii tung langit, tinaw̱ukan dang tanan ekel tung kasusulawen yang Dios may tung puirsa yang kagaeman na. Purisu anday sarang ang makled asan mintras indi pa ag̱atapus ta pamukbuk tung kaliw̱utan yang pitu nga sarutan ang pag̱aekel-ekelan yang pitu ka ngangilan.