18
Nag̱ibandilyu Ra Yang Malambeg̱an Yang Maning Pa Tung Siudad Ang Babilonia (18:1-3)
1 Pagkatapus tia, may naitaw sing sam bilug pang angil ang duun da manliit tung langit ang paparanek. Tanya abwat ta katengdanan ang yang lanyag yang kasusulawen na leep yang intirung kaliw̱utan.
2 Nagkekendalen dang mag̱aning,
“Talagang gew̱a rang pisan yang siudad ang Babilonia ang bantug da rin! Nakapasan dang pisan ta tau! Sinubli ra ilem ta mga dimunyu pati yang maskin unu pang mga lamlamay ang atiang makalalaway ta isip ig indi kang lag̱ing magpanganen, duun da ka namagleteg̱an.
3 Nagkamaning da ta maning tia yang siudad ay natetenged yay nagpanangway tung tanan ang mga nasyun yang sasang irinemen ang maiseg ug̱ud mamanginlasay ra tung Dios ig durung kalelyag nirang mamagsagyap ta mapakli nira tung anya ang para yay pag̱ineteg̱an yang mga isip nira. Pati yang mga adi tung bilug ang kaliw̱utan, namangumbaw̱ay ra tung anya. Pati yang mga nigusyanti tung intirung kaliw̱utan, namagmanggad da ka ekel tung siudad ang naang anda enged ay kategkaan yang nakursunadaan na,” mag̱aning.
Nag̱apabantay Ra Yang Mga Tauan Yang Dios Ang Mamaglibri Ra Tung Siudad (18:4-10)
4 Pagkatapus may nagngelu sing busis ang sam bilug ang liit tung langit ang yay busis yang Dios ang pagbitala ang mag̱aning,
“Ala, yamung binuatu rang mga tauanu, magluaamu ra asan tung siudad ang atia ug̱ud indiamu ra maguyuran ang mag̱usuy tung mga kasalanan ang pag̱abuat na. Muya madamayamu pa tung mga sarut ang ipadangatu asan tung anya.
5 Kipurki minumpuk da yang mga kasalanan na ang asta suminungkuk da nganing tani tung langit. Dinemdemu ra ka enged yang mga ubra-ubra nang malalain ang ya ray ipagsilutu tung anya.
6 Pati yamung pinilikung magpadangat yang silut ang atia tung anya, ala, kumpurming unu pang mga malalainay ang binuat na tung mga tauanu, ya si kay buaten mi tung anyang ibles. Belsen mi ta duruang dubli kung unu pay nagkarabuat na tung nira. Yang tasang tinag̱ayan na ta irinemen ang ipinainem na tung duma, ya si ay tag̱ayan mi ta irinemen ang dubli yang kaiseg nang ipainem tung anya.
7 Kumpurming ya pa ag̱ari yang pagpadengeg na tung sadili na ig yang pagpapsaw na tung tanan ang kalelyag̱an na, ya ray pasukulan mi ta silut ang ipakdul mi tung anyang pagkunsimisiunan na. Kipurki yang nag̱ipagkesen-kesen nang pirmi tung isip na, ang tanya unu sasang raynang paggaraemen. Belag̱an unu balu tanya ig anda unung pisan ay dapat ang pagseeyan na ang asta tung sampa.
8 Purisu, kumus maning da tia yang pagpabug̱al na, tung seled sang kaldaw ilem, kaw̱utan da ta mga sarut ang asan da ta mga larung kuari panilig ig asan da ka ta panuw̱uk ang puirti ang ya ray pagseeyan na ta duru ang pagkatapus, makuw̱ulan pa ka ta apuy. Kipurki yang magsintinsia tung anya yuung makagag̱aem ang yuu ka man ay Dios ang makagag̱aem tung tanan,” mag̱aning.
Yang Panganugun Yang Mga Tau Tung Siudad Kung Madiadu Ra Nganing (18:9-20)
9 Mag̱aning yang busis ang nagsugpat, “Dispuis yang mga adi tung kaliw̱utan ang namangumbaw̱ay tung anya ig namagpapsaw ka tung tanan ang kalelyag̱an nira, kung mabandaw ra nganing nira yang taw̱uk yang siudad ang atiang nag̱asiruk, mamagtarangiten dang mamamukpuk tung mga debdeb nirang pamanganugun.
10 Duun da ilem tanira tung alawid mamagbandaw natetenged tung eled nira ang muya mangadamay pa tanira tung parusang ipinakdul tung anya. Mag̱aning tanirang mamangarikdi,
‘Ari anin, kanugun ang pisan yang siudad ang atiang Babilonia ang bantug da rin ang duru ka rin agkapuirsa. Tung seled sang uras da ilem nainalian dang kinaw̱utan ta parusang durug lebat,’ ag̱aaning.
11 “Pati yang mga nigusyanti tung bilug ang kaliw̱utan, pamungawen da ka ta durung mamagtarangiten natetenged tung nalambeg̱an yang siudad ang atia ay natetenged anda ray mamangalang ang uman yang mga kargamintu ang nag̱ipaekel da rin nira duun.
12 May sari-saring mga alaas ang yang ginamit bulawan may landuk ang salapi, may mga batung mamaalen ang pagsiringgat-singgat ang sari-sari ra ilem yang mga kulay nira, may mga musya pa. Dispuis may mga aw̱el ang mga mamaalen ang ya ra yang pag̱aningen ang lino, may aw̱el kang kulay ta tapel ubin apuy-apuyan pa may sida pa. Dispuis may mga dikurasiun ang katulad ka tung sari-saring mga ayung atiang pambii ra ilem ang maita ig durug kabanglu ang ya ray nag̱alelyag̱an yang mga manggaranen ang iadurnu tung mga pamalay-w̱alay nira. May mga dikurasiun ang mga sangil ta ilipanting rinaw̱ulan. May duma pa ka enged ang yang ginamit ya ra yang mga ayung mamaalen ubin saway ubin landuk ubin marmul.
13 Dispuis may mga paamut ang mamaalen ang sari-sari kang klasi ang yang paggaramiten tung nira ya ag̱ipiiray tung tinanguni ubin ya ag̱ipataw̱ukay. Dispuis may irinemen ang binu, may mantika, may arinang primirang klasi, may trigu pa. Dispuis may mga ayep ang mga balaynen ang katulad ka tung mga baka, mga karniru, mga kabayu, ig may mga salaayan ang dikaritun ang pag̱aguyuran ta mga kabayu. Dispuis pa may mga tau ka ang ag̱ad mga masigkatau nira, piru ya pay magbuw̱uaten nirang mga kirepen ang ya ag̱ipaalangay.
14 “Mamag̱araning-aningan da yang mga nigusyanting pamagbandaw tung siudad ang mag̱aning,
‘Ay pa w̱a yang nagkarakursunadaan na ra rin? Talagang naplekan dang pisan ta tanan ang minaal na ra rin pati yang tanan ang pasadya nang pagsiringgat-singgat. Indi rang pisan maitang uman asan tung anya,’ ag̱aaning.
15 Dispuis yang mga nigusyanting atiang namangalang ig namagpaalang da rin yang mga ipiktus ang atia ig duun ka rin tung siudad ang atia yang pinagmanggaran nira, alawid-lawid pa, mamagtadeng da ilem, ay natetenged tung eled nira ang muya pati tanira mangadamay pa tung parusang ipinakdul tung anya. Pamungawen da ka ta durung mamagtarangiten ang mag̱aning,
16 ‘Abaa, lastima ilem yang siudad ang bantug da rin tung intirung kaliw̱utan. Tan taa, yang bisti na pulus mga mamaalen ang katulad ka tung pag̱aningen ang lino ig aw̱el ang kulay ta tapel ubin apuy-apuyan. May mga alaas na pang mga bulawan, mga batung mamaalen ang pagsiringgat-singgat ang sari-sari ra ilem yang kulay na, may mga musya pa.
17 Piru numanyan tung seled ilem sang uras, nakapasan dang pisan yang kamanggaran nang atiang duru ra ka rin,’ mag̱aning.
“Pati yang tanan ang mga kapitan tung mga salaayan ang panteeb, may yang tanan ang mga tripulanti nira, pati yang tanan ang mga pasairung pamagbiag̱i, asta yang tanan ang mga tau ang may mga pangita nira tung mga salaayan ang panteeb, alawid-lawid pa, mamagtadeng da ilem.
18 Kung mabandaw ra nganing nira yang taw̱uk yang siudad ang nag̱asiruk, mamagkekendalen da ilem ang mag̱aning,
‘Disti pa atiing primiru, andang pisan ay siudad ang magkapariu ra rin ta bantug tung siudad ang atii maskin ay pa,’ ag̱aaning.
19 Pagkatapus dayun dang mamangakep ta apuk tung tanek ang ya ibukbukay nira tung mga kulu nira natetenged tung kunsimisiun nirang subra. Nunut da ka ta pagtarangiten nirang mag̱aning,
‘Abaa, lastima ilem, kanugun ang pisan yang siudad ang atiing bantug da rin tung intirung kaliw̱utan ang yang mga pruduktu na, ya ra rin ay pinagmanggaran yang tanan ang may mga salaayan ang panteeb. Ang pagkatapus tung seled ilem sang uras nakapasan dang pisan,’ ” mag̱aning.
Yang Nag̱ipagpakasadya Yang Mga Tauan Yang Dios (18:20)
20 Yuung ti Juan ang may sulat, nani ra yang yeen ang isaleet. Ala, yamung dating tag̱a asan tung langit, magpakasadyaamu ra. Pati yamu asan ang binuat da yang Dios ang mga tauan nang sadili, asta yamu asan ang mga kaarumananu ra rin ang pinilik ni Ginuu tang Jesu-Cristong mag̱ing mga apustul na, may yamu ka asan ang pinanalig̱an yang Dios ang magpalatay yang bitala na atiing tukaw pa, magpakasadyaamu ra ka. Ay kipurki yang siudad ang naa siguradung sintinsiaan da ka enged yang Dios ang yang sintinsia mismung ipinakdul na tung numyu ya si kay ibalikay na tung anya.
Nag̱aulit Si Yang Panampetan Yang Siudad Ang Pag̱aningen Ang Babilonia (18:21-24)
21 Pagkatapus may naitaw sing sam bilug pang angil ang maktel ang ya ray nananggung ta sasang batung durug lebat ang pagkatapus ya ra iplekay na tung teeb. Dayun dang nagpasanag ang mag̱aning,
“Yawang Babiloniang bantug̱a ka rin tung bilug ang kaliw̱utan, tung maning kang pisan tiag kapuirsa yang pagpalagpak tung nuyu, ay india ra enged ang pisan maitang uman.
22 Kung kaw̱utun da nganing yang uras ang atia, indi rang pisan magngel ang uman asan tung nuyu yang turugtug̱un yang mga sanay ang manigtugtug ang katulad ka tung mga manigtugtug ta dikuirdas ubin yang mga manigpalauta ubin yang mga manig̱eyep ta turumpita. Asta yang mga panday tung sari-saring ubra, anda ra kang pisan ay maitang uman asan tung nuyu. Pati yang lag̱utrut yang mga galingan, indi ra kang pisan magngel ang uman asan tung nuyu ay anda ra nganing ay paray ang galingen.
23 Maskin mga kaas, anda ra kang pisan ay maitang uman ang magdekal asan tung nuyu. Pati yang aw̱ayag yang mga sumasakep tung kumbirang pamanadyaan, anda ra kang pisan ay magngel ang uman asan tung nuyu. Yang tanan ang atia, luw̱us dang maplek ay natetenged tung mga nigusyanti mu ang atiang namagyari rang darakulung mga tau ang durug kapinalandawen ig subrang subra yang pagtalig nira tung mga manggad nira. Yadwa pa yang tanan ang mga nasyun ta mga tau pinaglemay mu ra yang mga isip nira ang asta nangatalang da tung Dios.
24 Dispuis pa yang kapin da enged ang dilemen tung nuyu ya ra yang dug̱u yang mga manigpalatay yang bitala yang Dios may yang dug̱u yang kadaklan ang mga tauan nang kumpurming inimatay tung bilug ang kaliw̱utan natetenged tung pag̱urusuyun nirang ustu tung kalelyag̱an ni Jesu-Cristo,” ag̱aaning duun yang angil.