3
Yang Sulat Ang Nag̱ipaekel Ni Jesus Tung Sam Pundaan Duun Tung Sardis (3:1-6)
1 Utru si, mag̱aning si ti Jesus tung yeen, “Buinu, Juan, magsulata si ta italig mu tung pangerengan tung sam pundaan yang mga tumatalig tung yeen duun tung Sardis. Ya taa yang ipabetang-betang mu asan:
‘Yang may bitala taa ya ra yuung ti Jesus ang pagsinasaayami ta maayen yang Espiritu Santo ang yay may kaya nang anda enged ang pisan ay pagkakulang na ig may pitung bilug ang dumakel ang nag̱atapnayu. Nag̱askeanu yang mga buat-buat mi asan. Kung telenganamu ta kadaklan, midyu tung duruamug kabiw̱ung panirbian tung yeen. Piru tung pagkamatuud panalugpatayamu ra ilem tung yeen.
2 Purisu kung tung pag̱ereleken pa, mapuawamu ra! Paktelen mi ra yang pag̱urusuyun mi tung nag̱auyunanung midyu may nag̱aeped pa, baklu madayunan ang mawarang pisan. Sanu pang indiamu aningenu ay kipurki tung pagkainsapuu tung mga buat-buat mi, talagang belag pang pulidu tung pagterelengen yang Dios ang pagpaturuw̱ulunanu.
3 Purisu pademdeman mi kung unu pay itinulduk tung numyung atiing primiru ang ya ra ka rin ay pinauyunan mi. Ya si kay pakatuan ming usuyun ang nunut da ka ta panligna mi tung mga kasalanan mi. Ay kung indiamu ka enged magpamanman, parusaanamu ra yeen ta inali ang katulad ka tung panaw yang sasang takawan ang indi mi pa ka man maskean kung unu pang urasay ang magkaw̱ut.
4 Maayen ilem may pira pang bilug asan tung numyu tung Sardis ang yang mga sadili nira, ya ray inamlig̱an nira ta mupia ang para indi ilem mamansaan ta kasalanan ang katulad ka tung aw̱el ang ya ka ag̱amlig̱ay ang para indi mabulingan. Purisu, pagkaw̱ut yang uras, magkaranunutanami ra tung kaliw̱utan ang baklu ang yang suut nira makukulit. Kipurki yay magkabag̱ay ang pisan tung nirang indi ra ka enged nagpadeeg tung sistimang pangkaliw̱utan.
5 Kumpurming tinu pay indi ka magpadeeg, ya ra kay paablanu ta aw̱el ang makukulit ig indi ra enged punasenu yang aran nang isinulat tung listaan yang tanan ang pinaeyanganu ta pagpangabui nirang baklu ang anday pagtapusan na. Kung indi, ipailalaw ra enged tung ni Ama may tung mga angil ang pag̱apanuw̱ul na ang atia yay sasang tauanu.
6 Kapurisu kung nainu pay pamamati, kaministiran intindien nira ta mupia kung unu pay nag̱ianing yang Espiritu Santo tung mga tumatalig ang pamagsaragpun-sagpun ang kada sam pundaan.
Ya ra ilem tia ay maaningu tung numyu.’ ”
Yang Sulat Ang Nag̱ipaekel Ni Jesus Tung Sam Pundaan Duun Tung Filadelfia (3:7-13)
7 Utru si, mag̱aning si ti Jesus tung yeen, “Buinu, Juan, magsulata si kanay ta italig mu tung pangerengan tung sam pundaan yang mga tumatalig duun tung Filadelfia. Ya taa yang ipabetang-betang mu asan:
‘Yang may bitala taa ya ra yuung ti Jesus ang yay ultimung pinilik yang Dios ang maggaraemen tung uri. Bilang yuu yang kanubli ni Adi David ang naulang magpapanaw tung paggaraemen yang Dios ang baklu ang anday katapusan na. Kung tinu pay nag̱alelyag̱anung palg̱urun tung paggaraemenung atia, anday maampalar. Kung tinu pay nag̱alelyag̱anung ipaaw̱ig, anda kay mapagsuspindi.
8 Nag̱askeanu yang pag̱abuat mi. Maskin malakaamu ilem ig aranekamu ka man tung pagterelengen yang mga kaarumanan mi asan, piru pinaderepan mi ka enged yang bitalaw ang inusuy ig indiaw ka iningwara mi. Purisu indi mi paglipatan yang pangakuung naa tung numyu. Siguraduamu rang malg̱ud tung paggaraemenung atia tung uri ay maning pa inabrianamu ra yeen yang purta na ang anda enged ang pisan ay masarang ang magsuspindi tung numyung magpalg̱ud.
9 May mga tau asan ang kumus mga Judio, pamansianing ang ultimu ilem unu tanira ay matuud ang mga tauan yang Dios ang pagkatapus belag ka ay pamagbukli ra ilem. Yang pagpaturuw̱ulunan nirang sam pundaan belag da yang Dios ang katulad tung nag̱alaum nira, kung indi, ya ra ti Satanas mismu. Purisu pampatalungaenu ra tanira tung numyung pampaluurun ang para mamag̱ilala ra ka enged tung numyu ang yamu ka man yang nag̱agegmaanu natetenged yamu yang matuud ang mga tauan yang Dios.
10 Natetenged tinuman mi yang itinuw̱ulu tung numyung mag̱agwanta tung mga kaliwag̱an, purisu ta yeen, dipindiranamu ra yeen tung uras ang ipagkaw̱ut yang mga kaliwag̱an ang durug lebat tung bilug ang kaliw̱utan ang ya ray ipag̱ingaw̱us yang Dios tung mga taung pamagtinir tung kaliw̱utan ang kumpurming pagpasuag tung kalelyag̱an na.
11 Makaliaw rang maglekat. Purisu prusigiran mi enged ta mupia yang pag̱abuat ming nag̱auyunanu ug̱ud indiamu mawaraan yang maning pa tung primyung gustuung ipagpadengeg tung numyu.
12 Kung tinu pay magprusigir ka enged tung nag̱ipatumanu tung anya, padengeg̱anu ta mupiang pabakeren enged yang pagkabetang na tung katalungaan yang Dios. Buatenung maning pa tung sasang adiling ganeran tung pagtuuan tung Dios ang pagpaturuw̱ulunanu ang para duun da tanya magpakeen. Dispuis, yay sulatanu yang aran yang Dios ang pagpaturuw̱ulunanu ang para bistung pisan ang yay may anya tung taung atia. Pati yang aran yang siudad ang tiniran yang Dios tung uri ang yay pag̱aningen ang Baklung Jerusalem ang duun manliit tung anya tung langit ang magparanek, ya ra kay isulatu tung anya ang para bistu ka ang tanya sasang kinasakpan yang siudad ang atia. Asta yang aranu kang baklu ang ya ray magpailala tung pagkabetangung baklu tung uri, ya ka, isulatu ra ka tung anya ang para maintindian da ang yay sasang tauanu.
13 Purisu kung nainu pay pamamati, kaministiran ang intindien nira ta mupia kung unu pay nag̱ianing yang Espiritu Santo tung mga tumatalig tung yeen ang pamagsaragpun-sagpun ang kada sam pundaan.
Ya ra ilem tia ay maaningu tung numyu.’ ”
Yang Sulat Ang Nag̱ipaekel Ni Jesus Tung Sam Pundaan Duun Tung Laodicea (3:14-22)
14 Utru si mag̱aning si ti Jesus tung yeen, “Buinu, Juan, magsulata si kanay ta italig mu tung pangerengan tung sam pundaan yang mga tumatalig duun tung Laodicea. Ya taa yang ipabetang-betang mu asan:
‘Yang may bitala taa ya ra yuung ti Jesus ang pagkereng tung tanan ang pinangakuan yang Dios ang para magkamatuud da. Yuu kay matalig̱an ming talagang matuud yang nag̱ipagdiklaraw tung numyu natetenged tung planu na. Dispuis, ekel tung yeen inimu na yang tanan.
15 Nag̱askeanu yang mga ubra-ubra mi. Maskin indiamu ka man panalyud tung yeen, piru belag̱anamu ra ka maderep tung pag̱urusuyun mi tung mga kalelyag̱anu. Kisira manalyuramu ra ilem, u kung indi, magpaderepamu ra ilem ta ustu, atii ra rin.
16 Piru naang pamatuy-patuyamu ra ilem tung yeen, belag̱anamu ra maderep, indiamu ka panalyud, puis yamu maning pa tung pamangan ang belag dang makinit belag da kang malamig ang pisan, kung indi, nangalaw̱ab da ilem ang asan da nag̱ing malasay ra. Purisu nag̱aisipanamu ra yeen ang iplek ang maning pa tung yamu ag̱ibulaayu, yang kalalasayen ming atia tung yeen.
17 Ayw̱a indiamu aningenu, kipurki pag̱aningamu ang yamu manggaranen da, maayen da yang pagkarabetangen mi. Anda ray mga kaministiran mi. Piru naa pala andang pisan ay kaliw̱utan mi ang tung pagterelengen yang Dios, duruamug kaalang-alang ig makakaildawamung pisan! Yang kaalimbawaan mi yamu maning pa tung sasang naputu ra, maning pa tung sasang naburayan da, maning pa tung sasang luas.
18 Purisu ya taa yang ikunsiuu tung numyu. Tung yeenamu mangalang ta bulawan ang pinapag̱as tung apuy ug̱ud may kamanggaran ming matuud. Pati aw̱el ang makulit ang puiding masuut mi tung mga tinanguni ming luas, alangen mi ka tung yeen ug̱ud matabunan da yang kaeyakan mi. Pati bulung ang mapiid mi tung mga mata ming naburayan, alangen mi ka tung yeen ug̱ud maulikan da yang paneleng mi.
19 Ta yeen, tanya, kumpurming tinu pay nag̱agegmaanu, ya ray nag̱apatigbak-tigbakanu ta bitala ang para disiplinaenung tadlengen. Purisu magpaderepamu ra ta ustung manligna tung pamatuy-patuy ming atia tung yeen.
20 Naa w̱a ya ray dapat ang pamaridengdengan mi ta mupia. Katulad tung sasang taung panagbalay ra ang yay pag̱elat tung may balay ang patakwalen, yuu ya ka. Pag̱elataw ka tung numyung pag̱atag̱amanu ta tandeg yang mga isip mi kung imbitarenaw ra numyung magmangulu tung numyu u kung indi. Katulad ka tung may balay ang mag̱imbitar tung panagbalay ang magtakwal da ig magpakled da ka dayun tung balay na, kung tinu pay mag̱imbitar tung yeen ang magmangulu tung anya, magpakibingkitaw rang pisan tung anya ang pariu tung durua nga tauan ang pirming pagsaduan tung pamangan.
21 Puis kung tinu pay masalapay tung gustuung ipasalapayu tung anya, yay pakarungunu tung teparu tung uri ug̱ud kasiraanami ra kang maggaraemen. Bilang mambung da tung yeen ang nasalapay ra ka tung ipinasalapay ni Ama tung yeen, ang pagkatapus pinakarungaw ra ka anya tung tepad na ug̱ud kasiraanami ra kang maggaraemen.
22 Purisu kung nainu pay pamamati, kaministiran ang intindien nira ta mupia kung unu pay nag̱ianing yang Espiritu Santo tung mga tumatalig ang pamagsaragpun-sagpun ang kada sam pundaan.
Ya ra ilem tia ay maaningu tung numyu.’ ”