35
Kuyie nkpɑnnɛ̀ tì Seii ɛì kɔbɛ
1 Kɛ̀ ti Yiɛ̀ nKuyie nni mbɛ́innɛ̀ kɛ dɔ̀:
2 Onìtì fɔ̃́! Wɛ̃ɛ̃tɛ Seii tɑ̃rì ɛkɛ̀ bíɛ́kɛ̀ kɛ́ bɛ̀ nɑ̀kɛ́ m pɑ̃ɑ̃nɑ́ɑǹtì.
3 Nɑ́kɛ́ bɛ kɛ dɔ̀: Mí ndi Yiɛ̀ nKuyie n tú n yìtɛ́ kɛ còḿmúmu Seii ɛkɛ̀ tɑ̃rì kɔbɛ kpɛ́í nkɛ bo bɛ̀ kpɑnnɛ̀. N yòutɛ n nɔ̀ùtɛ̀ ntɛ Seii tɑ̃rì ɛkɛ̀ ĩ́nkɛ̀ kɛ̀ yɛ̀ bo dɔúnko kɛ́nɑɑ́ ntɛdɔntɛ̀.
4 M bo duɔ́ nkɛ̀ bɛ ɛkɛ̀ɛ dɔúnko kɛ́nɑɑ́ ntidobontì kɛ̀ bɛ̀ɛ bɑntɛ́ n túmɛ̀ di Yiɛ̀ Kuyie.
5 Bɛ̀ mɛ̀ nnìímmɛ̀mu Isidɑyɛɛribɛ sɑ̃́ɑ̃̀, kɛ̀ Isidɑyɛɛribɛ yɛi ntontɛ́ kɛ̀ m bɛ̀ potɛ́, kɛ̀ bɛ̀ bo mɛyɛǹcɑɑ̀rìmɛ̀ miɛkɛ bɑ́ bɛ̀ í bɛ̀ kuɔ̀ mmɛsémmɛ̀ kɛ cĩ́ɛ̃́kɛ́ kɛ bɛ̀ kɔ̀ù.
6 Mí ndi Yiɛ̀ nKuyie m bomu kɛ̀ míì bɛ́i. Bɛ̀ í mɛ ndepɛmɛ̀ mɛnitiyĩ̀ĩ̀ mmucóúmmù, mɛnitiyĩ̀ĩ̀ mmɛɛ̀ yó ncóú bɛ tenkɛ̀.
7 M bo kuɔ bɛ̀ɛ̀ kó dimɑ̀ɑ̀ pɛ̃nkù Seii tɑ̃rì borɛ̀, kɛ̀ dìi dɔúnko yúóó.
8 Bɛ̀ bo do Seii tɑ̃rì kɔbɛ mudoò kɛ́ bɛ̀ kùɔ. Bɛcíríbɛ̀ bo píɛ nho tɑ̃rɛ̀ ĩ́nkɛ̀ nɛ̀ sitɑ̃ɑ̃́ ĩ́nkɛ̀ nɛ̀ tibiti miɛkɛ nɛ̀ ikondɛí imɔu miɛkɛ.
9 Bɛ ɛkɛ̀ bo dɔúnko sɑ̃́ɑ̃̀, bɑ́ òmɔù tɛ̃́nkɛ bɑ́ nyɛ̀ ɑ̃, kɛ̀ bɛ̀ɛ bɑntɛ́ n túmɛ̀ di Yiɛ̀ nKuyie.
10 Seii ɛkɛ̀ kɔbɛ bɛɛ̀ bɛ́i nkɛ tú, bɛ̀ bo túótɛ́ mí ndi Yiɛ̀ nKuyie n kó kɛtenkɛ̀ n kpɑ̀ɑ̀tìyɔ borɛ̀ yɛ̀dɛ́ɑ̀?
11 Nɛ̀ dɛ kpɛ́í mmí ndi Yiɛ̀ nKuyie m bomu kɛ̀ míì bɛ́i, bɛ miɛkɛ do pɛ́ì mɛ̀ɛ̀ kpɛ́í n nìtìbɛ̀ kɛ̀ bɛ̀ bɛ̀ níí nkɛ bɛ̀ póó, n yóó mɛ mbɛ̀ dɔ̀ɔ̀ mɛmɔ́mmɔmmɛ, m bo bɛ̀ potɛ́ kɛ̀ bɛ̀ɛ yɑ̀ n dòmmɛ̀.
12 Kɛ̀ bɛ̀ɛ bɑntɛ́ kɛ dò mmí ndi Yiɛ̀ nKuyie n kèè tipocɛ̃mmúnɑ́ɑǹtì bɛ̀ nɑ̀kɛ́ tì, bɛ̀ do tú dìì mɔ̀nnì Isidɑyɛɛribɛ tɑ̃rɛ̀ dɔúnko kɛ̀ bɛ̀ yɛ̀ pɛ̀tɛ́ kɛ tiekɛ.
13 Bɛ̀ n cɛ̃nnɛ́nɛ̀ kɛ̀ dɛ̀ dɛumu, kɛ n sɑ̃̀ḿmú kɛ̀ n dɛ̀ kèè dɛmɔu.
14 N yóó pɔntɛ bɛ ɛì pɑ́í pɑ́í nwe kɛ̀ dìi dɔúnko kɛ̀ dɛ̀ɛ nɑrikɛ yɛbotɛ̀ mí ndi Yiɛ̀ nKuyie mmíì bɛ́i.
15 Isidɑyɛɛribɛ tenkɛ̀ do dɔúnko kɛ̀ dɛ̀ mbɛ̀ nɑɑtimu, n yóó mɛ mbɛ̀ dɔ̀ɔ̀ mɛmɔ́mmɔmmɛ, Seii tɑ̃rì bo dɔúnko, Edɔmmu omɔu, kɛ̀ bɛ̀ɛ bɑntɛ́ n túmɛ̀ di Yiɛ̀ nKuyie.