18
God i distroi Babilon
1 Apta ol dem samting, ai bin luk nada einzel em i kamdaun prom eben. Em i kare lo blo bigpaua, ane dis ert i bin laitap ane sain oloba prom em.
2 Em i bin singaut wea mina laud bois:
‘Pinis, pinis! Dat prapa big siti Babilon i pinis!
Em i go kam aus blo ol debol,
ane aus blo olkain nugudspirit,
ane ples blo ebridem prapa nadakain nugudpizin i go stap de tu.
3 Ebridem pipol lo ebridem kantri lo dis wold
bin dringk dat wain blo em
wea i meke dempla po bane ai po meke olkain nugud sekssin.
Ebridem king lo dis ert
ol i bin meke olkain nugud sekssin wea em.
Ebridem biznisman lo dis ert tu,
i bin kam ris prom ebridem riswei blo em.’
4 Dis taim ai bin lisen nada bois i kam prom eben i spik diskain:
‘Mai pipol, yupla kamaut prom Babilon
solong yupla nogo zoin lo ebridem sin blo em,
o bambai yupla go sere dem nugud panis blo em tu.
5 Ebridem sin blo em i mina bigwan,
ol i ipemap go antap kese eben,
ane God em i no sabe piged ebridem rabiswei blo em.
6 Mekem po em wanem em i bin mekem lo yupla de pastaim,
bat distaim dabulem dem panis blo em.
Dat dringk blo dem nugudwei wea Babilon i bin gibem lo yupla,
yupla mas dabulem mostrong
ane gibem baik po em po dringk.
7 Dis oman em i bin stap lo gudlaip ane apilaip,
bat gibe em da panis wea i sutem.
Mekem po pil nadakain pein ane nadakain sore.
Bipo, em bin bloubaut emselp diskain, insaid lo at blo em,
“Ai kare paua ane ai rul wase kuin.
Ai no wase widooman,
ai no sabe sore ane krai.”
8 Bat plenti bigpanis i go kam ane kese em lo wan dei,
ded go kam ane em go bigkrai ane em go gad big anggre.
Ane em i go ban lo bigpaia,
bikoz da LodGod uda go zaze em,
em i gad prapa strongpaua.’
9 Nau ebridem king lo dis wold, uda bin meke nugud sekssin lo em ane stap lo demkain izilaip lo em, wen ol go luk smok i kamaut prom dat big siti Babilon, ol i go bigkrai ane singaut mina laudwan bikoz ol i luk da siti i ban.
10 Dem king go stanap lelbet longwei bikoz ebriwan dempla i prait bambai ol i go gede da seimkain panis ya wiskain dat siti i gedem. Ane ol i go singaut:
‘Yagar! Yu Babilon, yu lugaut!
Yu big eleba siti.
Yu prapa strong, bat nadakain kuikwan
panis blo yu i go kese yu.’
11 Ane ebridem biznisman lo dis ert ol i go krai ane pil prapa sore po Babilon, bikoz i gad nobodi nau uda ken baie samting prom dempla nau.
12 Dem biznisman i gad olkain kago blo ol dipren samting ya. I gad gold ane silba, olkain nais ston, ane nais perl, olkain spesil kaliko, papal kala ingk, silk ane brait red kaliko. Ane i gad dem wud wea em i smel nais ane olkain dipren kabing wea dempla bin mekem prom tit blo elepant ane kabing wea ol i mekem prom dia wud, bras, aian ane dia ston.
13 Ane i gad ol nada kago, oil wea i gad switsmel, olkain diprenkain insens, wain, oliboil, plaua ane wit, olkain kau, sip, os ane olkain oskariz ane ol pipol wea dempla i sleib.
14 Ane nau ol dem biznisman ya ol i spik diskain po dat oman:
‘Ol dem plasting wea yu tumas laik,
yu nomo go gad nau.
Ebridem ris samting lo yu
ane demting wea em i luk nais lo yu,
ol i pinis prom yu nau.
Ebridem samting i pinis.’
15 Ane ol dem biznisman ya wea dempla i bin kam prapa ris prom sele ol dem kago po em, dem biznisman i bin stanap lelbet longwei bikoz ebriwan prom dempla i prait bambai ol i go gede da seimkain panis ya wiskain da siti i gedem. Ol i go bigkrai mina laudwan:
16 ‘Yagar! Yu Babilon yu lugaut! Yu big eleba siti.
Pastaim yu bin were olkain gud klos wea ol i papal ane brait red.
Ane yu bin luk prapa nais prom were dem gold samting ane dem nais ston ane perl.
17 Bat prapa kuikwan
ebridem gud samting blo yu ol i wantaim pinis.’
Ane ebridem kapten blo ebri bot, dem pasinza, dem kru ane dem nada man wea dempla wok biznis lo solwata, dempla tu i go stanap de longwei ane luk.
18 Ane wen dempla ebribodi luk smok blo paia wea i bane da siti, dempla i go singaut diskain, ‘Ei! Yagar! I nogad no nada big taun wase dis big siti ya!’
19 Nau ebri demwan de i go pute dast antap lo ed blo dempla po soem dat dempla i sore. Ebribodi i go gad big sore ane dempla go base bigkrai:
‘Yagar! Babilon! Yu big eleba siti!
Dempla uda bos blo dem bot lo solwata,
ol i nau bin kam prapa ris prom yu.
Bat prapa kuikwan, ebriting blo yu ol i wantaim pinis.’
20 Yupla de lo eben, yupla mas glad prom dat panis wea dat oman i gedem.
Seim po yupla tu, ol dem pipol blo God, dem misnareman ane dem spesilmesizman.
Yupla mas glad lo dis panis,
bikoz God em bin zaze dat oman ya
prom ol dem nugudting wea em i bin mekem po yupla.
21 Nau wan strongeinzel em bin teke wan prapa big ston, ane em i sakem daun lo da solwata, ane em i singaut diskain:
‘Babilon, yu big eleba siti.
Wa! Seimkain wase dat ston, dempla go sake yu godaun tu,
ane dempla nogo luk yu gen.
22 Insaid lo dat siti, i nomo go gad saun blo olkain miusik.
Nobodi go plei gita, nobodi go sing,
nogad no saun blo plut ane trampat.
No wokman i go wok de gen.
Nobodi i go meke bred lo dat siti nomo.
23 Dem lamp i nogo meke lait de nomo,
ane nobodi i go maret ane meke pisting insaid lo yu gen.
Bat bipo, ebridem biznisman blo yu
ol i bin prapa bigman lo da wold,
bat nomo nau.
Babilon bin trike ol dem pipol
ane meke demwan go ol rongwei.
24 God i bin panse dat siti blo Babilon bikoz prom dem blad wea i bin ran lo dem strit de,
da blad blo ol dem spesilmesizman
ane ol dem oli pipol blo God
ane blad blo ol pipol wea ol nada pipol i bin kile dempla tu ya lo ert.’