CORINTH
MITE HENGA
PAUL LEKHA THOT KHATNA
Ngailutna sodoh teiding lunggon neiyin
Houbung boina neipet'a dinga chihna thuseiho!
1 Corinth lekhabu sung thu umdan
Corinth Houbung a kiboina, kibung khenna, kinahna, anaum hin Christian ho lhagao thua alhahsamnau akimudoh in ahi. Tulai dinmun to kitoh boinaho-Court ahilouleh Haosa koma kiheh, jinei kisuhlouna, kida chule lhagao thilpeh thudol-a kiboina umho thudol akiseiyin chule tulai Houbungin chutobang phatteng, iti ding ham ti thun Solchah Paul in hilna aneiyin ahi. Paul in Pathen chate ho chu chonna thenga chonding, Lhagao Theng chenna ahiu 1 Crth 3:16; 1 Crth 6:19, lunghanna khel'a kiphalam gehcha um, lungkham khel'a lungnema Pakai Yeshua a chonphatna alahtah diu thudol'a hilna anei ahi. Solchah Paul in kithangthipnaho, kiletsahnaho hin Christian kipumkhatna le kingailutna adal-e ti aseiyin ahi.
Hijeh chun hiche lekhathot hi simjom jinga pha ahi. Hiche lekhabu nasima kon'a nangma hinkho kikhol chilna neiya hoilaipen chu nakisuhdih ding ham, ti nakimudoh thei ding ahi.
Lekha thot jihpa chule ajih kum
Hiche lekhabu jihpa hi Solchah Paul ahi. Aman hiche lekhabu hi AD 54 ahilouleh AD 55 kum'a ajih hidin ginchat ahi.
Koi henga ajih ham?
Solchah Paul in Corinth kiti kiveina khopia cheng Greece gam sunga Gentile pengthah ho henga ajih ahi. Solchah Paul in Corinth Houbung hi anaphudoh jou kum ni, kum thum jouvin boina phabep in ahinphatai. Houbunga kitomona, kibung khenna, lhagaova louchalna, jinei kisuhlouna, penthah chanpi alamlouva bolna, lhagao thilpeh mankhelna, lhagaova pilhin theilouna ho jeh'a boina jatchom chom umho suhthip le lhagaova kiledohsahna ding deina'a hiche lekhathot hi anajih ahi.
1
Lemna thu
1 Hiche lekhathot hi Pathen lung cham'a kilhengdoh Yeshua Christa solchah Paul le isopiu Sosthenes a kon ahi.
2 Keiman Pathen houbung Corinth a um nangho Pathen in amithengte hiding a akouho henga kahin sut ahi. Aman Christa Yeshua jal'a athenga nasemu ahi, munjousea Christian ho jouse, I Pakaiyu Yeshua Christa, amaho le eiho dinga Pakai, min hinkou ho jouse abolna banga.
3 I-Pau Pathen le Pakai Yeshua Christa chun nangho lungset le cham lungmon napeuhen.
Corinth'a Lhagao thilpeh ho
4 Nangho tua hi Christa Yeshua a nahi jalun chule lungsetna thilpeh napeh jalun keiman ka Pathen chu kathangvah jingin ahi.
5 Ama a kona na houbungu hi Pathen in imalam jousea nahaosah u ahin, thusei thepna le hetthemna jouse hi naneiyu ahi.
6 Hiche hin keiman Christa chung thu kaseipeh uhi adih e ti aphotchen ahi.
7 Nanghon tua lhagao thilpeh tintang nangaichat hou chu I-Pakaiyu Yeshua Christa hungkitna ding kinem'a ngah a nahi jeh uva naneiyu ahitai.
8 Aman achaina geiya nahatsah uva, IPakaiyu Yeshua Christa ahung niteng nolnabei hinkho naman theina dingu ahi.
9 Pathen hi tahsan umtah ahina jal'a Aman aboldinga asei chu thonlou hela ahinbol ding ahin, chule Ama chun Achapa Pakai Yeshua a chan neikhom dinga nangeh u ahitai.
Loitum sem chonset ahi
10 Kasopi deitahte, I Pakaiyu Yeshua Christa thuneina'a kangeh nom nau chu nangho khat le khat kilungtoh tah in umun. Houbunga kibung khenna umhih hen. Chusang in lungkhat kisauvin, lunggel le lungtup kithakhat hiuvin.
11 Ajeh chu kasopi deitahte, Chloe insung mite phabep in kitohmoa naum u thu chu kajah a ahung seiyuve.
12 Nangho lah a mi phabep in, “Keima Paul nungjui kahi,” abangkhat loiyin, “Apollos nung kajuiye,” ahilouleh, “Peter nungjui kahi,” ahilouleh “Christa bou kajui ahi,” natiuvin ahi.
13 Christa chu loituma achom cheh'a nakhen'u hitam? Keima Paul hi nangho dinga kikhenbeh a kahim? Nalah uva Paul mina baptize kibol naumuvem? Na um hihnauve!
14 Nalah uva Crispus le Gaius tailou khatcha baptize kanabollou jeh in Pathen kathangvah e.
15 Ajeh iham itileh tua hi koimachan kamin in baptize einabol'e eititheilou dingu ahitai.
16 (Oh ahinai, keiman Stephenas insung pumpi jong chu baptize kanabolnai, ahinlah koima dang baptize kabolbe kahepoi).
17 Ajeh chu Christan keima baptize bol le dinga eisol ahipoi, Kipana Thupha seiphongle dinga bou eisol ahi. Christa thingpel chun athaneina aman louna dinga chihna thudol asei kahilou ahi.
Pathen thahatna le chihna Christa
18 Ajeh chu thingpel thuhi mahthahna lam manoho dinga ngol hoitah thu ahi. Hinlah eiho huhhingna chang ho dinga Pathen thahatna ahi.
19 Pathen Thubun aseima bangin, “Keiman miching ho chihna chu kasuhbei ding, chule milungching chihna chu imacha hilouva kakoi ding ahi” ati.
20 Hiti ahijeh chun, chihgilna neiho, lekhathem ho, chule vannoi lungthim themnaa minelkal hat ho iti tauvintem? Pathen in hiche vannoi chihna chu angola amu ahibouve.
21 Pathen in Achihna a vannoiyin mihem chihnaa Ama ahetdoh lou dingu ahi ti amu jeh a, angol ho thusei banga kathuseiyu hin atahsan ho ahuhhing nadinga amanchah ahi.
22 Van'a kona melchihna thum Judah nam mite dinga hichu ngolthu ahin, chule Greek mite, mihem chihna hol ho, dinga jong ngol thu ahi.
23 Hitia hi keihon Christa kikhetbeh thu kaseiyu hi Judah nam mite lunghan kondohna ahunghin chule chidang namdang hon pannabei thu kisei ahibouve, atiuvin ahi.
24 Hinlah Pathen in huhhing dinga akou ho dingin vang, Judah mi hihen chidang namdang hijong leh, Christa chu Pathen thahatna le Pathen chihna ahigel e.
25 Hiche Pathen in ngol tah a tohgon anei hi mihem achingpen tohgon sangin jong achingjon chule Pathen thalhahsamna chu mihem thahatpen sangin jong ahatjo nalaiye.
Pakai jenga bou loupina
26 Kasopi deitahteho geldohtemun, Pathen in nanakou pet'u chun hiche vannoi lamdol a aching'ah ahilouleh athaneiyah ahilouleh ahaovah naum pouve.
27 Chusangin, vannoiyin angol'a agel ho'u chu Pathen in ching kisaho jachatsahna dinga alhendoh ahi. Chule Aman thaneilou ho jong chu thaneitah a kigel ho jachatsahna'a alhendoh ahi.
28 Pathen in hiche vannoiyin anahsahmo ho, imacha louva agel ho, chu alhendoh a, vannoiyin thupitah a agelho imacha hilou sosah dinga manchah dinga alhendoh ahi.
29 Akhonna keiya, koimacha Pathen angsunga akiletsah hoitho umlouna ding ahi.
30 Pathen in Christa Yeshua toh nagop khomu ahitai. Iphatchompina ding uva Pathen in chihna tahbeh chu Ama ahisah ahitai. Christan eiho Pathen toh isuhchamu ahitah jeh in, Aman eiho athenga chule athengsel a eisem uva, chule chonset'a kona eilha ongtholu ahitai.
31 Hiche jeh a chu Pathen Thubun asei, “Nangma nakison noma ahileh Pakai chungthua bou kisongin,” ati ahi.