1 Hiti chun van le leiset chule asunga thil umjouse chu loupi tah a sem chai ahi tai. 2 ✡Hichun ni sagi lhin nin Elohimin athilsem chu abonchan achaiyin, hiti chun a thilsem ho jouse akon in ama akicholdo tai. ✡ 3 Hiche ni sagi lhinni chu Elohimin phatthei aboh in chule atheng ahi tin aphongdoh tai, ajeh chu athilsem le anatoh jousea kon'a akicholdo ni ahi. 4 Hiche hi van le leiset ahung kisemdoh a akhanggui hung kipatdoh dan ho chu hiti hi ana hi. Yaweh Elohimin leiset le van ahinsem patni chun, 5 Leiset chunga tollhang a jong hamphung keh doh loulai ahi. Ajeh chu Yaweh Elohimin gotwi leiset chunga ajuhsah loulai ahin chule hia chu koima natong ding umlou lai ana hi. 6 Ahin leiset'a konin twimei ahung kaiyin chule leichung jouse chu twiyin achapnou vin ahi. 7 Chuin Yaweh Elohimin leichunga konin vutvai achun mihem asemin, chule a nahhom'a hinna hu alhakhum a ahile mihem chu hinna nei ahung hitai. ✡

8 Chuphat in Elohiminjong niso lama Eden hon aphut dohin hiche achun asem sa mihem chu akoi tai. 9 Chuin Yaweh Elohimin leichung'a kon in vetnom nom umle neh ding thingga namkim akedoh sah in ahi, chule honlai lung'a chun hinna thingphung jong chule ase le apha hetna thing-phung jong akesah in ahi. ✡

10 Hiche Eden hon'a kon chun honlei chapnou jing ding in vadung along in, vadung chu vadung li in ahung long khen'in vadung li asohdoh e. 11 Vadung khatna chu ahile Pishon ahin, hiche chu sana kimuna vadung ahin Havilah gam pumpia long kimvel ahi. 12 Hiche gam'a sana kimu ho chu ahoi thei lheh in a namtui jah nom umtah chule song namtui jong akimui. 13 Vadung ni lhinna chu amin Gihon ahin, hiche vadung chu Cush gam pumpia long kimvel ahi. 14 Vadung thum lhinna chu ahile Haddekel ahin, hiche vadung hin sah solam gam'a Asshur gam pumpia long ahin, chule vadung li lhinna chu Euphrates ahi. 15 Chuin Yaweh Elohimin amisem dohpa chu Eden hon sunga apuilut in hiche hon'a natong ding le avetup ding in apansah tai. 16 Ahin Elohimin mipa koma athupeh chu, “Nang man hiche honsunga theiga ho khu nadei dei naneh thei cheh ahi. 17 Hinlah nangman hon lailung'a ase le apha hetna theiga vang naneh lou beh ding, hichu naneh nini, na thitei tei ding,’’ ahi. 18 Chujong le Yaweh Elohimin aseiye, “Mihempa achanga a-umhi apha poi hijeh chun keiman a umkhom pi ding khat sempeh ing kate,’’ ati. 19 Chuin Yaweh Elohimin leivui chu leingan a sosah in leichunga ganhing namkim asem in chule vacha ho chung lam'a alensah in chuin hiche ho jouse hi amin ipi pi asah em tin mihempa kom'a ahinpui khom in hiche a mihem pan amin vo najouse chu tuni geia amin a pangden ahi tai. 20 Hiti chun mihempa in ganhing namkim chu aminvo cheh in, chunga lengthei vachateho leh gamsa jouse jong aminvo soh keiyin ahi. Ahinlah mihempa kithopi ding akimu doh hih laiye. 21 Hijeh chun Yaweh Elohimin mihempa chu a imut-mil sah in a imut-mil kah chun Elohimin anahgu khat aladoh in anung chu aphe in atom jol peh in ahi. 22 Chuin Yaweh Elohimin Adam nahgu a lah doh'a kon chun numei khat asemdoh in amanu chu Adam kom'a ahin puilut in ahi. 23 Hichun mihempan aseiye, “Amanu hi keima gu akon'a kisemdoh ahin, chule aphevou jeng jong keima phevou ahin, amanu hi tu apat'a numei kiti ding ahi, ajeh chu amanu hi pasal'a konna kiladoh ahi,” ati. 24 Hijeh a chu pasal in anu le apa a dalhah a aji numei'a beh ding chule amani chu tipum khat kiti lhon ding ahiye. ✡ 25 Ahin hichepet chun pasalpa ahin numeinu ahin ani gel lhon a sagoh keuva um lhon ahin, ahi vang'in jachat na anei lhon pon ahi.