1 Joseph chu Egypt gam'a ana puijun hiche apat a chu Ishmaelite sum-kolvei mihon Potiphar kiti pa koma ana joh un ahi. Potiphar natoh chu Egypt lengpa Pharaoh sepai lamkai a pang ahi. 2 Pathenin Joseph chu aumpi jing in, hijeh chun Egypt gamsunga abol lam jouse a alolhing jingin ahi. ✡ 3 Joseph chu Pathenin aumpi chu athil bolna jousea konnin apupan ahin muchen tan ahi. 4 Hichun Potiphar chu Joseph chunga alunglhai lheh jeng in, Joseph chu ama ban tah in akoi tan ahi. chule Potiphar in Joseph chu a insung jouse chule anei agou jouse vetup dingin atungdoh tan ahi. 5 Hiche nia pat'a chun Joseph chu apupa Potiphar in insunga ima jouse vetup in anganse tai, chule Joseph chonphat jeh chun Pakai phatthei bohna chu Potiphar insung a achutan ahi. Hitichun ainsung a thil ijakai akituptan, chule alousohga ho ahin chuleh agancha ho jong apungthei taovin ahi. 6 Hichun Potiphar in Joseph chu ama insung vetup ding le anei agou ho jouse vetup ding in thanei na jouse ape dohtai, chule Joseph umjeh chun aman imacha ah akisaboi tapon, lungkham na jong aum tapon, chule aneh ding anneh tilou thil dang thil dang imacha ahepha tapoi. Joseph chu mi melhoitah vetnom nom umkhat ahi. 7 Chule phat chomkhat jouvin, apupa loinun Joseph chu ahin velel tan, “Hung in eini lumkhom hitin kitimat hite tin Joseph chu ajol tai.” 8 Amavang Joseph anom pon, Joseph in Potiphar inneipi chu hitin adonbut e, “Ka pupan hiche insunga thil ho jouse vetup dinga ei nganse ahi,” ati. 9 Hiche insunga hi keima tilou thanei dang aum poi, kapu pan nangma chung a thaneina eipe poi, ajeh chu nangma aloinu nahi jeh in hi tobang thilpha lou chu iti keiman katoh a Pathen douna a chonset kabol ding ham ati. 10 Hiti chun ama nun aniseh in Joseph chu ano ano jeng in, amavang Joseph chu amanu toh lupkhom a ki timat ding chu pum noplou ahin, ahithei chan a jammang ding joh chu agot ahiye. 11 Nikhat vang chu koima cha umlouna achun Joseph chu ama ngaiya natong ding in achen. 12 Amanu chu ahung lut in a sangkhol ah akai jin, “Hung loiyin eini ilup khom lhon ding ahi,” ati. Hichun Joseph in a sangkhol asut lhan aki tom doh tai. Ahin a sangkhol chu Potiphar loinu khutna adalha den tan ahi. 13 Hichun Joseph la ajamdoh tan ahin amanun akhut a um asangkhol chu achoiyin, 14 Amanun insunga asohte jouse akou khom soh keiyin, hiche phat chun pasal jousen ahin dellut cheh un, amanun hitin aseiye, “Veuvin! Eingolbol diuvin hiche Hebrew sohpa hi kajipan ahinpuilut e! Amapa hi kei suse din ka insung denna a ahunglut in, ahin keima o sangtah in kapeng in ahi. 15 Keima hatah a o sangtah a kapen phat in polam a ajamdoh in alheimang tai, ahin aman asangkholchol chu kakoma ada lha dentai” ati. 16 Hiti chun amanun sangkhol chu aloipa in ahung lhun masang in phatechan a koitup sellin ahi. 17 Hichun amanun aloipa koma thusoh ho chu asei tai; “Hebrew sohpa nahin puilut pa khun insunga ahung lut in suhset ding eigoi,” ati tai. 18 Amavang keima o sangtah a kapen phat in polam ah ajam doh in a sangkhol ada lhah ahi. 19 Hichun Potiphar chun ajinu thusim Joseph in amanu chung a athilbol chu ajahdoh phat chun hatah in alung hang lheh tan. 20 Hijeh chun Potiphar in Joseph chu songkul'a akoitan chule lengpa songkul'a umho to akihen khom un, ama jong hiti chun aum den tai. 21 Ahin Pathenin Joseph chu songkul'a jong aumpi jing in, angailut na ho jong avetsah jing in chule Pathenin Joseph chu songkul ngahpa to jong kingailut na ape kit tai. ✡ 22 Phat chomkhat jouvin songkul ngahpan Joseph chu songkul'a umho lah a alenpen in akoitan, hiche songkul sunga thil soh bouina jouse chu Joseph thaneina noiya akoi tai. 23 Pathenin Joseph chu aumpi jeh in imacha boina aumtapoi, athil bolna anatoh na jouse alolhingsel in hijeh chun songkul ngah pa jong imacha aboita poi, ajeh chu thil jouse Joseph in anga jeh chun imacha aphamo ding aumpoi.