1 Chuti chun chimpei kipei lah a konin Pakaiyin Job chu ahin donbut tai: 2 Koi hiya hitobang hetna neilou chu chenga kachihna thu hin donga chu? 3 Pasal pha bangin nakong kigah in, ijeh inem itile keiman nangma thu kadoh ding nangin hiche ho chu nei donbut ding ahi. 4 Leiset bul kaphu a chu hoiya nana um'em? Nahet leh nei seipeh in. 5 Kon alet aneu dan aga te a chuleh ageigol hohi akaitoh ham? 6 Abul hi ipin atheh ham? Aninga songpi chu koi koiham? 7 Jingvalpa ten la asahkhom uva chuleh vantil jouse kipah a hung pengdoh diu ham? 8 Naobu sunga hung pengdoh banga twipihi gamgi chin kah khat sunga kon akoija? ✡ 9 Chuleh meibol ponsilla kakisil a chuleh muthim lhangkhal a kakitoma, 10 Ajeh chu vapam kasem peh a, anunga kotpi akhel louna dinga kakam khum ahi. 11 Hichan a gamla chule hisanga gamlajo a nahung louna dinga hiche mun a hi kiloupi sah tah a nakinon nangah ding ahi tin kaseije. 12 Jingkah khovah nadinga thu napeh khah a khovah jong solama konna hung kipan dinga nahil khah em? 13 Khovah hin leiset kolmang geija asalvah nadinga nasema, gitlouna jan muthim changei bou vah dinga nasem khah em? 14 Khovah ahung nai tengle leingan chunga mahor kinam bangin leiset jong agong ahung kilang doh jitai. 15 Khovah hin migiloute asunoh phah in chuleh kihat sah tah a kidom sang ban lhang jong asuhai tai. 16 Twipi hung lon doh patna twinah phung nagahol doh khah a hem? athuh dan nakhol doh khah hitam? 17 Thina kelkot hoiya um'em ti nahet khah ta hem? Muthim lhangkhal kihehna kelkot namu khah ta hem? 18 Leiset letdan nagel doh khah a hicheng chu nahet leh nei seipeh in. 19 Khovah hoiya konna hung kipan doh ham? Chuleh muthim hoilanga cheji hitam? 20 Khat cheng chenga a in na napuilut theija chuleh amun lhunje chu nahet em? 21 Ahinlah hicheng chu nahet maithei ahi, ijeh inem itile thil ijakai kisem masanga penga nahi tan, hijeh a chu ijakai nahet themsoh ahitai. 22 Buhbang kikhol khomna mun naga chelut khah ta hem? ahiloule gelchang kikhol khomna mun naga mu khah ta hem? 23 Genthei hesoh nikho a gal manchah dinga kakhol ahin, kidou nikho leh kisat nikho a dinga kakhol khom ahi. 24 Khovah hung kondohna lampi chu hoilai hija, solam hui chenna chu hoilai ham? 25 Go hattah a hung long jung jung twilam chu kon asemma kolphevahna lampi kon adopeh ham? 26 Hampa ke louna gamgo lah leh nelgam mihem chenlouna gam'a chu kon go ajuhsah ham? 27 Tolgo lah sunouva dangchim sah dinga go juh sah chu koi hija chule hampa louhing kedohsah a koiham? 28 Go in pa aneijem? Daitwi kon ahin pen doh sah ham? 29 Buhbang lhang hingnu chu koiham? Vanna hung kon buhbang twihi kon ahin ham? 30 Ijeh inem itile twi chu song banga tah in akisoh jin chuleh twi chung chu akan den jin ahi. 31 Ahshi ho kitol ding dan khu nahil theija bombiel akoi ho khu alomma nakan theija, ahiloule juhei suhtum khu akhau nalhap kang thei ngaijem? ✡ 32 Kum kiheichin hohi aban ban cha che dinga nahil theija ahiloule ahsi somleng chu anoute toh van jotpai dinga napuile theijem? 33 Thilsem jouse chondan hi nahet soh keija, leiset hi dan dungjuija naman chah thei ding ham? 34 Meibang lom chu nakouva chule go nasosah theijem? 35 Kolphe chu nakilah sah theija chule naseina mun chu navah sah thei ding ham? 36 Lungchang thil het jeng theina pea chu koi hija chule lungthim angaina a khohetna pe a chu koiham? 37 Meilhang ho sim jouna dinga chihna lhingsetna neikoi hija, vanna twi kikholna mun loukhoija khoilet jou ding koiham? 38 Tolla leiset hi akikoi got setna chule leiset chu leilhanga atahsah thei ding ham? 39 Keipi dinga neh ding namat khom peh a chule keipi bahkai noute gilkel chu alung nachim a navahva jouva, 40 Akosung uva alupnauva ahiloule nang noija abohmat pet tengule, 41 Vavomte khu kon an apeh a anoute khu Pathen jah dinga apenna chule gilkella amoh toilele tenguleh kon an apeh jiu ham?