116
Pakai Hi Mihepi Ahi
1 Pakaijin ka o eingai peh eikhoto dia katao na eisan peh jeh in keiman Pakai kangailui.
2 Aman eihin ang ngat a kataona eingaipeh in kahaithei laisea keima katao jing jingding ahi.
3 Thinan apon in eihin tomkhum e; lhankhuh gimneitah chun eihin lonvuh e. Keiman lungkhamna leh lunggimna ngen kamu e.
4 hiteng chuleh keiman Pakai min kakoujin, “Pakai lungset'in neihuhdoh in!” katijin ahi.
5 Pakai hi itobang tah a milungsetthem hitam! Chuleh itobang tah a pha a hitam! I-Pathen'u hi ichan gei a mikhoto them hitam!
6 Pakaijin chapang lungthengtah atahsanna neijachu ahahsatna'a ahoidoh jin ahi. Keima thina toh kimaitoa kaum laitah in aman eihuhdoh in ahi.
7 Kalhagao, nacholdo namun hinjon kittan ajeh chu Pakai hi keidingin aphalheh jenge.
8 Aman kathina dinga kon'in eihuhdoh in kamitna mitlhi lonlouna ding leh kakeng hi kakiselhuh louna dingin eiveng jenge.
9 Hiche leisetna kahin laisen Pakai masanga kavahle jengin ahi.
10 Pakai keima kagenthei behseh jengtai katiteng jongleh nangma katahsan jing nalai e.
11 Kahahsat teng jongleh nangma kahin koujin ahi, ajeh chu hiche mitehi tahsan thei ahi pouve.
12 Thilpha simjoulou eibolpeh jeh a hi Pakai chu ipi kapehding ham?
13 Keiman huhhingna khon hi domsang'ing ting eihuhhing jeh a amin ka thangvah ding ahi.
14 Keiman amite ho jouse masangah Pakai ah kakitepna nitjinging kate.
15 Pakaijin angailut mite athitengleh alainatpi lheh jengjin ahi.
16 O Pakai keima nasoh kahi, nangin kasoh channa'a kon'in neihuhdoh tai.
17 Keiman thangvahna hi kilhaina gantha napengting Pakai min'in taovinge.
18 Keiman Pakai a kakitepna chu amite jouse masangah pengtin,
19 Pakai Hou-In ah Jerusalem lailungah subulhit'ing kate.
Pakai chu thangvah'in umhen!