22
Gentheina Pum'a David Thangvahna.
La lamkaipa Henga Jingkah Khovah Konna Sakhi Laina Pen Banga Peng Leuva Sah Dinga David Labol.
1 Ka Pathen, ka Pathen, idia nei dalhah hitam?
Panpi ngai a kamao teng idia gamla tah a um ji nahim?
2 Niseh in nangma kakouji e, ka Pathen, hinlah nangin nei donbut poi.
Janseh jongleh kakou ogin naja jin, hinlah lungmonna kanei jipoi.
3 Israel'in athangvah jing laltouna a tou,
nangma hi Atheng nahi.
4 Kapu kapa teuvin nangma na tahsan un,
nangman amaho na huhhing tai.
5 Naheng a akap un huhhing in aum tauve.
Ama hon nangma na tahsan un nangman amaho nasujum poi.
6 Hinlah keima hi mihem a dia lhing joulou lungtol bang bep kahi.
Mijouse dia thet um le musit um chu kahitai!
7 Eimu jousen eihouse uvin, aleiju adosah un, alu apeijun asei uve,
8 “Ama pa hi Pathen a kingai pa chu hilou ham?
Achuti le a Pathen chu kihuhdoh sah hen!
Pakaijin ama hi angailut a ahileh,
a Pakaijin huhdoh hen!”
9 Nangin kanu naobu sunga kon'in neina hoidamin nei pui galkai in,
kanu anglum laija patna nangma tahsanje neina hil ahitai.
10 Kahung pen a patna nangma ban thahatna a eikipelut a ahitai.
Kahung penlhah a pat in ka Pathen chu nangma nahi jing e.
11 Keija kon'in gamla loujenin,
ajeh chu boina ahungnai in,
koima dang eikithopi thei aumpoi.
12 Bongchal ho'n aum kimvel bangin kagal miten eihin um kimvel tauve;
Bashan bongchal khohlai hon eium kimvel tauve!
13 Hang tah le kisong tah Keipi bahkai in aneh ding abotel bangin,
keima vallhum dingin akamka uve.
14 Ka hinkho hi twi banga kisunglha ahitai,
kagu kachang ho jong akilhep gamtai.
Ka lungchang jong khoilu bangin
ajunlha gamtai.
15 Nisan asahgep leilhang bangin katha akanghel jengtai.
Kalei jong kadang chungah akikamat tai.
Nangin vutvai lah a nei jamin athidin nei dalha tan ahi.
16 Kagal miten uicha hon bangin eium kimvel tauvin;
Migilou honkhat in eium kimvel tauve.
Amahon ka khut le kakeng asun uve.
17 Kagu kachang ho jong simthei ahisoh tai.
Kagal miten eiveuvin eivesalteh jengun ahi.
18 Kavon ho jong vang asang un
akihom gam tauvin ahi.
19 O Pakai, keija kon'in um gamla hihbeh in!
Nangma ka thahatna nahi; neihung kithopi loijin!
20 Na chemjam chun nei huhdoh in;
ka hinkho manlu tah hi hiche uicha hoa kon'in nei huhdoh peh in.
21 Keipi bahkai kam a kon'in nei loidoh peh in lang
hiche gambongchal hang kiteni ki a kon'in nei huhdoh in.
22 Kasopi pasal ho leh numeiho kom'a namin hi phongjal leng kate.
Houbung kikhom holah a nangma ka thangvah ding ahi.
23 Ama gingho jousen, Pakai chu thangvah hen!
Jacob chilhah te jousen, ama chu ging uvin!
Israel chate jousen, ama chu jana peuhen!
24 Ajeh chu aman migenthei te thohgimna jouse chu anungsun poi.
Panpi ngaichatna a taona neiho angaipeh in ahi.
25 Keiman Houbung kikhopna lah a nangma kathangvah ding ahi.
Nangma chibai boh ho angsunga ka kitepna kasuh bulhit ding ahi.
26 Mivaicha ten neuvin tin vaset diu ahi.
Pakai holte jousen ama chu athangvah diu ahi.
Alungthim u tonsotna kipah jing ding ahiuve.
27 Vannoi leiset miten Pakai chu ahin hetdoh diu chuleh akom'a hung kile diu ahi.
Chutengleh namtin vaipi insung jouse a anga hungkun cheh diu ahi.
28 Ajeh chu leng thaneina chu Pakai ama a bou ahi.
Aman namtin vaipi chunga vai ahom ahi.
29 Leiset chunga mihao hon ankong sem untin chibai aboh diu ahi.
Ahinkho kichai a leivui soh ding,
athi thei mihem jouse a anga kun cheh hen.
30 Ichateu jousen jong Ama kin ahinbol diu ahi.
Ahunglhung ding khang miten jong Pakai kidanje chu ahin jahpeh diu ahi.
31 Tua penglou laiho kom'a jong thudih a anatohna ho jouse hung kiseipeh ding ahi.
Ama hon athilbol natohna ho jouse ahin jah diu ahi.