37
Mikitahte Le Migiloute Dinmun Kibahlou Dan.
David Labol.
1 .Mikitahlou te chunga lungkham dan
ahilouleh thil dihlou bolte chunga jong thangse hih in.
2 Ajeh chu amaho khu hamhing banga molloi diu ahi.
Nipi lai pahcha ho bangin, agoplha loi jiuve.
3 Pakai chu tahsan inlang thilpha bollin.
Chutileh gamsunga lungmongin chengin natin na khantou ding ahi.
4 Pakaiya kipah jingin,
chutileh aman na lungsunga na ngaichat chan napeh ding ahi.
5 Nabol natoh jouse Pakai a pelut jengin.
Ama chu tahsanin, chutileh aman na kithopi ding ahi.
6 Aman na themna chu khovah banga muthimlah a avahdoh sah ding,
chuleh na chanchin jong sunlai nisa banga avahdoh sah ding ahi.
7 Pakai masangah lungneng chan ngahhat in,
Aman ahintoh ding chu ngahhat in.
Migiloute ahaothei ukhu lungkhampi hih un
athilse gon ujong lunghimo peh hih in.
8 Lungchom lunghan bol-hih in!
Lung sat a kon'in jong kihei mangin!
Nalung lhaso hih in—
hichun thilse lam'a bou na puilut ding ahi.
9 Ajeh chu migiloute kisumang ding ahin,
amavang Pakai tahsan a dingdet ho chun gamsung alo diu ahi.
10 Migilou ho hi gangtah a mangthah diu ahi.
Amaho chu holle jong lechun mangthai ding ahi tauve.
11 Kisunem tah a umhon gamsung alo diu ahin
lungmong tah leh ninglhing tah a cheng diu ahi.
12 Migilou ten Pathen ngaisah miho douna ahinbol diu;
ama hon engset sanna ahin nelpeh diu ahi.
13 Hinlah Pakaijin amaho chu ahin nuisat e,
ajeh chu aman achung thu u kitanna ding nikho hunglhun chu amui.
14 Mi engse hon achemjam u hin asatdoh un
athalpiu hin loisal uvin
mivaicha ho leh suhgam theija umte that dinga
thilpha bolte chu ahin suhmang got diu ahi.
15 Hinlah achemjam un amaho lungchang asutpai joh ding,
chuleh athalpiu chu bong ding ahi.
16 Ase bol a thil tampi nei sangin
Pathen mite hia lhomcha nei aphachom joi.
17 Ajeh chu migiloute hatna chu kisumang ding,
Pahen mite vang Pakaijin avenbit jing ding ahi.
18 Ani ania Pakaijin themmona neilou ho chu avetsui ding,
chule ama hon tonsot a mang louding gou chu alo diu ahi.
19 Amaho chu hahsat nikho jongleh kijumso lou diu;
kellhah nikho jongleh angaichat ho anei tei diu ahi.
20 Migiloute mangthai diu ahi.
Pakai dougal miho jong loulaija pahcha tobang ahiuve—
meikhu banga hung mangloi diu ahi.
21 Migilou ten asumpa lah u anungsah ngai pouvin,
ahin Pathen miten vang hongphal tah in ape jeng uve.
22 Pakai phatthei changhon gamsung alo diu ahin,
aman asapset ho vang mangthah diu ahi.
23 Pathen mite Pakaijin akalson dan'u avetpeh e.
Ahinkho mandan jouseu aman akipapin ahi.
24 Amaho chu kipal jongleu lhupai lou diu,
ajeh chu Pakaijin akhut in atuh jingui.
25 Phat khat lai chun khangdong kahin, tun kateh tai.
Ahin Pathen mite paidoh a aumlam kahepon
achateu jong khutdon apang khapouve.
26 Pathen miten khotona neitah in sumpa ahom jiuvin,
chuleh achateu jong phatthei achang jiuve.
27 Thilse a kon'in kiheidoh in thilpha bol in,
chutileh tonsot a gamsunga nachen ding ahi.
28 Ajeh chu Pakaijin thudih bou adeijin,
Pathen'in acha teu jong donlou a akoi louhel ding ahi.
Aman ahoibit jing ding,
gitlou bol chate vang mangthah diu ahi.
29 Pathen chaten gamsung alodiu ahin,
tonsot a cheng jing diu ahi.
30 Pathen mite kamsunga thudih apotjin;
adih le adihlou ahil them jiuve.
31 Pathen Dan chu amaho changval din akisan'un,
hijeh a chu Ama lampi a konna vahlonle lou diu ahi.
32 Migilou ten Pathen mite achanglhi leuvin,
suhmangna ding lampi ahol jiuve.
33 Hinlah Pakaijin migiloute alolhin sah louhel ding
Pathen'in mikitah te patepna a aum tengu le themmo achan louhel ding ahi.
34 Pakai ah kinem jingin.
Alamlhong achun ching thei tah in lam jot in.
Aman nadop sanga agam leiset nalo sah ding ahi.
Migilou te manthah vang namu ding ahi.
35 Keiman migilou le khotona beite Lebanon gama
Ceder thingphung phatah banga akhantou u kamui.
36 Ahin ka nungvet kit le, ana beisoh tauve!
Ken kaholle vangin, ka mudoh jou tapoi!
37 Milungtheng ho leh mipha ho khu veuvin,
chamna adei hou chu amakhouva thil phatah in angah jingui.
38 Hinla thilse bolte suhmanga um diu ahi;
ama hon khonung hinkho anei pouve.
39 Pakaijin mikitah te chu ahuhdoh jin;
boina nikho hoa jong Ama hi akulpiu ahi.
40 Aman amaho chu akithopin,
migiloute a kon'in ahuhdoh jin ahi.
Aman amaho chu ahuhdoh in,
ama hon ama a lungmonna aneiyun ahi.