84
Pathen Hou-In a Kikhom Ding Ngaichat
1 O Pakai hatchungnung naHou-In hi iti kangailut hitam?
2 Hiche a chu iti kaum nom hitam! Pakai Hou-Inn chu kangaicha lheh jenge, kahina apumpin hingjing Pathen ah kakipana lan sange.
3 Inva jengin jong abuh akisah in, chuleh pengpalep injong intum akison e. Vo Pakai hatchungnung, kalengpa le ka Pathen! Vachan jong namaicham kom'a anou kicholdo nading abuh akisem ahi.
4 NaHou-Inn'a chenghon ichan gei a hinkho nopna anei'u hitam phat tin in nangma vahchoila asauve.
5 Athahatna Pakai a kon a kimuho hinkho iti nop a hitam, alungsungun Jerusalem'ah akholjing jengun ahi.
6 Beca phaicham ajot tengu jongleh, twisam putna twinah tampi umna bangin abol'un, gotwi hunglha masapen in jong twikul tampi ahinsemdoh pehjiuve.
7 Amaho akalson chan uva ahetbe cheh-chehjingdiu ahin, ama hon Jerusalem a Pakai chu amudiu ahi.
8 O Pakai, Ka Pathen hatchungnung kataona neingaipeh in, O Jacob Pathen.
9 O Pathen kalengpauhi phatthei boh'in, ama hi kaluum u ahi, nathaonusa nalhen pahi khotona musah jingin.
10 Munchom a ni sangkhat umsangin na Hou-In a nikhat um aphajoi. Miphalou inna chen sangin ka Pathen'inn'a kotngah a pan aphajoi.
11 Ajeh chu Pakai, Pathen hi eiho dia nisa le umpho ahi. Aman khoto na le loupina eipeuvin ahi. Pakaijin thildih jeng bol mihoa kon'in thilpha alamang pon ahi.
12 Pakai hatchungnung nangma tahsan miho hi iti kipa um a hitam?