REVELATION
JOHN HENGA THUPHON
Yeshua galjona le loupina
IPathen un vai ahom jeh'a jona neidinga kouna!
Thuphon lekhabu sung thu umdan
Thuphon lekhabu hin, thu adih'a tanna le khotona in, agilou chunga achaina leh jona aneiding chule lungkhamna jousea lhamonna umta ding ahiti, eigeldoh sah uve. Pakai Yeshuan chonset le thina chunga jona aneitah jeh in, eihon jong ahung lhung ding Pathen lenggam thudol gel pum'a hinkho iman diu tina ahi. Hiche themgao thuseidoh lekhabu hi Thulhun Thah a simdia thanop umpen ahi.
Vetsahnan, Gospel li ho hin Pakai Yeshua leiset'a ahinkho man thudol ajih uvin ahi. Lekhathot hoa hin Yeshua thodoh jouva atahsan ho lah'a anatoh thudol akisun'e. Thuphon hin ahung ding Loupina Lengpa Pakai Yeshua Christa ahi thudol ajih in, ajeh chu ngailutna neiya Ama hou ding chule Ama dinga ikipumpeh diu thu eiseipeh un ahi. Aman jona phatah'a aneitah jeh'a eihon jong hinkhoa kitilkhouna theihoa thohhattah'a pan ilah diu akul'in ahi. Phat nunung lamle vannoi leiset hi I-Pakaiyu le Christa Lenggam hung hiding chule Aman atonsot tonsot'a vai ahom ding ahitai, Rev 11:15.
Lekhabu jihpa chule akijih kum
Gospel John le John lekhathot thumho jih'a pang Seijui John in Thuphon lekhabu hi AD 95 sunga ajih ahi, tihi alhangpia pomdan ahi.
Lekhabu akijihna le akithot lona
Hiche lekhabu hi Rome gamsung Asia gamkai (Tua Turkey), sunga Houbung sagi ho henga ana kijih ahi. Hiche Houbung ho chun Yeshua Christa atahsan nauva kon, alhuh-lham nalou diuva gihna'a kijih ahi. Chule lengho Leng pakai ho Pakai chun galjona aneiding thua lhamonna jong jao ahi.
Yeshua Christa thuphondoh John in ajihlut
1
1 Hiche hi Yeshua Christa a kon a Thuphondoh, Pathen in thil hungsohvah ding ho asohte ahetsah ahi. Aman hiche thuphondoh hi avantil khat asola asoh John henga aphondoh ahi.
2 Ama chun amuchan tahsan umtah'a aseidoh ahi. Hiche hi Pathen Thule Yeshua Christa thudol ahettohsah na thulhut ahi.
3 Houbung henga hiche gaova thu kiseidoh ho sima, chule ja'a chule asunga kisun ho chinga chu Pathen in phatthei aboh ding ahi: ijeh ham itileh aphat hi anaitai.
Houbung sahi ho lemna
4 Hiche lekhathot hi John a kona Asia gam'a houbung sagi ho henga ding ahi. Auma, aum jingsa chule ahung umnalai ding; Laltouna maiya Lhagao sagi;
5 chule Yeshua Christaa konin-Lungset le cham-lungmon nachunguva umhen. Ama hiche ho thudol'a hettohsah tahsan umtah ahin, athilah a kona thoudoh masapa, chule vannoi leiset lengho chunga vipopa ahi. Aman eingailut uva chule eiho dinga athisan aso jal'a ichonsetnauva kona eilha ong jeh uvin loupina jouse Amaa hijing hen.
6 Aman Apa Pathena dinga Lenggam thempuhoa eisemu ahitai. Amaa chun Loupina jouse le thaneina jouse a-imatih chanin hijinghen! Amen.
7 Veuvin! Van'a meipiho toh kilhonin ahunge. Chule mitin in Ama chu amu dingu ahi-Ama tengcha a sunho jengin jong Amu dingu ahi. Chule vannoi namtin Ama jeh a lunghem dingu ahi. Hiti chu hihen! Amen.
8 “Keima Alpha le Omega–apatna le achaina chu kahi,” tin Pakaiyin aseiye. “Keima auma, anaum jingsa, chule ahung umnalai ding Hatchungnung kahi,” ati.
Mihem chapan gaova amu
9 Keima, John hi, nasopi le Pathen Lenggam sunga gimthohna a chan nanei khompi chule Yeshuan eikounauva thohhattah a panga kahi. Keima Pathen Thu seiphongna le Yeshua thu hettohsah jaljeh a hungkilekit talou dinga Patmos Twikol a eikisolmang ahi.
10 Hichu Pakai nikho ahin, chuin keiman Lhagaovin Pathen kahouvin ahi. Phulou helouvin, keiman kanung lama konin aw gingtah khat sumkon hung gin tobang kajai.
11 Hichun, “Namu chasun chu lekhabu khat ah sun in, chule houbung sagi ho: Ephesus, Smyrna, Pergamum, Thyatira, Sardis, Philadelphia, chule Laodicea khopi a umho koma thot'in,” eiti.
12 Kakoma thusei chu koiham tia kakiheileh keiman sana-meivah khom sagi chu kamutai.
13 Chule alailung a thaomeikhom ho lah a ding khat chu Mihem Chapa tobang ahi. Ama chun ponchol khat sanapon amongkai aoma avei chu kamui.
14 Alu le asam chu samul tobang ahin, buhbang ban'in abangin ahi. Chule amit teni chu meikong toh abangin ahi.
15 Akengphang teni chu ngen kipot jolsel meikonga kilhathengsel tobang ahin, chule a aw chu twikhanglen kinong gin tobang ahi.
16 Aman akhut jetlam'a ahsi sagi achoiyin, chule akama konin hemto-chemjam ahung potdoh'in ahi. Chule amaiso chu nisavah pettah tobang ahi jengin ahi.
17 Keiman Ama kamu chun, keima athi tobang leuvin akengphang bul'a kalhu jengin ahi. Hinla Aman akhut jetlam in eituh in, aseiyin, “Kicha hih in! Keima amasa le anunungpen kahi.
18 Keima ahing jinga kahi. Keima kathin, hinla ven, Keima a-itih'a kahin jing ding ahi! Chule Keiman thina le mithi kholna lhankhuh kot-heh kachoiye.
19 Namusa chengse-tutua sohdoh thil ho chule ahung sohding ho geiyin jih in.
20 Hiche hi kakhut jetlam'a nangman namu ahsi sagi ho le thaomeikhom sagi ho chu ahi. Ahsi sagi ho chu houbung sagi lhacha ho ahin, chule thaomeikhom sagi ho chu houbung sagi ho ahiuve,” ati.